ຈົດໝາຍຂຽນເຖິງສັດຕະບຸຣຸດຊາວເຮເບີຣ

ພຣະເຈົ້າກ່າວກັບພວກເຮົາໂດຍທາງພຣະບຸດ

1ຫລັງຈາກທີ່ພຣະເຈົ້າໄດ້ກ່າວເປັນຫລາຍຄັ້ງຫລາຍຄາວ ແລະດ້ວຍວິທີຕ່າງໆກັບພວກບັນພະບຸຣຸດ ທາງປະພາສົກແຕ່ປາງກ່ອນແລ້ວ, 2ຕົກມາໃນສະໄໝເຮົານີ້ ອັນເປັນວາລະສຸດທ້າຍ ພຣະອົງກໍໄດ້ກ່າວກັບພວກເຮົາທາງພຣະບຸດ ຜູ້ພຣະອົງໄດ້ແຕ່ງຕັ້ງໃຫ້ເປັນຜູ້ຮັບມໍລະດົກທຸກຢ່າງ. ດ້ວຍອາໄສພຣະບຸດນີ້ ພຣະອົງໄດ້ສ້າງໂລກຈັກກະວານ. 3ພຣະບຸດອົງນີ້ແມ່ນລັດສະໝີແຫ່ງສີມຸງຄຸນຂອງພຣະອົງ, ແມ່ນຮູບແບບຂອງທຳມະຊາດຂອງພຣະອົງ, ພຣະບຸດນັ້ນຊົງຄ້ຳຊູໂລກຈັກກະວານ ດ້ວຍວາຈາອັນຊົງລິດຂອງພຣະອົງ. ເມື່ອໄດ້ຊຳຣະລ້າງມົນທິນບາບຕ່າງໆເສັດສິ້ນແລ້ວ, ພຣະອົງກໍສະເດັດຂຶ້ນປະທັບຢູ່ເບື້ອງຂວາຂອງພຣະເຈົ້າຜູ້ສະງ່າລາສີໃນສະຫວັນສູງສຸດ, 4ພຣະອົງຈຶ່ງເປັນໃຫຍ່ກວ່າພວກເທວະດາ ສົມກັບທີ່ພຣະອົງໄດ້ຮັບພະທານອັນສູງສົ່ງກວ່ານາມຂອງເທວະດາທັງຫລາຍ ມາເປັນມໍລະດົກ.

ພຣະບຸດຍິ່ງໃຫຍ່ກວ່າພວກເທວະດາ

5.ພຣະເຈົ້າເຄີຍກ່າວກັບເທວະດາອົງໃດອົງໜຶ່ງບໍວ່າ: “ທ່ານແມ່ນບຸດຂອງເຮົາ, ເຮົາໄດ້ບັງເກີດທ່ານໃນວັນນີ້?” ແລະຍັງເຄີຍກ່າວກັບໃຜອີກບໍວ່າ: “ເຮົາຈະເປັນບິດາຂອງທ່ານ ແລະທ່ານຈະເປັນບຸດຂອງເຮົາ?” 6ແລະອີກຕອນໜຶ່ງ, ເມື່ອຊົງນຳພະໂອລົດຫົວປີສະເດັດມາໃນໂລກ, ພຣະອົງຊົງກ່າວ: “ເທວະດາທຸກຖ້ວນໜ້າຂອງພຣະເຈົ້າ ຈົ່ງນົບໄຫວ້ອົງພຣະບຸດເຈົ້າເຖີດ.” 7ກ່ຽວກັບພວກເທວະດານັ້ນ ຊົງກ່າວວ່າ: “ພຣະອົງຊົງບັນດານໃຫ້ພວກເທວະດາເປັນຄືລົມ,ໃຫ້ຜູ້ຮັບໃຊ້ຂອງພຣະອົງເປັນດັ່ງແປວໄຟ” 8ແຕ່ກ່ຽວກັບພຣະບຸດນັ້ນ, ຊົງກ່າວວ່າ: “ໂອ ພຣະເຈົ້າ ລາດຊະບັນລັງຂອງພຣະອົງດຳຣົງຢູ່ຕະຫລອດນິຣັນດອນ ພະຄະທາແຫ່ງອານາຈັກຂອງພຣະອົງ ເປັນຄະທາແຫ່ງຄວາມທ່ຽງກົງ. 9ພຣະອົງຊົງຮັກຫອມຄວາມຊອບທຳ ແລະກຽດຊັງຄວາມອະທຳ, ດ້ວຍເຫດນີ້, ໂອພຣະເຈົ້າ, ພຣະເຈົ້າຂອງພຣະອົງຊົງສະເລີມພຣະອົງດ້ວຍນ້ຳມັນແຫ່ງຄວາມປິຕິຍິນດີ ເໜືອກວ່າຜູ້ເປັນລາຊາດັ່ງດຽວກັບພຣະອົງ. 10ແລະຍັງອີກຕອນໜຶ່ງວ່າ: “ໂອພຣະອົງເຈົ້າ, ຕັ້ງແຕ່ເດີມທີ, ພຣະອົງຊົງວາງຮາກຖານໃຫ້ໂລກ. ຟ້າສະຫວັນເປັນສີມືຂອງພຣະອົງ. 11ທຸກສິ່ງເຫລົ່ານັ້ນຈະດັບສູນໄປ, ແຕ່ພຣະອົງດຳຣົງຢູ່, ສິ່ງສາລະພັດຈະເກົ່າແກ່ລົງດັ່ງເຄື່ອງນຸ່ງຫົ່ມ. 12ພຣະອົງຈະມ້ວນກໍ້ສິ່ງເຫລົ່ານີ້ໄວ້ ເໝືອນມ້ວນກໍ້ເສື້ອຄຸມ, ພຣະອົງຈະຊົງປ່ຽນສິ່ງເຫລົ່ານີ້ ເໝືອນດັ່ງປ່ຽນເຄື່ອງນຸ່ງຫົ່ມ. ສ່ວນພຣະອົງນັ້ນ ບໍ່ມີສິນສຸດເລີຍ, ຍັງຄົງຢູ່ດັ່ງເດີມ, ແລະວັນເດືອນປີຂອງພຣະອົງບໍ່ມີສິ້ນສຸດເລີຍ. 13ພຣະເຈົ້າເຄີຍກ່າວກັບເທວະດາອົງໃດບໍວ່າ: “ເຊີນປະທັບຢູ່ເບື້ອງຂວາຂອງເຮົາ ຈົນກວ່າເຮົາຈະທຳໃຫ້ສັດຕູຂອງທ່ານກາຍເປັນຂຽງຮອງພະບາດ” 14ພວກເທວະດາເຫລົ່ານັ້ນເປັນແຕ່ຈິດ ມີໜ້າທີ່ຮັບໃຊ້ແລະຖືກສົ່ງໄປບົວລະບັດຊ່ວຍເຫລືອພວກທີ່ຈະຮັບຄວາມຮອດ ມາເປັນສ່ວນມໍລະດົກ ບໍ່ແມ່ນບໍ?