ກ່ຽວກັບພວກສັດຕະບຸຣຸດທົ່ວໄປ

1.ຢ່າຕິຕຽນຜູ້ເຖົ້າຜູ້ແກ່ດ້ວຍຄວາມເວົ້າອັນຮຸນແຮງ. ແຕ່ໃຫ້ເຕືອນເຂົາດັ່ງບິດາ. ຖືເອົາພວກໜຸ່ມນ້ອຍດັ່ງອ້າຍດັ່ງນ້ອງ. 2.ຖືເອົາຜູ້ຍິງແກ່ອາຍຸດັ່ງແມ່, ແລະພວກໜຸ່ມສາວດັ່ງເອື້ອຍນ້ອງ ດ້ວຍໃຈບໍລິສຸດ.

ພວກນາງໝ້າຍ

3.ຈົ່ງນັບຖືພວກແມ່ໝ້າຍ ຊຶ່ງເປັນແມ່ໝ້າຍແທ້. 4.ຖ້າແມ່ໝ້າຍຄົນໃດມີລູກມີຫລານ, ກໍໃຫ້ພວກລູກຫລານນີ້ແຫລະເອົາໃຈໃສ່ເບິ່ງແຍງຄອບຄົວຂອງເຂົາເອງກ່ອນ ແລ້ວຕອບບຸນແທນຄຸນບິດາມານດາຂອງຕົນ. ການກະທຳດັ່ງນີ້ຊອບພຣະໄທພຣະເຈົ້າ. 5.ສ່ວນຜູ້ທີ່ເປັນແມ່ໝ້າຍແທ້ ແລະຢູ່ຜູ້ດຽວນັ້ນ ກໍມອບຊີວິດຈິດໃຈນຳພຣະເປັນເຈົ້າ ແລະໄຫວ້ວອນພາວະນາເຊົ້າຄ່ຳຢູ່ບໍ່ຂາດ. 6.ສ່ວນແມ່ໝ້າຍທີ່ຄິດທຳແຕ່ຄວາມສຸກສຳຣານນັ້ນ ແມ່ນຄົນຕາຍທັງເປັນ. 7.ເຈົ້າຕ້ອງບອກຂໍ້ນີ້ໃຫ້ເຂົາຮູ້, ເພື່ອບໍ່ໃຫ້ນາງຖືກຕ້ອງຕິ. 8.ຖ້າຜູ້ໃດບໍ່ເອົາໃຈໃສ່ເບິ່ງແຍງຍາດພີ່ນ້ອງ, ເປັນຕົ້ນ ຜູ້ຢູ່ໃນຄອບຄົວຂອງຕົນແລ້ວ, ເຂົາກໍປະຖິ້ມຄວາມເຊື່ອ ແລະເປັນຄົນເລວຊາມກວ່າຄົນທີ່ບໍ່ມີຄວາມເຊື່ອອີກຊ້ຳ. 9.ໃຫ້ຈົດຊື່ນາງໝ້າຍທີ່ມີອາຍຸ ຢ່າງໜ້ອຍຫົກສິບປີ ແລະແຕ່ງງານເທື່ອດຽວ ເຂົ້າໃນບັນຊີພວກແມ່ໝ້າຍໄດ້. 10.ນາງນັ້ນຕ້ອງມີຊື່ສຽງໃນວຽກການດີ ຄືຮູ້ຈັກເອົາໃຈໃສ່ລ້ຽງດູລູກເຕົ້າ, ຮູ້ຈັກຮັບແຂກຮັບຄົນ, ລ້າງເທົ້າໃຫ້ຜູ້ສັກສິດ, ສົງເຄາະຊ່ວຍເຫລືອຜູ້ທຸກລຳບາກ ແລະມັກຊອບບຳເພັນກຸສົນ. 11.ສ່ວນພວກແມ່ໝ້າຍໝູ່ນັ້ນ ຢ່າຈົດເຂົ້າບັນຊີ, ຍ້ອນວ່າ ເມື່ອຖືກຕັນຫາພາໃຫ້ເຫີນຫ່າງຈາກພຣະກຣິສໂຕເຈົ້າແລ້ວ ເຂົາກໍຢາກຈະແຕ່ງງານໃໝ່, 12.ແລ້ວຈະຖືກຕິຕຽນວ່າໄດ້ທຳຜິດຕໍ່ຄຳປະຕິຍານເດີມທີ່ໄດ້ທຳໄວ້. 13.ກວ່ານັ້ນອີກ, ຍ້ອນບໍ່ມີວຽກການທຳ, ເຂົາກໍຂຶ້ນເຮືອນນັ້ນລົງເຮືອນນີ້. ແລະບໍ່ແມ່ນແຕ່ຈະຢູ່ຊື່ໆເທົ່ານັ້ນ, ແຕ່ຈະເປັນຄົນປາກຢູ່ບໍ່ສຸກ, ປາກເປັນເອັນຕໍ່ ແລະເວົ້າຈາສິ່ງທີ່ບໍ່ຄວນເວົ້າ. 14.ດັ່ງນີ້ ເຮົາຈຶ່ງຢາກໃຫ້ພວກແມ່ໝ້າຍນີ້ແຕ່ງງານໃໝ່ເສຍ, ມີລູກມີເຕົ້າ ແລະເບິ່ງແຍງຄອບຄົວຂອງຕົນ ແລ້ວສັດຕູຈະບໍ່ມີຄວາມນິນທາໄດ້, 15.ຍ້ອນວ່າ ມີແມ່ໝ້າຍຫລາຍຄົນໄດ້ຫລົງເຊື່ອຜີຊາຕານໄປແລ້ວ. 16.ຖ້າຍິງຄົນໃດທີ່ເຊື່ອ ແລະມີພີ່ນ້ອງແມ່ໝ້າຍຢູ່ນຳ, ກໍໃຫ້ນາງຊ່ວຍເຫລືອເກື້ອກູນລາວ; ຢ່າປະໃຫ້ເປັນພາລະຂອງພະ ກຣິສຕະຈັກເລີຍ, ເພື່ອພຣະກຣິສຕະຈັກຈະໄດ້ສົງເຄາະ ຊ່ວຍເຫລືອພວກທີ່ເປັນແມ່ໝ້າຍຂາດທີ່ເພິ່ງແທ້.

ພວກພຣະສົງ

17.ບັນດາອະວຸໂສທີ່ປົກຄອງດີນັ້ນ ສົມໄດ້ຮັບກຽດເປັນສອງຕໍ່. ເປັນຕົ້ນ ພວກທີ່ມີໜ້າທີ່ເທດສະໜາແລະສັ່ງສອນຢ່າງບໍ່ຮູ້ຈັກເມື່ອຍຈັກມຶນ. 18.ພຣະຄຳພີກ່າວວ່າ: “ຢ່າເອົາໂສບໃສ່ປາກງົວທີ່ກຳລັງຢຽບເຂົ້າ”. ແລະອີກບ່ອນໜຶ່ງວ່າ: “ຄົນງານສົມໄດ້ຮັບຄ່າຈ້າງຂອງຕົນ”, 19.ຢ່າຮັບພິຈາລະນາຄຳຟ້ອງກ່າວໂທດຜູ້ອະວຸໂສ, ເວັ້ນແຕ່ມີພິຍານສອງຫລືສາມຄົນ. 20.ສ່ວນຜູ້ທຳຜິດນັ້ນ, ກໍໃຫ້ຕິຕຽນບອກສອນເຂົາ ຊ້ອງໜ້າຄົນທັງຫລາຍ, ເພື່ອໃຫ້ຜູ້ອື່ນຢ້ານນຳດ້ວຍ. 21.ເຮົາຂໍສັ່ງເຈົ້າຕໍ່ພຣະພັກພຣະເປັນເຈົ້າ, ຕໍ່ພຣະພັກພຣະເຢຊູກຣິສໂຕ ແລະຕໍ່ໜ້າພວກເທວະດາທີ່ຊົງເລືອກສັນວ່າ ຈົ່ງຖືຕາມລະບຽບເຫລົ່ານີ້ ໂດຍບໍ່ເຫັນແກ່ໜ້າແກ່ຕາຜູ້ໃດ, ແລະຢ່າເຮັດຫຍັງໂດຍເລືອກທີ່ຮັກມັກທີ່ຊັງ. 22.ຢ່າຟ້າວປົກມືໃຫ້ຜູ້ໃດໂດຍໄວ; ຢ່າມີສ່ວນໃນການບາບຂອງຜູ້ອື່ນ. ຈົ່ງຮັກສາຕົວໃຫ້ບໍລິສຸດ. 23.ຢ່າກິນແຕ່ນ້ຳຫລາຍ, ກິນເຫລົ້າອະງຸ່ນແດ່ ເພື່ອຊ່ວຍກະເພາະອາຫານ ແລະຮັກສາພະຍາດທີ່ເກີດແກ່ເຈົ້າຢູ່ເລື້ອຍໆ.24.ບາບຂອງລາງຄົນກໍປາກົດແຈ້ງອອກມາ ກ່ອນການຕັດສິນຊ້ຳ. 25.ວຽກການດີກໍດັ່ງດຽວກັນ ມັນປາກົດແຈ້ງອອກມາເອງ. ສ່ວນທີ່ຍັງບໍ່ທັນປາກົດແຈ້ງນັ້ນ, ຈະປົກບັງໄວ້ເຫິງກໍບໍ່ໄດ້.