ສິນບູຊາສັກສິດແຕ່ອັນດຽວ

1ດ້ວຍວ່າກົດບັນຢັດເປັນແຕ່ພຽງຮູບເງົາຂອງສິ່ງປະເສີດທີ່ມາພາຍຫລັງ ແລະກໍບໍ່ແມ່ນຮູບຂອງຕົວຈິງນັ້ນຊ້ຳ, ຈຶ່ງບໍ່ສາມາດພາຜູ້ທີ່ມີສ່ວນຮ່ວມນຳ ໄປເຖິງຄວາມດີບໍລິບູນໄດ້, ແມ່ນຈະຖະຫວາຍເຄື່ອງບູຊາອັນດຽວນັ້ນ ຊ້ຳໄປຊ້ຳມາທຸກໆປີ ຢ່າງບໍ່ມີຍາມເຊົາກໍຕາມ. 2ບໍ່ດັ່ງນັ້ນ ການຖະຫວາຍບູຊາແບບນີ້ກໍຕ້ອງຢຸດເຊົາ, ຍ້ອນວ່າ ເມື່ອພວກທີ່ມາທຳການບູຊາ ໄດ້ຮັບການຊຳຣະໃຫ້ບໍລິສຸດແລ້ວ ກໍຄົງຈະຄຶດວ່າ ຕົນບໍ່ມີບາບອີກເລີຍ ບໍ່ແມ່ນບໍ? 3ແຕ່ຕາມຈິງແລ້ວ, ການຖະຫວາຍບູຊາເຫລົ່ານີ້ ເຕືອນໃຫ້ສຳນຶກເຖິງບາບຢູ່ທຸກໆປີ. 4ຍ້ອນວ່າເລືອດງົວແລະເລືອດແບ້ ບໍ່ສາມາດຍົກບາບໄດ້ຈັກເທື່ອ. 5ດັ່ງນີ້ ເມື່ອສະເດັດມາໃນໂລກ, ພຣະກຣິສໂຕເຈົ້າກ່າວວ່າ: “ໂອພຣະເຈົ້າ, ພຣະອົງບໍ່ປາດຖະໜາເຄື່ອງບູຊາແລະເຄື່ອງ ບັນນາການໃດໆເລີຍ, ແຕ່ພຣະອົງໄດ້ໂຜດໃຫ້ຂ້າພະເຈົ້າມີກາຍ, 6ພຣະອົງບໍ່ພໍພຣະໄທນຳເຄື່ອງບູຊາທີ່ຈູດເຜົາ ແລະສິນບູຊາລຶບບາບ, 7ຂ້າພະເຈົ້າຈຶ່ງທູນວ່າ: “ໂອພຣະເຈົ້າ, ຂ້າພະເຈົ້ານີ້ເອງ ມາເພື່ອທຳຕາມນ້ຳພຣະໄທຂອງພຣະອົງ, ຕາມທີ່ໄດ້ຈາລຶກໄວ້ໃນພຣະຄຳພີ ກ່ຽວກັບຂ້າພະເຈົ້າ.” 8ພຣະອົງຊົງກ່າວກ່ອນວ່າ: “ເຄື່ອງບູຊາ, ເຄື່ອງບັນນາການ, ເຄື່ອງບູຊາທີ່ຈູດເຜົາ, ສິນບູຊາລຶບລ້າງບາບຕ່າງໆນັ້ນ ພຣະອົງບໍ່ປະສົງ ແລະບໍ່ພໍພຣະໄທນຳ. ແຕ່ໃຫ້ເບິ່ງຄັກໆວ່າ ຂອງບູຊາເຫລົ່ານັ້ນຖືກຕ້ອງຕາມກົດໝາຍແທ້.” 9ພຣະອົງຍັງກ່າວໄວ້ອີກວ່າ: “ຂ້າພະເຈົ້ານີ້ເອງ ມາທຳຕາມນ້ຳພຣະໄທຂອງພຣະອົງ.” ພຣະອົງຍົກເລີກລະບຽບການບູຊາເກົ່າ ເພື່ອຕັ້ງລະບຽບໃໝ່ຂຶ້ນແທນ. 10ແມ່ນຍ້ອນຄວາມສະໝັກໃຈນີ້ເອງ ພວກເຮົາຈຶ່ງໄດ້ເປັນຜູ້ສັກສິດບໍລິສຸດ ດ້ວຍອາໄສການຖະຫວາຍພຣະກາຍຂອງພຣະກຣິສໂຕ ເປັນເຄື່ອງບູຊາພຽງແຕ່ເທື່ອດຽວແລ້ວເລີຍ. 11ໃນເມື່ອສົງທຸກອົງ ຢືນປະຕິບັດໜ້າທີ່ຂອງຕົນທຸກໆວັນ ແລະຖະຫວາຍບູຊາແນວດຽວ ທີ່ບໍ່ສາມາດລຶບລ້າງບາບໄດ້ນັ້ນ ຊ້ຳໄປຊ້ຳມາບໍ່ເຊົາ, 12ສ່ວນພຣະເຢຊູເຈົ້ານັ້ນ ກົງກັນຂ້າມ, ເມື່ອໄດ້ຊົງຖະຫວາຍບູຊາແຕ່ເທື່ອດຽວ ເພື່ອລຶບລ້າງບາບແລ້ວ, ພຣະອົງກໍປະທັບຢູ່ເບື້ອງຂວາຂອງພຣະເຈົ້າຕະຫລອດໄປ. 13ແລະແຕ່ເວລານັ້ນມາ, ພຣະອົງຄອງຖ້າໃຫ້ພວກສັດຕູຂອງພຣະອົງ ຖືກຜາບລົງເປັນຂຽງຮອງພະບາດຂອງພຣະອົງ, 14ດັ່ງນີ້ ອາໄສສິນບູຊາແຕ່ເທື່ອດຽວຂອງພຣະອົງ ພຣະອົງຈຶ່ງຊ່ວຍພວກທີ່ພຣະອົງທຳໃຫ້ສັກສິດໄປນັ້ນ ກາຍເປັນຜູ້ດີບໍລິບູນຕະຫລອດໄປ. 15ພຣະຈິດເຈົ້າເອງກໍຊົງຢືນຢັນດ້ວຍ, ຍ້ອນໄດ້ຊົງກ່າວໄວ້ວ່າ: “ນີ້ແມ່ນສຳພັນໄມຕີທີ່ເຮົາຈະຜູກໄວ້ກັບພວກເຂົາ ເມື່ອວັນເຫລົ່ານັ້ນກາຍໄປແລ້ວ. ພຣະອົງເຈົ້າຊົງປະກາດວ່າ: “ເມື່ອປະທານພຣະບັນຢັດໃຫ້ນັ້ນ, ເຮົາຈະຈາລຶກມັນເຂົ້າໃນດວງໃຈ ແລະໃນຈິດໃຈຂອງພວກເຂົາ 17ເຮົາຈະຫລົງລືມການບາບແລະຄວາມຜິດຕ່າງໆທັງໝົດຂອງພວກເຂົາ.” 18ດັ່ງນີ້ ເມື່ອມີການໃຫ້ອະໄພບາບແລ້ວ, ກໍບໍ່ຕ້ອງມີການຖະຫວາຍບູຊາເພື່ອລຶບລ້າງບາບອີກຕໍ່ໄປ.

ຮຽກຮ້ອງໃຫ້ມີໃຈກວ້າງ

19ພີ່ນ້ອງທີ່ຮັກ, ດ້ວຍເຫດນີ້ ພວກເຮົາຈຶ່ງມີຄວາມຫວັງແທ້ ທີ່ຈະເຂົ້າໃນສະຖານຍອດສັກສິດ ດ້ວຍອາໄສພຣະໂລຫິດຂອງພຣະເຢຊູເຈົ້າ. 20ບັດນີ້ ພວກເຮົາມີຫົນທາງສາຍໃໝ່ ແລະມີຊີວິດ ຊຶ່ງພຣະອົງເຈົ້າໄດ້ຕັດຜ່ານຜ້າກັ້ງນັ້ນ ຄືວ່າ ຜ່ານທາງພຣະກາຍຂອງພຣະອົງນັ້ນເອງ, 21ແລະພວກເຮົາກໍມີມະຫາສົງຜູ້ຍິ່ງໃຫຍ່ ປະຈຳຢູ່ໃນເຄຫາຂອງພຣະເຈົ້າດ້ວຍ. 22ດັ່ງນີ້ ພວກເຮົາຈຶ່ງພາກັນເຂົ້າໄປ ດ້ວຍດວງໃຈທ່ຽງກົງ ແລະປ່ຽມດ້ວຍຄວາມເຊື່ອ, ມີດວງໃຈບໍລິສຸດປາດສະຈາກຄວາມຜິດໃນມະໂນທຳ ພ້ອມທັງກາຍທີ່ໄດ້ຮັບການຊຳຣະໃຫ້ສະອາດດ້ວຍນ້ຳອັນບໍລິສຸດ. 23ຈົ່ງໝັ້ນແກ່ນແໜ້ນໜຽວໃນຄວາມຫວັງສະເໝີໄປ ຍ້ອນພຣະອົງຜູ້ໄດ້ສັນຍານັ້ນ ເປັນຜູ້ມີສັດຈະ. 24ຈົ່ງເຝົ້າເບິ່ງແຍງກັນ ເພື່ອຕຸກເຕືອນໃຫ້ມີຄວາມຮັກ ແລະສ້າງຄວາມດີ. 25ຢ່າຜີກຕົວໜີຈາກການຊຸມນຸມ ເໝືອນດັ່ງບາງຄົນເຄີຍທຳ, ແຕ່ແຮງໃຫ້ເຕືອນໃຈກັນຂະຫຍັນກວ່າອີກ ເມື່ອເຫັນວ່າ ວັນນັ້ນໃກ້ເຂົ້າມາຢູ່ເລື້ອຍໆ.

ອັນຕະລາຍຂອງການປະຖິ້ມຄວາມເຊື່ອ

26ດ້ວຍວ່າ ຖ້າພວກເຮົາຕັ້ງໃຈທຳບາບ ເມື່ອໄດ້ຮູ້ຈັກຄວາມຈິງຢ່າງຄັກແນ່ແລ້ວ, ກໍບໍ່ມີສິນບູຊາອັນໃດມາລຶບລ້າງບາບນັ້ນໄດ້. 27ມີແຕ່ຄວາມຢ້ານກົວຄອງຖ້າການພິພາກສາ ແລະໄຟອັນຮ້ອນແຮງ ທີ່ຈະເຜົາຜານພວກຂະບົດເທົ່ານັ້ນ. 28ຄົນໃດລະເມີດກົດໝາຍຂອງໂມແຊ, ແລະຖ້າມີສອງຫລືສາມຄົນເປັນພິຍານແລ້ວ, ຄົນນັ້ນກໍຕ້ອງຖືກປະຫານຊີວິດຢ່າງບໍ່ມີປານີ. 29ພວກພີ່ນ້ອງກໍຄິດເຫັນແລ້ວວ່າ ຜູ້ໃດກໍຕາມ ທີ່ຢຽບຢ່ຳພຣະບຸດຂອງພຣະເຈົ້າ, ປະໝາດປະຈານພຣະໂລຫິດແຫ່ງພຣະສຳພັນໄມຕີ ທີ່ໄດ້ທຳໃຫ້ເຂົາເປັນຜູ້ສັກສິດ ແລະດູໝິ່ນພຣະຈິດແຫ່ງ ພຣະຄຸນນັ້ນ ຈະຕ້ອງສົມໄດ້ໂທດໜັກກວ່າອີກສັກເທົ່າໃດ? 30ພວກເຮົາຮູ້ຈັກແລ້ວວ່າ ຜູ້ໃດກ່າວຄຳຕໍ່ໄປນີ້ວ່າ: “ການແກ້ແຄ້ນແມ່ນວຽກຂອງເຮົາ, ເຮົາເອງຈະຕອບແທນ” ແລະຍັງອີກຕອນໜຶ່ງວ່າ: “ພຣະອົງເຈົ້າຈະຊົງພິພາກສາຊາປະຊາກອນຂອງພຣະອົງ.” 31ຕົກຢູ່ໃນເງື່ອມພະຫັດຂອງພຣະເຈົ້າຜູ້ຊົງຊີວິດນັ້ນ ເກີນວ່າເປັນການຕາຫວາດກົວແທ້. 32ຈົ່ງລະລຶກເຖິງຄາວຫລັງພຸ້ນຄື ພໍແຕ່ໄດ້ຮັບຄວາມສະຫວ່າງ ພວກພີ່ນ້ອງກໍຖືກທຸກທໍຣະມານຢ່າງໜັກ, 33ລາງເທື່ອຖືກດ່າວ່າ ຖືກຂົ່ມເຫງຢ່າງເປີດເຜີຍ, ລາງເທື່ອກໍຖືກເຂົາເອົາໄປລວມເປັນໝູ່ກັບພວກທີ່ໄດ້ຮັບຊາຕາກຳແບບດຽວກັນ. 34ຕາມຈິງແລ້ວ, ພວກພີ່ນ້ອງກໍໄດ້ຮ່ວມຮັບທຸກກັບພວກທີ່ຖືກຄຸມຂັງ ໄດ້ມີຄວາມຍິນດີໃຫ້ເຂົາຮິບເອົາຊັບສິນໄປ ຍ້ອນພວກພີ່ນ້ອງຮູ້ດີວ່າ ໄດ້ເປັນເຈົ້າຊັບສິນອັນດີກວ່າແລະຖາວອນກວ່າແລ້ວ. 35ຂໍໃຫ້ພວກພີ່ນ້ອງຢ່າປະຖິ້ມຄວາມໄວ້ວາງໃຈອັນແນ່ນອນຂອງພວກພີ່ນ້ອງ ຍ້ອນມັນນຳເອົາບຳເໜັດອັນຍິ່ງໃຫຍ່ມາໃຫ້. 36ດັ່ງນີ້ ຈົ່ງມີມານະທົນ ເພື່ອປະຕິບັດຕາມນ້ຳພຣະໄທພຣະເຈົ້າ ແລ້ວຈະໄດ້ຮັບຕາມພຣະສັນຍາ. 37ຍ້ອນວ່າອີກບໍ່ເຫິງ ອີກບໍ່ນານເທົ່າໃດ ພຣະອົງຜູ້ຕ້ອງມານັ້ນ, ຈະສະເດັດມາ, ພຣະອົງບໍ່ຍືດເຍື້ອເວລາໄປດອກ. 38ຄົນຊອບທຳຂອງເຮົາຈະດຳຣົງຊີວິດຢູ່ດ້ວຍຄວາມເຊື່ອ, ຖ້າຫາກວ່າເຂົາທໍ້ຖອຍເຮົາກໍຈະບໍ່ພໍໃຈນຳເຂົາ. 39ສ່ວນພວກເຮົາ, ພວກເຮົາບໍ່ແມ່ນຄົນທໍ້ຖອຍເພື່ອຄວາມພິນາດ, ແຕ່ແມ່ນຄົນທີ່ເຊື່ອ ເພື່ອຄວາມຮອດຂອງວິນຍານຂອງຕົນ.