ຈົດໝາຍຂອງນັກບຸນເປົາໂລຂຽນເຖິງຕີໂມເທ ສະບັບທີ 1

(ກ່ຽວກັບໜ້າທີ່ສົງ)

ຄຳນັບຖາມຂ່າວ

1.ຈາກເປົາໂລ ອັກຄະທໍາມະທູດຂອງພຣະກຣິສໂຕເຢຊູ, ຕາມຄຳສັ່ງຂອງພຣະເຈົ້າຜູ້ໄຖ່ຂອງພວກເຮົາ ແລະຂອງພຣະກຣິສໂຕເຢຊູ ອົງຄວາມຫວັງຂອງພວກເຮົາ. 2.ເຖິງຕີໂມເທ, ຜູ້ເປັນລູກແທ້ຂອງເຮົາໃນຄວາມເຊື່ອ. ຂໍພຣະຄຸນ, ພຣະເມດຕາ ແລະສັນຕິສຸກ ທີ່ມາຈາກພະ ເຈົ້າພຣະບິດາ ແລະຈາກພຣະກຣິສໂຕເຢຊູ ພຣະເຈົ້າຂອງເຮົາ ຈົ່ງຢູ່ນຳເຈົ້າເທີ້ນ.

ພວກອາຈານທຽມ

3.ເມື່ອເຮົາອອກເດີນທາງໄປແຂວງມາເຊດວນ, ເຮົາກໍໄດ້ສັ່ງໃຫ້ເຈົ້າປະຈຳຢູ່ເມືອງເອເຟໂຊຕໍ່ໄປ, ເພື່ອຫ້າມປາມລາງຄົນ ບໍ່ໃຫ້ສັ່ງສອນແນວຜິດແປກ. 4.ທັງບໍ່ໃຫ້ໃສ່ໃຈນຳພື້ນຕ່າງໆ ແລະເລື່ອງເຊື້ອວົງພົງຕະກູນ ທີ່ບໍ່ມີຍາມສຸດສ້ຽງຈັກເທື່ອ, ອັນກໍ່ໃຫ້ເກີດບັນຫາ ຫລາຍກວ່າສົ່ງເສີມແຜນການຂອງພຣະເປັນເຈົ້າ ທີ່ກຳລັງດຳເນີນໄປໃນຄວາມເຊື່ອ. 5.ຈຸດປະສົງຂອງການສັ່ງຫ້າມນີ້ຄື ໃຫ້ມີຄວາມຮັກທີ່ມາຈາກດວງໃຈບໍລິສຸດ, ຈາກມະໂນທຳອັນດີອັນຊອບ ແລະຈາກຄວາມເຊື່ອອັນຈິງໃຈ. 6.ຍ້ອນລາງຄົນໄດ້ຜິດກັບຈຸດປະສົງນີ້, ເລີຍຫລົງໄຫລໄປເວົ້າເລື່ອງໄຮ້ປະໂຫຍດ. 7.ເຂົາເຫລົ່ານັ້ນຢາກຕັ້ງຕົວເປັນນັກປາດສອນກົດບັນຢັດ, ໂດຍຕົວເຂົາເອງບໍ່ເຂົ້າໃຈສິ່ງທີ່ຕົວເວົ້າ ຫລືສິ່ງທີ່ຕົວຢືນຢັນອອກມາຢ່າງແຂງຂັນນັ້ນເລີຍ.

ວຽກແທ້ຂອງກົດບັນຢັດ

8.ຕາມຈິງ, ພວກເຮົາກໍຮູ້ຢູ່ວ່າ ກົດບັນຢັດນັ້ນດີ ຖ້າຫາກໃຊ້ໃຫ້ຖືກຕ້ອງ. 9.ຂໍໃຫ້ເຂົ້າໃຈຂໍ້ນີ້ໃຫ້ດີຄື ກົດບັນຢັດມີໄວ້ບໍ່ແມ່ນສຳລັບຄົນດີມີສິນທຳ, ແຕ່ມີໄວ້ສຳລັບຄົນຫົວດື້ຂີ້ຂະບົດ, ຄົນອະທຳແລະຄົນບາບ, ຄົນມັກດູໝິ່ນແລະທຸລະຈານສິ່ງສັກສິດ, ຄົນຂ້າພໍ່ແມ່, ຂ້າຄົນ, 10.ຜູ້ລ່ວງປະເວນີ, ຜູ້ສົມສະຫວາດຊາຍກັບຊາຍ, ພວກຄ້າທາດ, ຄົນຂີ້ຕົວະ, ຄົນສາບານບໍ່ຈິງ ແລະແນວອື່ນອີກ ທີ່ຂັດແຍ່ງກັບຫລັກຄຳສອນທີ່ດີງາມ, 11.ອັນແມ່ນຫລັກຄຳສອນທີ່ຖືກຕ້ອງກັບພຣະວໍຣະສານແຫ່ງສີມຸງຄຸນຂອງພຣະເຈົ້າຜູ້ສົມບູນພູນສຸກ, ຊຶ່ງພຣະອົງໄດ້ມອບໝາຍໃຫ້ເຮົາ.

ສັນຣະເສີນພຣະເມດຕາຂອງພຣະກຣິສໂຕເຈົ້າ

12. ຂ້າພະເຈົ້າຂໍຂອບພຣະຄຸນພຣະອົງ ຜູ້ໄດ້ຊ່ວຍຊູກຳລັງຂອງຂ້າພະເຈົ້າ ຄື ພຣະເຢຊູກຣິສໂຕ ພຣະເຈົ້າຂອງເຮົາ, ຍ້ອນພຣະອົງຊົງຖືວ່າ ຂ້າພະເຈົ້າເປັນຜູ້ວາງໃຈໄດ້, ຈຶ່ງຊົງແຕ່ງຕັ້ງໃຫ້ເປັນຜູ້ຮັບໃຊ້ພຣະອົງ. 13.ແມ່ນວ່າ ແຕ່ກ່ອນຂ້າພະເຈົ້າໄດ້ເປັນຜູ້ປ້ອຍດ່າປະຈານພຣະເປັນເຈົ້າ, ເປັນຜູ້ບັງບຽດແລະດຸຮ້າຍ, ແຕ່ພຣະເປັນເຈົ້າໄດ້ເມດຕາກະລຸນາໃຫ້ອະໄພແກ່ຂ້າພະເຈົ້າ, ຍ້ອນວ່າຂ້າພະເຈົ້າໄດ້ທຳໄປຢ່າງບໍ່ຮູ້ໜ້າຮູ້ຫລັງ ແລະຍັງບໍ່ທັນມີຄວາມເຊື່ອດ້ວຍ. 14.ແຕ່ພຣະຄຸນຂອງພຣະອົງພຣະເຈົ້າຂອງເຮົາ ພ້ອມທັງຄວາມເຊື່ອແລະຄວາມຮັກໃນພຣະເຢຊູກຣິສໂຕ ໄດ້ຫລັ່ງໄຫລລົງມາເຖິງຂ້າພະເຈົ້າຢ່າງອຸດົມສົມບູນກວ່າອີກ. 15.ຄຳເວົ້າຕໍ່ໄປນີ້ ຈິງແທ້ແລະເປັນໜ້າເຊື່ອຖືທຸກຢ່າງ ຄື ພຣະເຢຊູກຣິສໂຕສະເດັດມາໃນໂລກນີ້ ເພື່ອຊ່ວຍຄົນບາບໃຫ້ຮອດ, ແລະຂ້າພະເຈົ້າເອງເປັນຄົນບາບຕົວເອກໝູ່. 16.ການທີ່ພຣະເປັນເຈົ້າໄດ້ເມດຕາກະລຸນາໃຫ້ອະໄພແກ່ຂ້າພະເຈົ້ານັ້ນ, ກໍເພື່ອໃຫ້ພຣະເຢຊູກຣິສໂຕເຈົ້າ ໄດ້ສຳແດງນ້ຳພຣະໄທກວ້າງຂວາງຂອງພຣະອົງໃນຕົວຂ້າພະເຈົ້າກ່ອນຜູ້ອື່ນ, ໂດຍຫວັງຢາກໃຫ້ຂ້າພະເຈົ້າເປັນແບບຢ່າງແກ່ບັນດາຜູ້ທີ່ຈະເຊື່ອເຖິງພຣະອົງ ເພື່ອຈະໄດ້ຊີວິດນິຣັນດອນ. 17.ຂໍໃຫ້ອົງກະສັດຜູ້ເປັນຢູ່ແຕ່ໃດໆມາ, ຂໍພຣະເຈົ້າຜູ້ດຽວ, ຜູ້ຊົງອະມະຕະແລະທີ່ເຮົາແນມເຫັນບໍ່ໄດ້ນັ້ນ, ຈົ່ງໄດ້ຮັບກຽດແລະສີມຸງຄຸນຕະຫລອດນິຣັນດອນເທີ້ນ ອາແມນ. 

18.ຕີໂມເທ ລູກທີ່ຮັກ, ນີ້ແມ່ນຄຳສັ່ງທີ່ເຮົາມອບໃຫ້ເຈົ້າ ຕາມພຣະວາຈາທີ່ໄດ້ກ່າວໄວ້ເຖິງຕົວເຈົ້າ, ເພື່ອເປັນແຮງກຳລັງຊ່ວຍເຈົ້າຕໍ່ສູ້ຈົນສຸດຄວາມສາມາດ 19.ພ້ອມທັງມີຄວາມເຊື່ອໜັກແໜ້ນ ແລະມະໂນທຳອັນຊອບ, ຊຶ່ງມີຫລາຍຄົນປະຖິ້ມ, ເລີຍທຳໃຫ້ຄວາມເຊື່ອຂອງເຂົາຕ້ອງຫລົ້ມຈົມໄປ. 20.ໃນຄົນຈຳນວນນີ້ ມີ ອີເມເນ, ອາແລັກຊັງ. ສອງຄົນນີ້ ເຮົາໄດ້ມອບໃຫ້ຜີຊາຕານແລ້ວ, ເພື່ອໃຫ້ເຂົາຮູ້ຈັກເຊົາດ່າປ້ອຍປະໝາດປະຈານພຣະເຈົ້າເສຍ.