ຈົ່ງຮັບເອົາຄວາມທຸກຍາກລຳບາກ ທີ່ເປັນສ່ວນຂອງເຈົ້າ

1.ລູກທີ່ຮັກ, ຈົ່ງບຳເພັນຕົນໃຫ້ເຂັ້ມແຂງໃນພຣະຄຸນຂອງພຣະເຢຊູກຣິສໂຕ. 2.ສ່ວນເລື່ອງທີ່ເຈົ້າໄດ້ຟັງເຮົາສອນຕໍ່ໜ້າພິຍານຫລາຍຄົນນັ້ນ, ຈົ່ງມອບໃຫ້ພວກທີ່ໄວ້ເນື້ອເຊື່ອໃຈໄດ້ ແລະສາມາດເອົາໄປສິດສອນຜູ້ອື່ນໄດ້ດ້ວຍ. 3.ຈົ່ງຮັບເອົາຄວາມທຸກທໍຣະມານອັນເປັນສ່ວນຂອງເຈົ້າ ດັ່ງທະຫານຂອງພຣະກຣິສໂຕເຢຊູ. 4.ບໍ່ມີຜູ້ໃດ ເມື່ອສະໝັກເຂົ້າຮັບໃຊ້ໃນກອງທັບແລ້ວ ຍັງຈະໄປຫຍຸ້ງກ່ຽວກັບວຽກພົນລະເຮືອນອີກ, ຖ້າຫາກເຂົາຢາກໃຫ້ຜູ້ທີ່ເກນເອົາໄປນັ້ນ ມີຄວາມພໍອົກພໍໃຈ. 5.ໃນການແຂ່ງຂັນກິລາກໍດັ່ງດຽວກັນ, ຖ້ານັກກິລາໃດບໍ່ຖືຕາມກະຕິກາແລ້ວ, ເຂົາກໍຈະບໍ່ໄດ້ຮັບພວງມາໄລ. 6.ພວກຊາວໄຮ່ຊາວນາທີ່ທຳງານຢ່າງເໜື່ອຍອ່ອນ ກໍຕ້ອງໄດ້ຮັບສ່ວນໝາກຜົນນັ້ນກ່ອນຜູ້ອື່ນໝົດ. 7.ຈົ່ງເຂົ້າໃຈຄວາມເວົ້າຂອງເຮົາໃຫ້ດີ. ສ່ວນທີ່ເຫລືອ, ແມ່ນພຣະອົງເຈົ້າຈະຊ່ວຍໃຫ້ເຈົ້າເຂົ້າໃຈທຸກຢ່າງ.

ຈົ່ງລະລຶກເຖິງພຣະເຢຊູຜູ້ໄດ້ກັບຄືນຊີບ

8.ຈົ່ງລຳລຶກເຖິງພຣະເຢຊູກຣິສໂຕເຈົ້າ ຜູ້ສືບເຊື້ອສາຍຈາກກະສັດດາວິດ, ຜູ້ຊົງກັບຄືນຊີບຈາກພວກຜູ້ຕາຍ ຕາມພຣະວໍຣະສານທີ່ເຮົາປະກາດ. 9.ແມ່ນເພື່ອພຣະວໍຣະສານນີ້ແຫລະ ເຮົາຈຶ່ງໄດ້ຮັບທຸກຍາກລຳບາກຈົນເຖິງຕ້ອງຖືກໂສ້ຄືຄົນຮ້າຍ. ແຕ່ພຣະວາຈາຂອງພຣະເຈົ້າບໍ່ໄດ້ຖືກໃຜມັດໂສ້ໄວ້ດອກ. 10.ດ້ວຍເຫດນີ້ ເຮົາຈຶ່ງຍອມທຸກຍາກລຳບາກຕ່າງໆເພື່ອພວກເລືອກສັນ ເພື່ອໃຫ້ພວກເຂົາໄດ້ຮັບຄວາມຮອດ ຊຶ່ງຢູ່ໃນພຣະເຢຊູກຣິສໂຕເຈົ້າ ພ້ອມກັບສີມຸງຄຸນນິຣັນດອນດ້ວຍ.

11.ຂໍ້ຄວາມຕໍ່ໄປນີ້ຈິງແທ້ຄື: ຖ້າພວກເຮົາຕາຍກັບພຣະອົງ, ພວກເຮົາກໍຈະມີຊີວິດຮ່ວມກັບພຣະອົງດ້ວຍ. 12.ຖ້າພວກເຮົາໝັ້ນໜຽວ ພວກເຮົາກໍຈະສະເຫວີຍຣາດຮ່ວມກັບ ພຣະອົງ. ຖ້າພວກເຮົາປະຕິເສດພຣະອົງ ພຣະອົງກໍຈະປະຕິເສດພວກເຮົາດ້ວຍ. 13.ຖ້າພວກເຮົາບໍ່ສັດຊື່ຕໍ່ພຣະອົງ, ພຣະອົງກໍຍັງຄົງສັດຊື່ຢູ່ສະເໝີ, ຍ້ອນວ່າພຣະອົງບໍ່ສາມາດປະຕິເສດພຣະອົງເອງໄດ້.

ແຈກຢາກພຣະວາຈາດ້ວຍຄວາມທ່ຽງທຳ

14.ຈົ່ງເວົ້າຊ້ຳຂໍ້ຄວາມເຫລົ່ານີ້ ແລະສັ່ງສອນບອກເຂົາຕໍ່ພຣະພັກພຣະເຈົ້າວ່າ ຢ່າຜິດຖຽງກັນໃນຄວາມເວົ້າ, ມັນບໍ່ມີປະໂຫຍດຫຍັງ, ມີແຕ່ເຮັດໃຫ້ຜູ້ເຊື່ອຕາມ ຈິບຫາຍເທົ່ານັ້ນ. 15.ຈົ່ງອອກແຮງສຳແດງໃຫ້ພຣະເຈົ້າເຫັນວ່າ ຕົນເປັນຜູ້ໄດ້ຮັບການທົດສອບແລ້ວ, ເປັນຄົນງານທີ່ບໍ່ມີອາຍ ແລະແຈກຢາຍພຣະວາຈາແຫ່ງຄວາມຈິງດ້ວຍຄວາມທ່ຽງກົງ. 16.ຈົ່ງຫລີກເວັ້ນການປາກເວົ້າທີ່ໄຮ້ຄຸນທຳ, ຍ້ອນວ່າພວກໃດທຳຕາມນັ້ນ, ກໍຕ້ອງຕົກຕ່ຳໄປເລື້ອຍໆ. 17.ຄວາມປາກຄວາມເວົ້າຂອງເຂົາເປັນຄືບາດເປື່ອຍເໜົ່າທີ່ກິນລາມໄປ. ທ້າວອີເມເນແລະຟີເລໂຕກໍເປັນຄົນຈຳພວກນີ້. 18.ເຂົາທັງສອງຫລົງທາງຄວາມຈິງ ໂດຍອ້າງວ່າ ການກັບເປັນຄືນມານັ້ນມີຂຶ້ນແລ້ວ, ດັ່ງນີ້ ເຂົາເຈົ້າຈຶ່ງທຳໃຫ້ຫລາຍຄົນເສຍຄວາມເຊື່ອ. 19.ແນວໃດກໍຕາມ, ຮາກຖານອັນແໜ້ນໜາທີ່ພຣະເປັນເຈົ້າໄດ້ວາງໄວ້ນັ້ນ ຍັງໝັ້ນຄົງຢູ່. ມີວາຈາຕໍ່ໄປນີ້ເປັນຕາຕີປະທັບໄວ້ຄື: “ພຣະອົງເຈົ້າຊົງຮູ້ຈັກຜູ້ທີ່ເປັນຂອງພຣະອົງ” ແລະຍັງກ່າວຕື່ວ່າ: “ໃຫ້ຜູ້ທີ່ຮ້ອງຫາພຣະນາມຂອງພຣະອົງເຈົ້ານັ້ນ ປະຖິ້ມຄວາມອະທຳເສຍ”. 20.ຢູ່ເຮືອນຫລັງໃຫຍ່, ເຄື່ອງໃຊ້ຂອງສອຍບໍ່ແມ່ນແຕ່ເປັນດ້ວຍເງິນດ້ວຍຄຳເທົ່ານັ້ນ, ຍັງມີເຄື່ອງໃຊ້ທີ່ທຳດ້ວຍໄມ້ແລະດິນໜຽວອີກ. ເຄື່ອງໃຊ້ລາງອັນກໍໃຊ້ໃນຍາມມີງານ, ລາງອັນກໍໃຊ້ໃນຍາມທຳມະດາ. 21.ດັ່ງນັ້ນ ຜູ້ໃດຊຳຣະຕົນໃຫ້ປາດສະຈາກຄວາມເປື້ອນໝອງເຫລົ່ານີ້ແລ້ວ ກໍຈະເປັນດັ່ງເຄື່ອງໃຊ້ທີ່ມີກຽດ, ສັກສິດບໍລິສຸດ, ມີປະໂຫຍດແກ່ເຈົ້າຂອງເຮືອນ, ແລະຈັດໄວ້ສະເພາະວຽກການດີທຸກຢ່າງ.

ຜູ້ຮັບໃຊ້ພຣະອົງເຈົ້າ

22.ຈົ່ງຫລີກເວັ້ນລາຄະຕັນຫາຂອງພວກໜຸ່ມນ້ອຍ. ຈົ່ງຊອກຫາຄວາມຊອບທຳ, ຄວາມເຊື່ອ, ຄວາມຮັກ ແລະຄວາມສັນຕິ ຮ່ວມກັບພວກທີ່ຮ້ອງຫາພຣະນາມຂອງພຣະອົງເຈົ້າ ດ້ວຍດວງໃຈສະອາດບໍລິສຸດ. 23.ຢ່າໄປຫຍຸ້ງກ່ຽວກັບການຖົກຖຽງກັນແບບໂງ່ໆແລະບໍ່ມີແກ່ນສານ. ເຈົ້າກໍຮູ້ແລ້ວວ່າ ມັນຈະເປັນເຫດໃຫ້ຜິດຖຽງກັນ. 24.ສ່ວນຜູ້ຮັບໃຊ້ພຣະເຈົ້ານັ້ນ ບໍ່ຕ້ອງເປັນຄົນຫາເກາະຜິດໝູ່, ແຕ່ເປັນຄົນມີໃຈໂອບອ້ອມອາລີຕໍ່ທຸກຄົນ, ມີຄວາມສາມາດສອນ, ແລະສູ້ທົນຄວາມຂ້ອງໃຈຕ່າງໆ. 25.ເຂົາຕ້ອງໃຊ້ຄວາມອ່ອນຫວານເພື່ອສັ່ງສອນພວກທີ່ຂັດສູ້ ໂດຍຄິດວ່າ ລາງເທື່ອພຣະເຈົ້າຈະໃຫ້ເຂົາກັບໃຈ ມາຍອມຮັບເອົາຄວາມຈິງກໍມີ, 26.ແລະເມື່ອຮູ້ສຶກຕົວແລ້ວ, ເຂົາຈະໄດ້ຫລຸດພົ້ນຈາກບ້ວງແຮ້ວຂອງມານຮ້າຍ ທີ່ໄດ້ຈັບເຂົາໄວ້ເປັນຂ້ອຍທາດ ໃຫ້ເຮັດຕາມໃຈມັກຂອງມັນ.