ເຕືອນໃຫ້ພາວະນາແລະທຳງານ

1.ທ້າຍສຸດ, ພີ່ນ້ອງທີ່ຮັກ, ຈົ່ງພາວະນາຊ່ວຍພວກເຮົາ ເພື່ອໃຫ້ພຣະວາຈາຂອງພຣະເຈົ້າກ້າວໜ້າໄປຢ່າງສຳເລັດ, ແລະໄດ້ຮັບການຍ້ອງຍໍສັນຣະເສີນ ດັ່ງທີ່ໄດ້ເປັນມາໃນຕົວພວກພີ່ນ້ອງແລ້ວ. 2.ແລະເພື່ອໃຫ້ພວກເຮົາໄດ້ຫວິດພົ້ນຈາກພວກຄົນພານແລະຊົ່ວຊ້ານັ້ນເຖີດ, ຍ້ອນວ່າ ບໍ່ແມ່ນໝົດທຸກຄົນມີຄວາມເຊື່ອ. 3.ແຕ່ພຣະອົງເຈົ້າຊົງສັດຊື່: ພຣະອົງຈະຊ່ວຍພວກ

ພີ່ນ້ອງໃຫ້ເຂັ້ມແຂງ ແລະປ້ອງກັນໃຫ້ຫວິດຈາກພະຍາມານ. 4.ພວກເຮົາມີຄວາມໄວ້ໃຈຈາກພວກພີ່ນ້ອງຢ່າງເຕັມທີ່ ໃນພຣະອົງເຈົ້າ ວ່າ ພວກພີ່ນ້ອງກຳລັງທຳສິ່ງທີ່ພວກເຮົາສັ່ງນັ້ນແລະຍັງຈະກະທຳຢູ່ຕໍ່ໄປດ້ວຍ. 5.ຂໍພຣະອົງເຈົ້າແນບນຳຈິດໃຈຂອງພວກພີ່ນ້ອງ ໄປເຖິງຄວາມຮັກຂອງພຣະເຈົ້າ ແລະຄວາມໝັ້ນຄົງຂອງພຣະກຣິສໂຕເຈົ້າເທີ້ນ.

ຢ່າຢູ່ຊື່ໆຫລືກໍ່ຄວາມວຸ້ນວາຍ

6.ພີ່ນ້ອງທັງຫລາຍ, ເຮົາຂໍສັ່ງພວກພີ່ນ້ອງໃນນາມຂອງພຣະເຢຊູກຣິສໂຕເຈົ້າວ່າ ຈົ່ງຕີຕົວອອກຫ່າງຈາກພີ່ນ້ອງທຸກຄົນທີ່ຂີ້ຄ້ານ ແລະບໍ່ຖືຕາມປະເພນີທຳ ຊຶ່ງພວກພີ່ນ້ອງໄດ້ຮັບຈາກພວກເຮົາ. 7.ພວກພີ່ນ້ອງກໍຮູ້ດີແລ້ວວ່າ ຈະຕ້ອງເອົາຢ່າງພວກເຮົາແນວໃດແລ້ວ. ເມື່ອເວລາຢູ່ກັບພວກພີ່ນ້ອງນັ້ນ, ພວກເຮົາບໍ່ໄດ້ເປັນຄົນຂີ້ຄ້ານເລີຍ. 8.ພວກເຮົາບໍ່ໄດ້ໄປຫາຂໍໃຜກິນ, ແຕ່ໄດ້ອອກແຮງເຮັດວຽກດ້ວຍຄວາມລຳບາກແລະອິດອ່ອນ ທັງກາງເວັນແລະກາງຄືນ, ເພື່ອບໍ່ໃຫ້ຜູ້ໃດໃນພວກພີ່ນ້ອງຕ້ອງລຳບາກຍ້ອນພວກເຮົາ. 9.ພວກເຮົາທຳດັ່ງນີ້ ບໍ່ແມ່ນວ່າພວກເຮົາບໍ່ມີສິດທີ່ຈະເພິ່ງພວກພີ່ນ້ອງດອກ, ແຕ່ເພື່ອເປັນແບບຢ່າງໃຫ້ພວກພີ່ນ້ອງເອົາຕາມເທົ່ານັ້ນ. 10.ຕາມຈິງ, ເມື່ອເວລາຢູ່ກັບພວກພີ່ນ້ອງນັ້ນ, ພວກເຮົາກໍໄດ້ຕັ້ງກົດໄວ້ວ່າ: “ຜູ້ໃດບໍ່ເຮັດວຽກກໍບໍ່ຕ້ອງກິນ.” 11.ບັດແລ້ວພວກເຮົາໄດ້ຂ່າວວ່າ ມີບາງຄົນໃນພວກພີ່ນ້ອງຢູ່ຊື່ໆ ບໍ່ເຮັດວຽກເຮັດການຫຍັງ, ມີແຕ່ກິນເຂົ້າໂຕໂສຄວາມໝູ່. 12.ພວກເຮົາຈຶ່ງຂໍສັ່ງເຕືອນຄົນເຫລົ່ານີ້ ໃນພຣະເຢຊູກຣິສໂຕພຣະອົງເຈົ້າຂອງພວກເຮົາວ່າ: “ຈົ່ງເຮັດວຽກຢ່າງສະຫງົບງຽບ ແລະຫາກິນດ້ວຍນ້ຳເຫື່ອນ້ຳແຮງຂອງຕົນເຖີດ”. 13.ພີ່ນ້ອງທັງຫລາຍ! ຢ່າທໍ້ຖອຍໃນການທຳຄວາມດີ, 14.ຖ້າຜູ້ໃດບໍ່ເຊື່ອຟັງຄຳຕຸກເຕືອນຂອງພວກເຮົາໃນຈົດໝາຍກ້ານນີ້, ກໍໃຫ້ໝາຍຜູ້ນັ້ນໄວ້, ແລະຢ່າໄປມາຫາສູ່ກັບເຂົາອີກ, ເພື່ອໃຫ້ເຂົາຮູ້ສຶກລະອາຍໃຈ. 15.ແຕ່ຢ່າຖືເອົາເປັນສັດຕູ, ແຕ່ໃຫ້ຕຸກເຕືອນບອກສອນເຂົາດັ່ງພີ່ດັ່ງນ້ອງ.

ໃຫ້ພອນແລະອຳລາ

16.ຂໍພຣະເຈົ້າແຫ່ງສັນຕິສຸກ ພຣະອົງເອງ ປະທານສັນຕິສຸກໃຫ້ພວກພີ່ນ້ອງ ທຸກເວລາແລະທຸກວິຖີທາງ. ຂໍພຣະອົງເຈົ້າຊົງສະຖິດຢູ່ນຳພວກທ່ານທຸກຄົນ.

17. ຂ້າພະເຈົ້າເປົາໂລ ຂຽນຂໍ້ຄວາມຖາມຂ່າວຄາວນີ້ ດ້ວຍມືຂ້າພະເຈົ້າເອງ. ຂ້າພະເຈົ້າເຊັນຊື່ແບບນີ້ໃນຈົດໝາຍທຸກໆກ້ານ. ແມ່ນລາຍມືຂອງຂ້າພະເຈົ້າເອງ.

18.ຂໍພຣະຄຸນຂອງພຣະເຢຊູກຣິສໂຕພຣະເຈົ້າຂອງເຮົາທັງຫລາຍ ສະຖິດຢູ່ນຳພວກພີ່ນ້ອງທຸກຄົນເທີ້ນ.