ຈົດໝາຍຂອງນັກບຸນເປົາໂລຂຽນເຖິງຕີໂຕ

ຄຳນັບຖາມຂ່າວ

1.ຈາກເປົາໂລ ຂ້າໃຊ້ຂອງພຣະເຈົ້າ, ອັກຄະທຳມະທູດຂອງພຣະເຢຊູກຣິສໂຕ ເພື່ອຊ່ວຍພວກທີ່ພຣະເຈົ້າເລືອກສັນ ໃຫ້ກ້າວໜ້າໃນຄວາມເຊື່ອ ແລະຄວາມຮູ້ເລື່ອງຄວາມຈິງ ຢ່າງຖືກຕ້ອງກັບຄວາມສັດທາ, 2.ໂດຍຫວັງວ່າຈະໄດ້ຊີວິດນິຣັນດອນ ຊຶ່ງພຣະເຈົ້າຜູ້ບໍ່ຕົວະຫລອກ ໄດ້ຊົງສັນຍາໄວ້ແຕ່ເດິກດຳບັນ, 3.ແລະເມື່ອເຖິງເວລາທີ່ໄດ້ກຳນົດໄວ້, ກໍຊົງສຳແດງພຣະວາຈາຂອງພຣະອົງອອກມາໃນການປ່າວປະກາດ ຊຶ່ງເຮົາເອງໄດ້ຮັບມອບໝາຍຕາມຄຳສັ່ງຂອງພຣະເຈົ້າ, ພຣະຜູ້ບັນດານຄວາມຮອດຂອງພວກເຮົາ. 4.ເຖິງຕີໂຕ, ລູກທີ່ຮັກໃນຄວາມຮັກອັນດຽວກັນ. ຂໍພຣະຄຸນແລະສັນຕິສຸກທີ່ມາຈາກພຣະເຈົ້າພຣະບິດາ ແລະຈາກພຣະເຢຊູກຣິສໂຕພຣະຜູ້ບັນດານຄວາມຮອດຂອງພວກເຮົາ, ຈົ່ງມີແດ່ເຈົ້າເທີ້ນ.

ໜ້າທີ່ຂອງຕີໂຕ

5.ເຮົາປະເຈົ້າໄວ້ຢູ່ດອນເກຣເຕ ກໍເພື່ອຈັດແຈງວຽກການທີ່ຍັງບໍ່ຮຽບຮ້ອຍນັ້ນໃຫ້ສຳເລັດໄປ ແລະເພື່ອແຕ່ງຕັ້ງພວກເຖົ້າແກ່ໄວ້ໃນທຸກຫົວເມືອງຕາມທີ່ເຮົາໄດ້ສັ່ງເຈົ້າໄວ້. 6.ຜູ້ໄດ້ຮັບແຕ່ງຕັ້ງ ຕ້ອງເປັນຜູ້ບໍ່ມີບ່ອນຕິ, ແຕ່ງງານເທື່ອດຽວ, ມີລູກເຕົ້າທີ່ມີຄວາມເຊື່ອ ແລະບໍ່ຖືກໃຜກ່າວຫາວ່າເປັນນັກເລງ ຫລືຫົວດື້ ບໍ່ຍອມຟັງຄວາມພໍ່ແມ່. 7.ຍ້ອນວ່າ ຜູ້ເປັນສັງຄະຣາດ ຊຶ່ງມີຖານະເປັນຜູ້ຈັດການຂອງພຣະເຈົ້ານັ້ນ ຕ້ອງເປັນຜູ້ດີ ບໍ່ມີຕ້ອງຕິ ບໍ່ຈອງຫອງ, ບໍ່ໃຈຮ້າຍ, ບໍ່ກິນເຫລົ້າເມົາຢາ, ບໍ່ມັກຜິດຖຽງ ຫລືໂລພາມັກໄດ້, 8.ແຕ່ເປັນຜູ້ຮູ້ຈັກຮັບແຂກຄົນ, ຮັກຫອມຄວາມດີ, ມີຄວາມຮອບຄອບ, ຍຸຕິທຳ, ສັກສິດ ແລະຮູ້ຈັກປະມານຕົນ, 9.ໜຽວແໜ້ນຢູ່ໃນພຣະທຳຄຳສອນທີ່ແນ່ນອນ ກົງຕາມທີ່ໄດ້ຮຽນຮູ້ມາ. ດັ່ງນີ້ເຂົາຈຶ່ງຈະສາມາດຕຸກເຕືອນຜູ້ອື່ນ ດ້ວຍຫລັກທຳອັນຖືກຕ້ອງ ແລະສາມາດຕໍ່ສູ້ກັບຝ່າຍກົງຂ້າມໄດ້.

ພວກອາຈານທຽມ

10.ຍ້ອນມີຫລາຍຄົນຫົວແຂງ ບໍ່ຍອມອ່ອນນ້ອມ, ປາກຈາບໍ່ມີເຫດຜົນ ທັງຕົວະຫລອກດ້ວຍ, ເປັນຕົ້ນຢູ່ໃນພວກທີ່ຮັບສິນຕັດແລ້ວ. 11.ຈົ່ງງັບປາກຊຸມນີ້ໄວ້; ເຂົາເຈົ້າກໍ່ຄວາມວຸ້ນວາຍໃນຄອບຄົວຕ່າງໆ ໂດຍເອົາສິ່ງທີ່ບໍ່ຄວນມາສັ່ງສອນ ເພື່ອຫາກຳໄລໃນທາງທຸຈະລິດ. 12.ຜູ້ໜຶ່ງໃນພວກເຂົາ ຊຶ່ງເປັນປະພາສົກ ໄດ້ເວົ້າວ່າ: “ຊາວດອນເກຣເຕ ເປັນຄົນຂີ້ຕົວະຢູ່ສະເໝີ, ມີໃຈໂຫດຮ້າຍຢ່າງສັດ, ເປັນຄົນຂີ້ຄ້ານ ກິນຫລາຍ” 13.ຄຳທີ່ເວົ້າອ້າງມານີ້ເປັນຄວາມຈິງ. ດ້ວຍເຫດນີ້ ຈົ່ງຕິຮ້າຍເຂົາຢ່າງໜັກເພື່ອໃຫ້ເຂົາມີຄວາມເຊື່ອອັນຖືກຕ້ອງ, 14.ບໍ່ໃຫ້ຕິດໃຈນຳພື້ນຕ່າງໆຂອງຊາວຢິວ ແລະຂໍ້ບັນຢັດຂອງມະນຸດ ທີ່ຜິດແປກກັບຄວາມຈິງ 15.ທຸກສິ່ງເປັນຂອງບໍລິສຸດ. ແຕ່ສຳລັບຄວາມເປື້ອນເປິແລະບໍ່ຍອມເຊື່ອນັ້ນ, ບໍ່ມີຫຍັງສະອາດຈັກຢ່າງ. ກົງຂ້າມ ສະຕິປັນຍາແລະມະໂນທຳຂອງເຂົາກໍເປື້ອນເປິໄປໝົດ. 16.ພວກເຂົາປະກາດວ່າຮູ້ຈັກພຣະເຈົ້າ, ແຕ່ປະຕິເສດພຣະອົງໃນຄວາມປະພຶດ. ເຂົາເປັນຄົນຕາຊັງ, ແຂງຂໍ້, ແລະບໍ່ສາມາດທຳຄວາມດີຫຍັງໄດ້ເລີຍ.