ໃຫ້ລະວັງໄພໃນວາລະສຸດທ້າຍ

1.ຈົ່ງຮູ້ເລື່ອງນີ້ໄວ້ໃຫ້ດີຄື ໃນວາລະສຸດທ້າຍນັ້ນ ຈະເກີດມີຄວາມຫຍຸ້ງຍາກນານາປະການ ອຸບັດຂຶ້ນ. 2.ມະນຸດຈະເປັນຄົນໃຈແຄບ ເຫັນແກ່ຕົວ, ມັກແຕ່ເງິນທອງເຂົ້າຂອງ, ອວດຕົວ, ຈອງຫອງ, ມັກດ່າວ່າ, ບໍ່ເຊື່ອຟັງພໍ່ແມ່, ເນລະຄຸນ, ບໍ່ມີສິນທຳປະຈຳໃຈ, 3.ບໍ່ມີຫົວໃຈ, ບໍ່ມີເມດຕາ, ເວົ້າຮ້າຍປ້າຍສີໃສ່ກັນ, ບໍ່ມີກົດລະບຽບ, ດຸຮ້າຍດັ່ງສັດ, ເປັນສັດຕູກັບຄວາມດີງາມ 4.ເປັນຄົນທໍລະຍົດ: ດື້ດ້ານ, ຫົວສູງ, ມັກຄວາມສະໜຸກຫລາຍກວ່າມັກພຣະເປັນເຈົ້າ. 5.ສັດທາແຕ່ພາຍນອກ, ແຕ່ແກ່ນແທ້ຂອງຄວາມສັດທານັ້ນ ບໍ່ມີ. ເຈົ້າຕ້ອງຫລີກເວັ້ນຄົນພວກນີ້ດ້ວຍ. 6.ຍ້ອນຄົນພວກນີ້ມີພວກລູກສະໝຸນ ຄືພວກທີ່ແອບແຝງເຂົ້າໄປຕາມບ້ານເຮືອນ ແລະກ້ຽວກ່ອມເອົາພວກຜູ້ຍິງທີ່ເບົາປັນຍາ, ໜາດ້ວຍບາບໂທດ, ແລະທີ່ຕົກເປັນຂ້ອຍທາດຂອງລາຄະຕັນຫາຕ່າງໆນັ້ນ ໄປນຳດ້ວຍ. 7.ພວກຜູ້ຍິງເຫລົ່ານີ້ກໍຢາກຮຽນຢາກຮູ້ສະເໝີ, ແຕ່ບໍ່ສາມາດຮູ້ຈັກຄວາມຈິງໄດ້ເລີຍ. 8.ຊັນເນແລະຊຳບາເລ ໄດ້ຂັດສູ້ກັບໂມແຊແຕ່ກ່ອນຢ່າງໃດ, ຄົນພວກນັ້ນກໍຂັດສູ້ຄວາມຈິງຢ່າງນັ້ນດ້ວຍ. ເຂົາເຈົ້າເປັນຄົນມີໃຈຊົ່ວຊາມ ແລະຄວາມເຊື່ອຂອງເຂົາກໍໃຊ້ການບໍ່ໄດ້. 9.ແຕ່ພວກເຂົາຈະກ້າວໜ້າໄປໄກອີກບໍ່ໄດ້ເລີຍ, ຍ້ອນຄວາມໂງ່ຂອງພວກເຂົານັ້ນ ຈະປາກົດແຈ້ງອອກມາໃຫ້ທຸກຄົນເຫັນ, ດັ່ງທີ່ໄດ້ເປັນມາແກ່ສອງຄົນນັ້ນແລ້ວ. 10.ສ່ວນເຈົ້າ, ເຈົ້າໄດ້ຖືຕາມຄຳສອນຂອງເຮົາຢ່າງສຸດອົກສຸດໃຈ, ໄດ້ປະພຶດຕາມຢ່າງເຮົາ, ມີແຜນການ, ມີຄວາມເຊື່ອ, ຄວາມອົດທົນ, ຄວາມຮັກແລະຄວາມໝັ້ນໜຽວຄືເຮົາ. 11.ໃນການຖືກບັງບຽດແລະຖືກທໍຣະມານຕ່າງໆທີ່ເຮົາໄດ້ຮັບຢູ່ເມືອງອັນຕີໂອເກຍ, ອີໂກນີອຸມແລະເມືອງລິດ. ມີການບັງບຽດຫຍັງແດ່ທີ່ເຮົາບໍ່ໄດ້ຮັບບໍ? ແລະພຣະອົງເຈົ້າໄດ້ຊ່ວຍເຮົາໃຫ້ຫວິດພົ້ນໄປທັງໝົດ.

12.ຕາມຈິງແລ້ວ, ທຸກຄົນທີ່ຢາກຈຳເລີນຊີວິດຢ່າງສັດທາໃນພຣະເຢຊູກຣິສໂຕເຈົ້ານັ້ນ, ຈະຕ້ອງຖືກບັງບຽດຂົ່ມເຫັງ. 13.ສ່ວນພວກຄົນຊົ່ວແລະຄົນແປກປອມນັ້ນຈະຕ້ອງເສື່ອມຊາມລົງເລື້ອຍໆ, ເຂົາຫາທາງລວງຜູ້ອື່ນໃຫ້ຫລົງຜິດ, ແລ້ວເຂົາເອງກໍຖືກລວງໄປດ້ວຍ. 14.ສ່ວນເຈົ້າເອງ, ຈົ່ງຢຶດຖືສິ່ງທີ່ເຈົ້າໄດ້ຮຽນຮູ້ ແລະໄດ້ຮັບມາຢ່າງແນ່ນອນນັ້ນ ໄວ້ໃຫ້ໝັ້ນຄົງຕໍ່ໄປ. ເຈົ້າກໍຮູ້ດີແລ້ວວ່າ ເຈົ້າໄດ້ຄວາມຮູ້ນີ້ມາຈາກຜູ້ໃດ. 15.ຕັ້ງແຕ່ນ້ອຍ ເຈົ້າກໍຮູ້ຈັກພຣະຄຳພີ ຊຶ່ງໄດ້ໃຫ້ຄວາມສະຫລາດແກ່ເຈົ້າເພື່ອບັນລຸເຖິງຄວາມຮອດ ດ້ວຍອາໄສຄວາມເຊື່ອໃນພຣະກຣິສໂຕເຈົ້າ. 16.ພຣະຄຳພີທັງໝົດໄດ້ຮັບການດົນໃຈຈາກພຣະເຈົ້າ, ແລະມີປະໂຫຍດສຳລັບສອນ, ຕຸກເຕືອນ, ແກ້ຄວາມຫລົງຜິດ ແລະອົບຮົມໃຫ້ບັນລຸເຖິງຄວາມຊອບທຳ. 17.ອາໄສພຣະຄຳພີ, ຄົນຂອງພຣະເຈົ້າຈະພຽບພ້ອມດ້ວຍຄຸນນະທຳ ເພື່ອຈະທຳກິດຈະການອັນດີງາມທຸກຢ່າງ.