ພວກທີ່ເປັນຂ້ອຍທາດ

1.ໃຫ້ພວກທີ່ຕົກເປັນຂ້ອຍທາດຖືວ່າ ນາຍຂອງຕົນເປັນຜູ້ສົມໄດ້ຄວາມເຄົາລົບນັບຖືທຸກຢ່າງ, ເພື່ອບໍ່ໃຫ້ພຣະນາມຂອງພຣະເຈົ້າ ແລະພຣະທຳຄຳສອນ ຖືກປະໝາດປະຈານ. 2.ສ່ວນພວກຂ້ອຍທາດທີ່ມີນາຍເປັນຜູ້ມີຄວາມເຊື່ອ ກໍຢ່າຂາດຄວາມເຄົາລົບຕໍ່ນາຍ ຍ້ອນເຫດຜົນວ່າ ເປັນພີ່ນ້ອງກັນ. ກົງຂ້າມ, ຕ້ອງຮັບໃຊ້ນາຍໃຫ້ດີກວ່າອີກ, ຍ້ອນວ່າ ຜູ້ໄດ້ຮັບປະໂຫຍດຈາກການຮັບໃຊ້ຂອງຕົນນັ້ນ ແມ່ນຜູ້ທີ່ມີຄວາມເຊື່ອ. ຈົ່ງສັ່ງສອນແລະຕຸກເຕືອນໃນເລື່ອງເຫລົ່ານີ້.

ອາຈານແທ້ ແລະອາຈານທຽມ

3.ຖ້າມີໃຜສອນໄປແບບອື່ນ ທີ່ບໍ່ເຂົ້າກັບວາຈາແທ້ຂອງພຣະກຣິສໂຕ ພຣະເຈົ້າຂອງເຮົາທັງຫລາຍ, ແລະພຣະທຳຄຳສອນທີ່ກົງກັບຄວາມເຫລື້ອມໃສສັດທາແລ້ວ, 4.ຜູ້ນັ້ນກໍເປັນຄົນຈອງຫອງ, ຄົນໂງ່, ຄົນບ້າປ່ວງ, ຫາແຕ່ຖົກຖຽງກັນແລະເອົາຄວາມເວົ້າມາເກາະຜິດກັນ, ແລ້ວກໍເກີດມີການອິດສາ ຜິດຖຽງ ດ່າປ້ອຍ ສົບປະໝາດ, ລະແວງສົງໃສກັນ, 5.ກ່າວຮ້າຍປ້າຍສີໃສ່ກັນບໍ່ມີວັນສິ້ນສຸດ ລະຫວ່າງພວກມີຈິດໃຈເລວຊາມ ແລະບໍ່ຮູ້ຄວາມຈິງ. ເຂົາເຈົ້າຄິດວ່າຄວາມເຫລື້ອມໃສສັດທານັ້ນ ເປັນທາງຫາລາຍໄດ້ 6.ແມ່ນຈິງ, ຄວາມເຫລື້ອມໃສສັດທານັ້ນ ນຳລາຍໄດ້ອັນມະຫາສານມາໃຫ້ຜູ້ທີ່ພໍໃຈນຳສິ່ງທີ່ຕົນມີຢູ່; 7.ຍ້ອນວ່າ ເມື່ອມາໃນໂລກນີ້, ພວກເຮົາບໍ່ໄດ້ເອົາຫຍັງຕິດຕົວມານຳເລີຍ ແລະເມື່ອຈາກໂລກໄປ, ຈະເອົາຫຍັງຕິດຕົວໄປນຳກໍບໍ່ໄດ້ຄືກັນ. 8.ດັ່ງນີ້ ຖ້າເຮົາມີອາຫານການກິນແລະເຄື່ອງນຸ່ງຫົ່ມແລ້ວ, ກໍໃຫ້ພໍໃຈນໍາຂອງເຫລົ່ານັ້ນ. 9.ສ່ວນພວກຢາກຮັ່ງຢາກມີ ກໍຕົກໃນການຫລອກລວງ, ເປັນຂ້ອຍທາດຂອງຄວາມໂລບມາກ ແລະຄວາມຈິບຫາຍວາຍວອດ. 10.ການຮັກເງິນຮັກຄຳນັ້ນແຫລະເປັນເຄົ້າມູນຂອງຄວາມຊົ່ວຮ້າຍທັງຫລາຍ. ຍ້ອນຍອມຕາມຄວາມໂລບມາກນີ້ເອງ, ຈຶ່ງມີລາງຄົນໄກຫ່າງຈາກຄວາມເຊື່ອ, ຈິດໃຈຕ້ອງເຈັບແສບດ້ວຍຄວາມທຸກທໍຣະມານ ຮ້ອຍແປດພັນປະການ.

ໃຫ້ໂອວາດແກ່ຕີໂມເທ

11.ສ່ວນເຈົ້າ, ຜູ້ເປັນຄົນຂອງພຣະເຈົ້ານັ້ນ, ຈົ່ງຫລີກເວັ້ນທຸກສິ່ງເຫລົ່ານີ້. ຈົ່ງສະແຫວງຫາ ຄວາມຊອບທຳ, ຄວາມສັດທາ, ຄວາມເຊື່ອ, ຄວາມພຽນ ແລະຄວາມອ່ອນຫວານ. 12.ຈົ່ງຕໍ່ສູ້ປ້ອງກັນຄວາມເຊື່ອຈົນສຸດຄວາມສາມາດ, ຈົ່ງຢຶດຊີວິດນິຣັນດອນ ຊຶ່ງພຣະເຈົ້າຊົງຮຽກ ເຈົ້າມາຮັບນັ້ນ ໃຫ້ໝັ້ນໜຽວ, ດັ່ງທີ່ເຈົ້າເອງໄດ້ຮັບຮູ້ ດ້ວຍປະກາດຄວາມເຊື່ອຢ່າງສະງ່າຕໍ່ໜ້າພິຍານເປັນອັນມາກ. 13.ເຮົາຂໍສັ່ງເຈົ້າຕໍ່ພຣະພັກພຣະເຈົ້າຜູ້ສ້າງສາລະພັດ ແລະຕໍ່ພຣະພັກພຣະເຢຊູກຣິສໂຕ ຜູ້ໄດ້ຢັ້ງຢືນປະກາດຄວາມເຊື່ອຢ່າງສະງ່າ ຕໍ່ໜ້າປອນຊີໂອປີລາໂຕ ຄື 14.ໃຫ້ເຈົ້າຮັກສາພຣະທຳຄຳສອນໄວ້ ໃຫ້ປາດສະຈາກມົນທິນແລະຄວາມຕ້ອງຕິ ຈົນເຖິງເວລາພຣະເຢຊູກຣິສໂຕພຣະເຈົ້າຂອງເຮົາຈະສະເດັດກັບມາໃໝ່່, 15.ແລະເມື່ອເຖິງເວລາກຳນົດແລ້ວ, ພຣະອົງເຈົ້າຜູ້ຊົງບຸນລ້ຳເລີດ ແລະຊົງລິດແຕ່ຜູ້ດຽວ ອົງເຈົ້າຈອມກະສັດ, ພຣະອົງເຈົ້າແຫ່ງເຈົ້າທັງຫລາຍ ຈະທຳໃຫ້ເຫດການນີ້ປາກົດແຈ້ງອອກມາ. 16.ພຣະອົງແຕ່ຜູ້ດຽວຊົງອະມະຕະ, ຊົງປະທັບຢູ່ໃນແສງສະຫວ່າງ, ບໍ່ມີມະນຸດໃດເຄີຍເຫັນ ແລະບໍ່ສາມາດຈະເຫັນໄດ້, ກຽດມຸງຄຸນແລະລິດອຳນາດເປັນຂອງພຣະອົງຕະຫລອດນິຣັນດອນ ອາແມນ.

ໃຫ້ຄຳຕັກເຕືອນແກ່ຜູ້ຮັ່ງມີ

17.ຈົ່ງສັ່ງບອກພວກຮັ່ງມີໃນໂລກນີ້ຢ່າໂອ້ອວດຈອງຫອງ ແລະໄວ້ໃຈນຳຊັງສົມບັດທີ່ເປັນອະນິຈັງ, ແຕ່ໃຫ້ໄວ້ໃຈນຳພຣະເປັນເຈົ້າ ຜູ້ຊົງຕຽມທຸກສິ່ງໄວ້ໃຫ້ເຮົາຢ່າງອຸດົມສົມບູນ, ເພື່ອເຮົາຈະໄດ້ໃຊ້ຢ່າງສຸກສະບາຍ. 18.ຂໍໃຫ້ເຂົາເຈົ້າສ້າງຄວາມດີ, ໃຫ້ເຂົາຮັ່ງມີດ້ວຍບຸນກຸສົນ; ແລະໃຫ້ທານດ້ວຍໃຈກວ້າງຂວາງ, ພ້ອມທັງມີໃຈເອື້ອເຟື້ອເຜື່ອແຜ່ຕໍ່ຜູ້ອື່ນ. 19.ແລະດັ່ງນີ້ ເຂົາເຈົ້າຈະໄດ້ທ້ອນໂຮມຊັບອັນດີແລະຖາວອນ ໄວ້ສຳລັບຕົວເອງໃນພາຍໜ້າ, ເພື່ອຈະໄດ້ຊີວິດອັນແທ້ຈິງ.

ຄຳເຕືອນແລະສັ່ງລາ

20.ຕີໂມເທເອີຍ! ຈົ່ງຮັກສາຂອງຝາກນັ້ນໃຫ້ດີ. ຈົ່ງຫລີກເວັ້ນການປາກເວົ້າທີ່ໄຮ້ຄຸນທຳ ແລະຂໍ້ຄັດຄ້ານຂອງກຸ່ມປັນຍາທຽມ. 21.ມີຫລາຍຄົນໄກຫ່າງຈາກຄວາມເຊື່ອ, ຍ້ອນໄດ້ຮັບເອົາຄຳສອນແບບນີ້ໄວ້.

ຂໍພຣະຄຸນຈົ່ງສະຖິດຢູ່ກັບເຈົ້າເທີ້ນ.