ພະສັງຄະຣາດ

1.ຄຳເວົ້າຕໍ່ໄປນີ້ເປັນໜ້າເຊື່ອຖືແທ້ ຄື ຖ້າຜູ້ໃດຢາກຮັບຕຳແໜ່ງສັງຄະຣາດ, ຜູ້ນັ້ນກໍປາດຖະໜາວຽກການອັນສູງສົ່ງ. 2.ຜູ້ເປັນສັງຄະຣາດຕ້ອງເປັນຜູ້ບໍ່ມີແນວຕ້ອງຕິໄດ້, ແຕ່ງງານເທື່ອດຽວ, ຮູ້ຈັກປະມານຕົນ, ມີຄວາມຮອບຄອບ, ເປັນໜ້ານັບຖື, ຮູ້ຈັກຮັບແຂກຄົນ, ເປັນຄູສອນໄດ້, 3.ບໍ່ກິນເຫລົ້າເມົາຢາ, ບໍ່ເປັນໃຈຮ້າຍໂມໂຫ, ແຕ່ມີໃຈອ່ອນຫວານ, ບໍ່ມັກຜິດຖຽງແລະໂລພາ, 4.ຮູ້ຈັກຄຸ້ມຄອງເບິ່ງແຍງຄອບຄົວຂອງຕົນຢ່າງດີ, ຮູ້ຈັກບັງຄັບລູກເຕົ້າໃຫ້ນົບນອບຟັງຄວາມຢ່າງສົມກຽດ. 5.ດ້ວຍວ່າ ຖ້າຜູ້ໃດບໍ່ຮູ້ຈັກຄຸ້ມຄອງເບິ່ງແຍງຄອບຄົວຂອງຕົນແລ້ວ, ຈະສາມາດຄຸ້ມຄອງພຣະກຣິສຕະຈັກຂອງພຣະເປັນເຈົ້າໄດ້ຢ່າງໃດ? 6.ບໍ່ຕ້ອງໃຫ້ເປັນຄົນທີ່ກັບຈິດກັບໃຈໃໝ່, ຍ້ອນເຂົາອວດຕົວຈອງຫອງ ແລ້ວຈະຖືກລົງໂທດແບບຜີປີສາດ. 7.ນອກຈາກນັ້ນ ສັງຄະຣາດຍັງຕ້ອງມີຊື່ສຽງດີຕໍ່ໜ້າຄົນນອກອີກ, ເພື່ອບໍ່ໃຫ້ຖືກຕິສິນນິນທາ ແລະຕົກໃນບ້ວງແຮ້ວຂອງປີສາດ.

ພວກອະນຸສົງ

8.ສຳລັບພວກອະນຸສົງກໍດັ່ງດຽວກັນ, ຕ້ອງເປັນຜູ້ທີ່ໜ້ານັບຖື, ບໍ່ເປັນນັກດື່ມຫລືໂລພາມັກໄດ້. 9.ຕ້ອງເປັນຜູ້ໜຽວແໜ້ນໃນຂໍ້ເລິກລັບແຫ່ງຄວາມເຊື່ອດ້ວຍຈິງໃຈ. 10.ຕ້ອງໄດ້ຮັບການທົດລອງເສຍກ່ອນ, ແລະເມື່ອເຫັນວ່າບໍ່ມີຫຍັງຕ້ອງຕິແລ້ວ, ຈຶ່ງໃຫ້ຮັບຕຳແໜ່ງອະນຸສົງໄດ້. 11.ສຳລັບພວກຜູ້ຍິງກໍດັ່ງດຽວກັນ, ຕ້ອງເປັນຜູ້ໜ້ານັບຖື, ບໍ່ເປັນຄົນມັກກ່າວຂວັນ ນິນທາ, ຮູ້ຈັກປະມານຕົນແລະຊື່ສັດໃນທຸກຢ່າງ. 12.ພວກອະນຸສົງຕ້ອງແຕ່ງງານເທື່ອດຽວ. ຕ້ອງຮູ້ຈັກຄຸ້ມຄອງລູກເຕົ້າແລະຄອບຄົວຂອງຕົນ. 13.ຍ້ອນວ່າ ຜູ້ທີ່ປະຕິບັດໜ້າທີ່ອະນຸສົງຢ່າງດີ ກໍໄດ້ຮັບຖານະອັນມີກຽດ ແລະມີຄວາມແນ່ໃຈຢ່າງແຮງກ້າ ອັນມາຈາກຄວາມເຊື່ອທີ່ມີໃນພຣະກຣິສໂຕເຢຊູ.

ຂໍ້ເລິກລັບໃນພະສາດສະໜາ

14.ເຮົາຂຽນຂໍ້ຄວາມເຫລົ່ານີ້ມາຫາເຈົ້າ, ໂດຍຫວັງໃຈວ່າຈະມາຫາເຈົ້າໃນໝໍ່ໆນີ້. 15.ແຕ່ຖ້າຫາກວ່າເຮົາມາຊ້າ, ເຈົ້າກໍຈະຮູ້ຈັກວ່າຕ້ອງປະພຶດຕົວແນວໃດໃນເຄຫະສະຖານຂອງພຣະເຈົ້າ, ອັນແມ່ນພຣະກຣິສຕະຈັກຂອງພຣະເຈົ້າຜູ້ຊົງຊີວິດ, ຊຶ່ງແມ່ນຫລັກອັນແໜ້ນໜາ ແລະຮາກຖານແຫ່ງຄວາມຈິງ. 16.ຂໍ້ເລິກລັບແຫ່ງຄວາມເຫລື້ອມໃສສັດທານີ້ ເກີນວ່າຍິ່ງໃຫຍ່ແທ້ ຄື ພຣະອົງຊົງປາກົດມາ ມີສະພາບເປັນຄົນ, ຊົງເປັນຜູ້ສັກສິດໃນພຣະຈິດເຈົ້າ. ຝູງເທບເທວາໄດ້ເຫັນໄດ້ຊົມ, ນານາຊາດໄດ້ຍິນປະກາດເຖິງພຣະອົງ, ຊາວໂລກໄດ້ເຊື່ອໃນພຣະອົງ, ພຣະອົງໄດ້ຮັບການຍົກຍໍຂຶ້ນສູ່ສີມຸງຄຸນອັນຮຸ່ງເຮືອງ.