ຈົດໝາຍຂອງນັກບຸນເປົາໂລຂຽນເຖິງຟີເລມອນ

1.ຈາກເປົາໂລ ຂ້າໃຊ້ຂອງພຣະເຈົ້າ, ຜູ້ຖືກຄຸມຂັງຍ້ອນພຣະເຢຊູກຣິສໂຕເຈົ້າ ແລະຕີໂມເທຜູ້ນ້ອງຊາຍ ເຖິງຟີເລມອນ, ເພື່ອນຮ່ວມງານທີ່ຮັກແພງ, 2.ແລະນາງອັບຟີອາຜູ້ນ້ອງສາວ, ກັບອັກກີເປເພື່ອນຮ່ວມຮົບຂອງເຮົາ ພ້ອມທັງກຸ່ມກຣິສຕະຊົນທີ່ມາເຕົ້າໂຮມກັນຢູ່ເຮືອນຂອງທ່ານ. 3.ຂໍພຣະຄຸນແລະສັນຕິສຸກທີ່ມາຈາກພຣະເຈົ້າ ພຣະບິດາຂອງເຮົາທັງຫລາຍ ແລະຈາກພຣະເຢຊູກຣິສໂຕເຈົ້າ ຈົ່ງມີແດ່ພວກທ່ານທຸກຄົນເທີ້ນ.

ຄວາມຮັກແລະຄວາມເຊື່ອຂອງຟີເລມອນ

4.ເຮົາຂອບພຣະຄຸນພຣະເປັນເຈົ້າຢູ່ສະເໝີ ພ້ອມທັງລະລຶກເຖິງເຈົ້າໃນຄຳພາວະນາຂອງເຮົາ 5.ຍ້ອນເຮົາໄດ້ຮັບຂ່າວ ເລື່ອງຄວາມເຊື່ອແລະຄວາມຮັກ ທີ່ເຈົ້າມີຕໍ່ພຣະເຢຊູກຣິສໂຕເຈົ້າ ແລະຕໍ່ຜູ້ສັກສິດທັງຫລາຍ. 6.ຂໍໃຫ້ການເຂົ້າຮ່ວມໃນຄວາມເຊື່ອຂອງເຈົ້ານັ້ນ ຈົ່ງເກີດດອກອອກຜົນ ຄືທຳໃຫ້ທຸກຄົນຮູ້ຈັກເຖິງຄວາມດີທຸກຢ່າງ ທີ່ພວກເຮົາສາມາດທຳໄດ້ເພື່ອພະ ກຣິສໂຕເຈົ້າ. 7.ນ້ອງທີ່ຮັກ, ເຮົາມີຄວາມຍິນດີແລະມີຄວາມສຸກໃຈເປັນຢ່າງຍິ່ງ ຍ້ອນວ່າຄວາມຮັກຂອງເຈົ້າໄດ້ນຳຄວາມຊື່ນຊົມຍິນດີ ມາສູ່ດວງໃຈຂອງບັນດາຜູ້ສັກສິດ. 8.ດັ່ງນີ້ ແມ່ນວ່າໃນນາມຂອງພຣະເຢຊູກຣິສໂຕ ເຮົາສາມາດສັ່ງເຈົ້າໂດຍກົງ ໃຫ້ທຳຕາມໜ້າທີ່ຂອງຕົນກໍໄດ້. 9.ແຕ່ເຮົາຄິດວ່າ ຄວນວອນຂໍເຈົ້າ ຍ້ອນເຫັນແກ່ຄວາມຮັກດີກວ່າ. ເຮົາເອງຄືເປົາໂລຜູ້ແກ່ຊະລາ ແລະກຳລັງຖືກຄຸກຍ້ອນພຣະເຢຊູເຈົ້າຢູ່ດຽວນີ້, 10.ເຮົາວອນຂໍເຈົ້າເພື່ອໂອເນຊິມບຸດຂອງເຮົາ, ຜູ້ເຮົາໄດ້ໃຫ້ກຳເນີດເກີດມາໃນຄວາມເຊື່ອ ເມື່ອເວລາເຮົາຖືກຄຸກຢູ່ນັ້ນ. 11.ແຕ່ກ່ອນເຂົາເປັນຄົນບໍ່ມີປະໂຫຍດຫຍັງໃຫ້ເຈົ້າ, ແຕ່ດຽວນີ້ເຂົາກັບເປັນຄົນມີປະໂຫຍດໃຫ້ເຈົ້າ ແລະໃຫ້ເຮົາດ້ວຍ. 12.ເຮົາສົ່ງເຂົາຄືນມາຫາເຈົ້າ ຄືສົ່ງຫົວໃຈຂອງເຮົາເອງມາໃຫ້. 13.ເຮົາປາດຖະໜາຢາກເອົາເຂົາຢູ່ນຳເຮົາ ເພື່ອຊ່ວຍເຮົາແທນເຈົ້າ ໃນເວລາເຮົາຖືກຄຸກຍ້ອນພຣະວໍຣະສານນີ້. 14.ແຕ່ເຮົາບໍ່ຢາກເຮັດຫຍັງໂດຍເຈົ້າບໍ່ເຫັນດີນຳ, ເພື່ອໃຫ້ເຈົ້າໄດ້ກະທຳຄວາມດີດ້ວຍຄວາມສະໝັກໃຈ ໂດຍບໍ່ມີໃຜມາບັງຄັບ. 15.ໂອເນຊິມໄດ້ພາກຈາກເຈົ້າໄປຊົ່ວເວລາໜຶ່ງນັ້ນ ກໍແມ່ນເພື່ອຈະຫລົບມາຢູ່ນຳເຈົ້າອີກຕະຫລອດໄປກໍເປັນໄດ້. 16.ແລະເຂົາຫລົບມາເທື່ອນີ້ ບໍ່ແມ່ນໃນຖານະເປັນຂ້ອຍທາດ, ແຕ່ໃນຖານະກວ່າເປັນຂ້ອຍທາດອີກ ຄືເປັນນ້ອງຊາຍທີ່ຮັກຜູ້ໜຶ່ງພິເສດຂອງເຮົາ, ແຕ່ສຳລັບເຈົ້າຄົງຈະກວ່າອີກ ທັງໃນຖານະທີ່ເຂົາເປັນຄົນແລະເປັນກຣິສຕັງດ້ວຍ. 17.ດັ່ງນີ້ ຖ້າເຈົ້າຖືວ່າເຮົາເປັນພີ່ນ້ອງເຈົ້າໃນຄວາມເຊື່ອແລ້ວ, ຂໍໃຫ້ເຈົ້າຮັບເອົາເຂົາຄືຮັບເອົາເຮົາເອງເຖີດ. 18.ແລະຖ້າເຂົາໄດ້ເຮັດຜິດພາດຫຍັງຕໍ່ເຈົ້າ ຫລືໄດ້ເປັນໜີ້ເປັນສິນເຈົ້າຢ່າງໃດ, ກໍໃຫ້ເຈົ້າຄິດເອົານຳເຮົາ. 19.ເຮົາເປົາໂລເປັນຜູ້ຂຽນຂໍ້ຄວາມຕໍ່ໄປນີ້ດ້ວຍມືເຮົາເອງຄື: ເຮົາເອງຈະເປັນຜູ້ໃຊ້... ເຮົາບໍ່ອ້າງເຖິງໜີ້ສິນທີ່ເຈົ້າຕິດເຮົາດອກ, ແລະໜີ້ສິນນັ້ນກໍແມ່ນຕົວເຈົ້າເອງແລ.

20.ແມ່ນແລ້ວ, ນ້ອງຊາຍເອີຍ, ຈົ່ງສະໜອງຕອບເຮົາໃນພຣະອົງເຈົ້າດ້ວຍ. ຈົ່ງຊ່ວຍເຮົາໃຫ້ມີຄວາມຊື່ນໃຈໃນພຣະກຣິສໂຕເຈົ້າເຖີດ. 21.ຍ້ອນໄວ້ໃຈວ່າ ເຈົ້າຈະເຊື່ອຟັງ, ເຮົາຈຶ່ງໄດ້ຂຽນມາຫາເຈົ້າ, ແລະເຮົາຮູ້ວ່າ ເຈົ້າຄົງຈະກະທຳລື່ນກວ່າເຮົາບອກອີກຊ້ຳ. 22.ພ້ອມກັນນີ້, ຂໍຈັດບ່ອນພັກໄວ້ຖ້າເຮົາດ້ວຍ, ຍ້ອນເຮົາຫວັງວ່າ, ອາໄສຄຳພາວະນາຂອງພວກເຈົ້າ ເຮົາຈະໄດ້ຫລົບມາຫາພວກເຈົ້າອີກ. 23.ເອປາຟຣັດຜູ້ຖືກຄຸກກັບເຮົາ ໃນພຣະກຣິສໂຕເຢຊູ ຝາກຄວາມຢາມເຈົ້າ. 24.ມັກໂກ, ອາຣິດສະຕັກ, ເດມາ ແລະລູກາ ເພື່ອນຮ່ວມງານຂອງເຮົາ ກໍຝາກຄວາມຢາມເຈົ້າດ້ວຍ. 25.ຂໍພຣະຄຸນຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ ສະຖິດຢູ່ກັບພວກເຈົ້າທຸກຄົນເທີ້ນ.