ຄຳເຕືອນສຳລັບແຕ່ລະຊັ້ນວັນນະ

1.ສ່ວນເຈົ້າ, ຈົ່ງສັ່ງສອນສິ່ງທີ່ກົງກັບພຣະທຳອັນຖືກຕ້ອງ. 2.ຂໍໃຫ້ພວກຊາວເຖົ້າຮູ້ຈັກປະມານຕົນ, ເປັນທີ່ໜ້ານັບຖື, ມີຄວາມຮອບຄອບ, ປ່ຽມດ້ວຍຄວາມເຊື່ອ, ຄວາມຮັກ ແລະຄວາມພາກພຽນ. 3.ສ່ວນພວກຜູ້ຍິງເຖົ້າກໍດັ່ງດຽວກັນ, ຂໍໃຫ້ປະພຶດຕົວສົມກັບເປັນຄົນສັກສິດ: ຢ່ານິນທາໃສ່ຄວາມ, ຕິດເຫລົ້າເກີນໄປ, ແຕ່ຂໍໃຫ້ເປັນຜູ້ສັ່ງສອນຄວາມດີ, 4.ເພື່ອຈະໄດ້ສອນພວກແມ່ເຮືອນໜຸ່ມ ໃຫ້ຮູ້ຈັກຮັກແພງຜົວແລະລູກເຕົ້າຂອງຕົນ, 5.ຮູ້ຈັກສະຫງ່ຽມຈຽມຕົວ, ມີຄວາມບໍລິສຸດ, ເອົາໃຈໃສ່ເບິ່ງແຍງເຮືອນຊານຂອງຕົນ, ມີໃຈເມດຕາ, ນອບນ້ອມຕໍ່ສາມີ ເພື່ອບໍ່ໃຫ້ມີໃຜປະໝາດປະຈານພຣະວາຈາຂອງພຣະເຈົ້າໄດ້.

ສຳລັບພວກໜຸ່ມນ້ອຍ

6.ເຈົ້າຍັງຕ້ອງຕຸກເຕືອນພວກຊາຍໜຸ່ມ ໃຫ້ຮູ້ຈັກປະມານຕົນ 7.ໃນທຸກສິ່ງທຸກຢ່າງ ໃຫ້ເຈົ້າສະແດງຕົວເປັນແບບ ດ້ວຍວ-ກການດີຄື ໃຊ້ຫລັກທຳອັນແທ້ຈິງມາສອນ, ເປັນທີ່ໜ້ານັບຖື, 8.ປາກເວົ້າມີຫລັກຖານ ແລະບໍ່ມີໃຜຕ້ອງຕິໄດ້, ເພື່ອໃຫ້ຝ່າຍກົງຂ້າມໄດ້ຮັບຄວາມອັບອາຍ ຍ້ອນບໍ່ມີທາງກ່າວຮ້າຍປ້າຍສີໃສ່ພວກເຮົາໄດ້.

ພວກທີ່ເປັນຂ້ອຍທາດ

9.ຈົ່ງຕຸກເຕືອນພວກເປັນຂ້ອຍທາດ ໃຫ້ນົບນອບເຊື່ອຟັງນາຍໃນທຸກຢ່າງ, ໃຫ້ທຳສິ່ງທີ່ຊອບໃຈນາຍ, ຢ່າຖຽງຄວາມເພິ່ນ, 10.ຢ່າໄວມື, ແຕ່ໃຫ້ເປັນຄົນສັດຊື່ຢູ່ສະເໝີ. ເມື່ອທຳດັ່ງນີ້ ແລ້ວ, ເຂົາກໍຈະໃຫ້ກຽດແດ່ພຣະທຳຂອງພຣະເຈົ້າ ພຣະຜູ້ບັນດານຄວາມຮອດຂອງເຮົາໃນທຸກຢ່າງ. 11.ຍ້ອນວ່າພຣະຄຸນຂອງພຣະເຈົ້າ, ຊຶ່ງເປັນທໍ່ທານບັນດານຄວາມຮອດໃຫ້ແກ່ມະນຸດທຸກຄົນນັ້ນ ໄດ້ປາກົດອອກມາຢ່າງຈະແຈ້ງແລ້ວ, 12.ແລະສັ່ງສອນພວກເຮົາໃຫ້ປະຖິ້ມຄວາມອະທຳ ແລະຄວາມມັກໄດ້ຂອງໂລກ ເພື່ອໃຫ້ພວກເຮົາຈະເລີນຊີວິດຢູ່ໃນໂລກປັດຈຸບັນດ້ວຍຮູ້ຈັກປະມານຕົວ, ມີຄວາມຍຸຕິທຳແລະຄວາມສັດທາ, 13.ພ້ອມທັງຄອງຖ້າຄວາມສຸກຍອດປາດຖະໜາ ແລະການປະຈັກມາຢ່າງຮຸ່ງເຮືອງຂອງພຣະເຈົ້າຜູ້ຍິ່ງໃຫຍ່ ແລະພຣະຜູ້ບັນດານຄວາມຮອດຂອງພວກເຮົາ ຄືພຣະເຢຊູກຣິສໂຕເຈົ້າ, 14.ຜູ້ຊົງມອບພຣະອົງເອງເພື່ອພວກເຮົາ ເປັນການກູ້ໄຖ່ພວກເຮົາໃຫ້ພົ້ນຈາກຄວາມອະທຳທຸກຢ່າງ, ເປັນການຊຳຣະປະຊາກອນພວກໜຶ່ງທີ່ເປັນຂອງພຣະອົງເອງ ໃຫ້ບໍລິສຸດຜຸດຜ່ອງ, ແລະມີໃຈຮ້ອນຮົນໃນການທຳຄວາມດີ. 15.ເຈົ້າຕ້ອງເອົາຂໍ້ຄວາມດັ່ງກ່າວນີ້ໄປເວົ້າ, ໄປເຕືອນ ແລະບອກສອນຢ່າງມີອຳນາດແທ້. ຢ່າໃຫ້ໃຜປະໝາດດູໝິ່ນເຈົ້າໄດ້.