ທຸກສິ່ງທີ່ພຣະເປັນເຈົ້າໄດ້ສ້າງມາ ດີງາມທັງສິ້ນ

1.ພຣະຈິດເຈົ້າໄດ້ຊົງກ່າວໄວ້ຢ່າງແຈ່ມແຈ້ງວ່າ: ໃນວາລະສຸດທ້າຍ ຈະມີລາງຄົນປະຖິ້ມຄວາມເຊື່ອ, ແລ້ວໄປເຊື່ອຟັງພະຍາມານຜູ້ຕົວະຫລອກ ແລະຖືຕາມຄຳສອນຂອງຜີປີສາດ, 2.ຈະຖືກພວກຕົວະຫລອກທຽມໃຈບຸນ ທີ່ມີຕາພິມໄວ້ດ້ວຍເຫລັກແດງຢູ່ໃນມະໂນທຳນັ້ນ ມາຍົວະໃຫ້ຫລົງຜິດໄປ. 3.ພວກນັ້ນຈະຫ້າມການແຕ່ງງານ. ຫ້າມກິນອາຫານບາງຢ່າງ, ຊຶ່ງພຣະເປັນເຈົ້າໄດ້ສ້າງໄວ້ໃຫ້ຜູ້ທີ່ເຊື່ອແລະຮູ້ຈັກຄວາມຈິງ ຮັບເອົາໄປກິນ ດ້ວຍການຂອບພຣະຄຸນພຣະອົງ. 4.ດ້ວຍວ່າ ທຸກສິ່ງທີ່ພຣະເປັນເຈົ້າໄດ້ສ້າງມາ ເປັນສິ່ງທີ່ດີທັງສິ້ນ, ແລະບໍ່ມີຫຍັງເປັນແນວຕ້ອງຫ້າມ, ຖ້າຫາກຮູ້ຈັກຮັບກິນດ້ວຍການຂອບພຣະຄຸນ 5.ຍ້ອນວ່າພຣະວາຈາຂອງພຣະເຈົ້າແລະຄຳພາວະນາ ໄດ້ສາດພຣະພອນມາຍັງຂອງເຫລົ່ານັ້ນແລ້ວ. 6.ຈົ່ງແປອະທິບາຍທຸກສິ່ງເຫລົ່ານີ້ໃຫ້ພວກພີ່ນ້ອງຟັງຢ່າງແຈ່ມແຈ້ງ, ແລ້ວເຈົ້າກໍຈະເປັນຜູ້ຮັບໃຊ້ຂອງພຣະກຣິສໂຕ, ມີພຣະວາຈາແຫ່ງຄວາມເຊື່ອ ແລະຫລັກທຳອັນດີງາມຫລໍ່ລ້ຽງ, ຕາມທີ່ເຈົ້າເອງໄດ້ປະພຶດຖືຕາມມາແລ້ວ. 7.ສ່ວນເລື່ອງພື້ນບໍ່ມີແກ່ນສານ, ເລື່ອງຍາແມ່ເຖົ້າເລົ່າໃຫ້ຟັງນັ້ນ, ຢ່າເອົາຫູຟັງເລີຍ; ຈົ່ງແອບຕົວໃຫ້ເຫລື້ອມໃສສັດທາ. 8.ການເຝິກຫັດກາຍມີປະໂຫຍດບໍ່ຫລາຍ, ສ່ວນຄວາມເຫລື້ອມໃສສັດທານັ້ນ ມີປະໂຫຍດໃນທຸກທາງ, ມັນບັນຈຸພຣະສັນຍາບັນດານຊີວິດ, ທັງສຳລັບຊີວິດນີ້ແລະຊີວິດໜ້າດ້ວຍ, ບໍ່ແມ່ນບໍ? 9.ຄຳເວົ້ານີ້ເປັນໜ້າເຊື່ອຖື ແລະສົມໃຫ້ທຸກຄົນຮັບເອົາດ້ວຍເຕັມໃຈ. 10.ຍ້ອນວ່າ ຖ້າພວກເຮົາຕ້ອງທຸກລຳບາກແລະຕໍ່ສູ້ ກໍຍ້ອນພວກເຮົາມີຄວາມໄວ້ໃຈໃນພຣະເຈົ້າຜູ້ຊົງຊີວິດ, ພຣະຜູ້ບັນດານຄວາມຮອດຂອງມວນມະນຸດ, ເປັນຕົ້ນຂອງພວກທີ່ເຊື່ອ. 11.ເຈົ້າຈົ່ງສັ່ງສອນສິ່ງເຫລົ່ານີ້ເຖີດ.

ເປັນແບບຢ່າງໃຫ້ພວກສັດຕະບຸຣຸດ

12.ຢ່າໃຫ້ໃຜດູໝິ່ນອາຍຸໜຸ່ມຂອງເຈົ້າ. ກົງກັນຂ້າມ, ໃຫ້ເຈົ້າເປັນແບບຢ່າງໃຫ້ພວກສັດຕະບຸຣຸດ ທັງໃນຄວາມປາກຄວາມເວົ້າ, ໃນການປະພຶດ, ໃນຄວາມຮັກ, ຄວາມເຊື່ອແລະຄວາມບໍລິສຸດ. 13.ໃນເວລາຄອງຖ້າເຮົາຫລົບມານັ້ນ, ຈົ່ງເອົາໃຈໃສ່ອ່ານພຣະຄຳພີ, ໃນການເທດສະໜາແລະການສັ່ງສອນ. 14.ຢ່າເສີຍເລີຍຕໍ່ພຣະຄຸນທີ່ຢູ່ໃນຕົວເຈົ້າ, ຊຶ່ງເຈົ້າໄດ້ຮັບໂດຍອາໄສຄຳທຳນາຍແລະການປົກມືຂອງຄະນະສົງ. 15.ຈົ່ງໃສ່ໃຈນຳສິ່ງເຫລົ່ານີ້ ແລະປະຕິບັດຕາມຢ່າງໝັ້ນໜຽວສຸດຄວາມສາມາດ. ດັ່ງນີ້ ທຸກຄົນຈະເຫັນຄວາມກ້າວໜ້າຂອງເຈົ້າ ປະຈັກແຈ້ງແກ່ສາຍຕາຂອງເຂົາ. 16.ຈົ່ງລະວັງຕົວແລະເອົາໃຈໃສ່ໃນຄຳສັ່ງສອນຂອງເຈົ້າໃຫ້ດີ ຈົ່ງໝັ້ນໜຽວໃນສິ່ງເຫລົ່ານີ້ ເມື່ອປະຕິບັດດັ່ງນີ້ແລ້ວ ເຈົ້າກໍຈະຊ່ວຍຕົວເຈົ້າເອງແລະຜູ້ທີ່ຟັງເຈົ້າໃຫ້ຮອດດ້ວຍ.