ໜ້າທີ່ຂອງພວກສັດຕະບຸຣຸດ

1.ຈົ່ງເຕືອນທຸກຄົນໃຫ້ນອບນ້ອມຕໍ່ເຈົ້ານາຍ, ຕໍ່ອຳນາດອາດຍາສິດ, ໃຫ້ເຊື່ອຟັງແລະພ້ອມຢູ່ສະເໝີທີ່ຈະທຳວຽກການດີທຸກຢ່າງ. 2.ຢ່າໃຫ້ກ່າວຮ້າຍປ້າຍສີໃສ່ຜູ້ໃດ, ຢ່າໃຫ້ມີຜິດຖຽງກັນ, ໃຫ້ຮູ້ຈັກເອົາອົກເອົາໃຈກັນ, ສະແດງຄວາມອ່ອນຫວານຕໍ່ທຸກຄົນສະເໝີໄປ 3.ຍ້ອນວ່າ ແຕ່ກ່ອນພວກເຮົາກໍເຄີຍເປັນຄົນໂງ່ງ່າວເບົາປັນຍາ, ເປັນຄົນດື້ດ້ານ, ຫລົງຜິດ, ເປັນຂ້ອຍທາດຂອງກິເລດຕັນຫາແລະຄວາມສະໜຸກສະໜານຕ່າງໆ, ມີໃຈໂຫດຮ້າຍແລະຫຶງສາ, ເປັນຕາຊັງ ແລະຄຽດຊັງກັນ, 4.ແຕ່ເມື່ອນ້ຳພຣະໄທດີແລະຄວາມຮັກຕໍ່ມະນຸດທັງຫລາຍຂອງພຣະເຈົ້າ ພຣະຜູ້ບັນດານຄວາມຮອດຂອງພວກເຮົາ ໄດ້ປາກົດອອກມາແລ້ວ, 5.ພຣະອົງກໍໄດ້ຊ່ວຍພວກເຮົາໃຫ້ຮອດ, ບໍ່ແມ່ນຍ້ອນເຫັນແກ່ບຸນກຸສົນທີ່ພວກເຮົາເອງໄດ້ກະທຳ, ແຕ່ຍ້ອນເຫັນແກ່ພຣະເມດຕາຂອງພຣະອົງ, ໂດຍອາໄສການຊຳຣະລ້າງບັນດານຊີວິດໃໝ່ ແລະການຟື້ນຟູຂຶ້ນໃໝ່ ຊຶ່ງພຣະຈິດເຈົ້າບັນດານໃຫ້ເກີດມີຂຶ້ນ. 6.ພຣະອົງໄດ້ປະທານພຣະຈິດນີ້ໃຫ້ພວກເຮົາຢ່າງເຕັມພຽບ ເດຊະພຣະເຢຊູກຣິສໂຕ, ພຣະຜູ້ບັນດານຄວາມຮອດຂອງພວກເຮົາ, 7.ເພື່ອວ່າ ເມື່ອໃດໄດ້ເປັນຜູ້ຊອບທຳດ້ວຍອາໄສພຣະຄຸນຂອງພຣະອົງແລ້ວ, ພວກເຮົາກໍມີຫວັງຈະໄດ້ຊີວິດນິຣັນດອນ ມາເປັນມໍລະດົກ. 8.ຄຳເວົ້ານີ້ເປັນໜ້າເຊື່ອຖືໄດ້, ເຮົາຢາກໃຫ້ເຈົ້າເວົ້າເນັ້ນເຖິງເລື່ອງນີ້ຢູ່ສະເໝີ ເພື່ອໃຫ້ຜູ້ທີ່ເຊື່ອໃນພຣະເຈົ້າ ໄດ້ເອົາໃຈໃສ່ທຳກິດຈະການດີ. ນີ້ແຫລະ ແມ່ນສິ່ງທີ່ຈົບງາມແລະເປັນປະໂຫຍດແກ່ໝົດທຸກຄົນ. 9.ເຈົ້າຢ່າຫຍຸ້ງກ່ຽວໃນເລື່ອງການຄົ້ນຄວ້າທີ່ໄຮ້ປະໂຫຍດ, ເລື່ອງເຊື້ອພົງວົງຕະກຸນ, ການຜິດຖຽງ ແລະການຂັດແຍ່ງບໍ່ລົງຮອຍກັນ ກ່ຽວກັບພຣະບັນຢັດ, ຍ້ອນມັນເປັນຂອງບໍ່ມີປະໂຫຍດ ແລະເສຍແຮງລ້າໆ. 10.ເມື່ອໄດ້ເຕືອນຜູ້ທີ່ມັກຍົວະຜູ້ອື່ນໃຫ້ເຊື່ອຜິດ ເຖິງສອງເທື່ອແລ້ວ ຍັງບໍ່ຟັງ, ກໍຢ່າໄປກ່ຽວຂ້ອງກັບມັນອີກ. 11.ເຈົ້າກໍຮູ້ດີວ່າ ຄົນແບບນີ້ເປັນຄົນແຕກຄອກ, ຄົນບາບ. ມັນຕັດສິນລົງໂທດມັນເອງແລ້ວ.

ຄຳສັ່ງສຸດທ້າຍ ແລະຄຳອຳລາ

12.ເມື່ອເຮົາຈະໄດ້ສົ່ງອັກເຕມາຫລືຕີກີໂກ ມາຫາເຈົ້າແລ້ວ, ໃຫ້ເຈົ້າຮີບໄປຫາເຮົາຢູ່ເມືອງນີໂກໂປລີ, ຍ້ອນເຮົາຕັ້ງໃຈຈະໄປພັກເຊົາຢູ່ທີ່ນັ້ນຕະຫລອດຍາມໜາວ. 13.ຈົ່ງຈັດແຈງໃຫ້ເຊນາ ຜູ້ເປັນທະນາຍຄວາມ ແລະອາປອນໂລ ໄດ້ຮັບຄວາມສະດວກສະບາຍໃນການເດີນທາງ ບໍ່ໃຫ້ຂາດເຂີນຫຍັງ. 14.ພວກໝູ່ໄທເຮົາກໍຄືກັນ, ຕ້ອງຮຽນໃຫ້ຮູ້ຈັກທຳກິດຈະການດີທະວີຂຶ້ນ ເພື່ອຊ່ວຍຜູ້ຂັດສົນໃນຄາວຈຳເປັນ. ດັ່ງນີ້ ເຂົາເຈົ້າຈຶ່ງຈະບໍ່ເປັນຄົນໄຮ້ປະໂຫຍດ. 15.ທຸກຄົນທີ່ຢູ່ນຳເຮົາຝາກຄວາມຢາມເຈົ້າ. ຂໍຝາກຄວາມຢາມພວກທີ່ຮັກເຮົາໃນຄວາມເຊື່ອ. ຂໍພຣະຄຸນຈົ່ງສະຖິດຢູ່ນຳພວກພີ່ນ້ອງທຸກຄົນເທີ້ນ.