ຈົ່ງປະກາດພຣະວາຈາ

1.ເຮົາຂໍສັ່ງເຈົ້າຕໍ່ພຣະພັກພຣະເຈົ້າ ແລະຕໍ່ພຣະພັກພຣະເຢຊູກຣິສໂຕ ຜູ້ຈະພິພາກສາຜູ້ເປັນແລະຜູ້ຕາຍ, ເດຊະການປະຈັກມາແລະພຣະຣາໄຊຂອງພຣະອົງ ຄື 2.ໃຫ້ເຈົ້າປະກາດພຣະວາຈາຊ້ຳໄປຊ້ຳມາ, ທັງໃນແລະນອກໂອກາດອັນເໝາະສົມ, ຈົ່ງຕິຕຽນ, ຕຸກເຕືອນ, ສັ່ງສອນດ້ວຍຄວາມພາກພຽນອົດທົນ ແລະມຸ່ງຫວັງຢາກບອກສອນສະເໝີ. 3.ຍ້ອນວ່າ ຈະມີມື້ໜຶ່ງ ທີ່ຄົນທັງຫລາຍຈະບໍ່ຍອມຮັບທົນຄຳສອນອັນຖືກຕ້ອງນີ້ອີກຕໍ່ໄປ, ແຕ່ຈະຊອກຫາຄູອາຈານໄວ້ມາກມາຍ ເພື່ອສັ່ງສອນສິ່ງທີ່ຟັງມ່ວນຫູແລະຖືກອົກຖືກໃຈເທົ່ານັ້ນ. 4.ພວກເຂົາຈະປິ່ນຫູໜີຈາກຄວາມຈິງ ເພື່ອໄປຟັງພື້ນຕ່າງໆ. 5.ສ່ວນເຈົ້າ, ຈົ່ງຮູ້ຈັກປະມານຕົນໃນທຸກຢ່າງ, ສູ້ທົນຄວາມຍາກລຳບາກ, ທຳໜ້າທີ່ຜູ້ປະກາດພຣະວໍຣະສານ ແລະເອົາໃຈໃສ່ໃນໜ້າທີ່ການຂອງຕົນຢ່າງຄົບຖ້ວນ. 6.ສ່ວນເຮົາເອງ, ບັດນີ້ເຮົາກຳລັງຈະຖະຫວາຍຕົວເປັນສິນບູຊາຢູ່ແລ້ວ ແລະເວລາທີ່ເຮົາຈະຈາກໄປກໍມາເຖິງແລ້ວດ້ວຍ. 7.ເຮົາໄດ້ຕໍ່ສູ້ຢ່າງສຸດຄວາມສາມາດ, ໄດ້ແລ່ນຈົນສຸດເສັ້ນທາງ ແລະໄດ້ຮັກສາຄວາມເຊື່ອໄວ້. 8.ດຽວນີ້ເຮົາມີແຕ່ຄອງຖ້າຮັບມຸງກຸດແຫ່ງຄວາມທ່ຽງທຳ ຊຶ່ງພຣະອົງເຈົ້າ ອົງຕຸລາການຜູ້ຍຸຕິທຳ ຈະມອບໝາຍໃຫ້ເຮົາໃນວັນນັ້ນ, ບໍ່ແມ່ນແຕ່ຈະມອບໃຫ້ເຮົາເທົ່ານັ້ນ, ແຕ່ຍັງຈະມອບໃຫ້ທຸກຄົນທີ່ຄອງຖ້າການສະເດັດກັບມາໃໝ່ຂອງພຣະອົງດ້ວຍຄວາມຮັກນັ້ນອີກດ້ວຍ.

ຄຳສັ່ງສຸດທ້າຍ

9.ຈົ່ງຮ້ອນໃຈໄປຫາເຮົາໄວໆ. 10.ຍ້ອນວ່າເດມາໄດ້ປະເຮົາໜີໄປແລ້ວ ຍ້ອນເຂົາຜູກພັນນຳໂລກນີ້ ແລະອອກເດີນທາງໄປແຂວງເທຊາໂລນິກແລ້ວ. ກະເລັດແຊັນໄປແຂວງກາລາຊີອາ ຕີໂຕໄປແຂວງດັນມາຊີອາ 11.ຍັງແຕ່ລູກາຜູ້ດຽວຢູ່ນຳເຮົາ. ເວລາໄປ ໃຫ້ເອົາມັກໂກໄປນຳດ້ວຍ ຍ້ອນເພິ່ນມີປະໂຫຍດຫລາຍສຳລັບເຮົາໃນໜ້າທີ່ສົງ. 12.ເຮົາໄດ້ສົ່ງຕີກີໂກໄປເມືອງເອເຟໂຊແລ້ວ. 13.ຢ່າລືມແວ່ເອົາເສື້ອຄຸມທີ່ເຮົາປະໄວ້ຢູ່ເຮືອນກາລະໂປໃຫ້ແດ່, ພ້ອມທັງໜັງສືຕ່າງໆ ເປັນຕົ້ນໜັງສືແຜ່ນໜັງ. 14.ນາຍອາແລັກຊັງຊ່າງຫລອມ ໄດ້ສະແດງທ່າທາງໂຫດຮ້າຍຕໍ່ເຮົາຫລາຍຢ່າງ. ພຣະອົງເຈົ້າຈະຊົງຕອບແທນຕາມວຽກການທີ່ເຂົາທຳ. 15.ເຈົ້າກໍຄືກັນ, ຈົ່ງລະວັງເຂົາໃຫ້ດີ, ຍ້ອນເຂົາຕໍ່ສູ້ຂັດຄ້ານຄວາມປາກຄວາມເວົ້າຂອງພວກເຮົາຢ່າງຮ້າຍແຮງ. 16.ເມື່ອເຮົາໄປສູ້ຄວາມທຳອິດນັ້ນ, ບໍ່ມີໃຜມາສະໜັບສະໜຸນ ເຮົາ, ທຸກຄົນປະຖິ້ມເຮົາ. ຂໍພຣະເຈົ້າຢ່າໄດ້ຖືໂທດເຂົາໃນເລື່ອງນີ້. 17.ພຣະອົງເຈົ້າເອງໄດ້ຄ້ຳຊູແລະປະທານກຳລັງໃຫ້ເຮົາຢ່າງເຕັມພຽບ ເພື່ອເຮົາຈະໄດ້ປະກາດພຣະວໍຣະສານທັງໝົດ ໃຫ້ນານາຊາດທັງຫລາຍໄດ້ຍິນຈົນທົ່ວເຖິງກັນ ແລະເຮົາກໍໄດ້ພົ້ນຈາກປາກສິງມາໄດ້. 18.ພຣະອົງເຈົ້າຈະຊ່ວຍເຮົາໃຫ້ຫວິດຈາກກິດຈະການອັນຊົ່ວຮ້າຍທັງຫລາຍ ແລະຍັງຈະຊ່ວຍໃຫ້ຮອດ ເຂົ້າສູ່ອານາຈັກສະຫວັນຂອງພຣະອົງດ້ວຍ. ສີມຸງຄຸນຈົ່ງມີແດ່ພຣະອົງ ຕະຫລອດນິຣັນດອນເທີ້ນ. ອາແມນ.

ສັ່ງອຳລາ

19.ຂໍຝາກຄວາມຢາມປຣິດສະກາແລະອາກວີລາ ພ້ອມທັງຄອບຄົວຂອງໂອເນຊີຟໍດ້ວຍ. 20.ເອລັດໂຕຍັງຢູ່ເມືອງໂກຣິນໂທ. ສ່ວນໂຕຣຟີໂມນັ້ນ ຍັງບໍ່ສະບາຍ ຈຶ່ງໄດ້ປະໄວ້ຢູ່ມືອງມີເລ. 21.ຈົ່ງພະຍາຍາມໄປກ່ອນລະດູໜາວ. ເອີບູໂລ, ປູແດນ, ໂກລດີອາ ແລະພວກພີ່ນ້ອງທຸກຄົນຝາກຄວາມຢາມເຈົ້າ. 22.ຂໍພຣະອົງເຈົ້າສະຖິດຢູ່ໃນຈິດໃຈຂອງເຈົ້າ. ຂໍພຣະຄຸນຈົ່ງສະຖິດຢູ່ນຳພວກທ່ານທຸກຄົນເທີ້ນ.