ເຫດການທີ່ຈະເກີດຂຶ້ນກ່ອນພຣະອົງສະເດັດມາ

1.ພີ່ນ້ອງທັງຫລາຍ, ເຮົາວອນຂໍພວກພີ່ນ້ອງກ່ຽວກັບການສະເດັດມາ ແລະການທ້ອນໂຮມພວກເຮົາຢູ່ກັບພຣະອົງວ່າ: 2.“ພວກພີ່ນ້ອງຢ່າຟ້າວວຸ້ນວາຍຕົກໃຈຍ້ອນຄຳທຳນາຍ ຄຳເທດ ຫລືຈົດໝາຍທີ່ຖືວ່າ ແມ່ນພວກເຮົາເອງເປັນຜູ້ຂຽນ ຊຶ່ງຈະທຳໃຫ້ພວກພີ່ນ້ອງຄຶດວ່າ ວັນຂອງພຣະເຈົ້າມາເຖິງແລ້ວ. 3.ຢ່າໃຫ້ໃຜມາຫລອກລວງພວກພີ່ນ້ອງໂດຍວິທີຕ່າງໆໄດ້. ມັນຕ້ອງມີການຂະບົດ ປະຕິເສດພຣະເຈົ້າເກີດຂຶ້ນມາກ່ອນ, ແລະໃຫ້ຄົນອະທຳ ບຸດແຫ່ງຄວາມພິນາດ ປາກົດຕົວອອກມາດ້ວຍ, 4.ຄົນອະທຳນີ້ແຫລະຈະຍົກຕົວຂຶ້ນ ຕໍ່ສູ້ກັບທຸກສິ່ງທີ່ມີຊື່ວ່າພະ, ຫລືສິ່ງທີ່ຄວນສັກກາລະບູຊາ; ມັນເອງຈະເຂົ້າໄປນັ່ງຢູ່ໃນພຣະວິຫານຂອງພຣະເຈົ້າ ແລະປະກາດຕົວເອງເປັນພຣະເຈົ້າ. 5.ພວກພີ່ນ້ອງບໍ່ຈື່ບໍວ່າ ຂ້າພະເຈົ້າໄດ້ເວົ້າເລື່ອງນີ້ໃຫ້ພວກພີ່ນ້ອງຟັງແລ້ວ ເມື່ອເວລາຂ້າພະເຈົ້າຢູ່ນຳພວກພີ່ນ້ອງນັ້ນ. 6.ແລະພວກພີ່ນ້ອງກໍຮູ້ວ່າ ແມ່ນຫຍັງຈ່ອງດຶງມັນໄວ້ເວລານີ້ ເພື່ອບໍ່ໃຫ້ມັນສະແດງຕົວກ່ອນເຖິງເວລາກຳໜົດ. 7.ຕາມຈິງ ຄວາມອະທຳກໍທຳງານຢູ່ແລ້ວຢ່າງລັບໆ. ຂໍແຕ່ໃຫ້ຜູ້ດຶງຈ່ອງມັນໄວ້ນັ້ນຖືກຄັດອອກກໍເປັນພໍ, 8.ເວລານີ້ແຫລະ ຄົນອະທຳກໍຈະປາກົດຕົວອອກມາໂລດ, ແລ້ວພຣະເຢຊູຈະເປົ່າມັນໃຫ້ດັບສູນໄປ ແລະທຳລາຍມັນໃຫ້ມອດມ້ວຍ ດ້ວຍການສະເດັດມາຢ່າງຮຸ່ງເຮືອງຂອງພຣະອົງ. 9.ຄົນອະທຳນັ້ນຈະມາໂດຍມີຜີຊາຕານ ເປັນຜູ້ດົນບັນດານໃຫ້ທຳວຽກການຕ່າງໆ ດັ່ງ ສະແດງຣິດທານຸພາບ, ການອັດສະຈັນ, ທຳສິ່ງແປກປະຫລາດຕົວະຫລອກ, 10.ໃຊ້ອຸບາຍຊົ່ວຊ້ານານາປະການ ມາລວງພວກທີ່ຈະຕ້ອງພິນາດ ໃຫ້ຫລົງຕາມ, ຍ້ອນວ່າພວກເຂົາບໍ່ຍອມຮັກຫອມຄວາມຈິງທີ່ຈະຊ່ວຍພວກເຂົາໃຫ້ຮອດ. 11.ດ້ວຍເຫດນີ້ ພຣະເປັນເຈົ້າຈຶ່ງບັນດານໃຫ້ຄວາມຫລົງຜິດ ມາຄອບງຳພວກເຂົາໄວ້ ເພື່ອໃຫ້ເຊື່ອຕາມຄຳຕົວະຫລອກນັ້ນ, 12.ແລ້ວທຸກຄົນທີ່ບໍ່ຍອມເຊື່ອຄວາມຈິງ, ແຕ່ຍິນດີນຳຄວາມຊົ່ວຮ້າຍນັ້ນ ຈະຕ້ອງຖືກຕັດສິນລົງໂທດໃຫ້ພິນາດໄປໝົດ.

ເຕືອນໃຫ້ມີຄວາມອົດພຽນ

13.ພີ່ນ້ອງທັງຫລາຍ, ຜູ້ພຣະເຈົ້າຊົງຮັກແພງ! ສ່ວນພວກເຮົາ, ພວກເຮົາຕ້ອງຂອບພຣະຄຸນພຣະເປັນເຈົ້າເພື່ອພວກພີ່ນ້ອງຢູ່ສະເໝີບໍ່ຂາດ, ຍ້ອນວ່າພຣະເປັນເຈົ້າໄດ້ຊົງເລືອກສັນພວກພີ່ນ້ອງໄວ້ແຕ່ຕົ້ນເດີມແລ້ວ ເພື່ອຈະໃຫ້ພວກພີ່ນ້ອງໄດ້ຮອດ ດ້ວຍອາໄສພຣະຈິດຜູ້ປະທານຄວາມສັກສິດ ແລະອາໄສຄວາມເຊື່ອໃນຄວາມຈິງ. 14.ພຣະເປັນເຈົ້າຊົງຮຽກພວກພີ່ນ້ອງມາຫາຄວາມເຊື່ອນີ້ ດ້ວຍອາໄສຂ່າວປະເສີດທີ່ພວກເຮົາປ່າວປະກາດ, ເພື່ອພວກພີ່ນ້ອງຈະໄດ້ຮັບສີມຸງຄຸນຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ. 15.ດ້ວຍເຫດນີ້ ພີ່ນ້ອງທັງຫລາຍຈົ່ງໝັ້ນໜຽວແລະຮັກສາປະເພນີທຳ ທີ່ພວກເຮົາໄດ້ສິດສອນໃຫ້ນັ້ນ ຢ່າງໝັ້ນຄົງ, ຈະແມ່ນດ້ວຍທາງຄວາມເວົ້າຫລືທາງຈົດໝາຍກໍຄືກັນ. 16.ຂໍພຣະເຢຊູກຣິສໂຕເຈົ້າພ້ອມກັບພຣະເຈົ້າພຣະບິດາຜູ້ຊົງຮັກພວກເຮົາ, ຜູ້ປະທານຄວາມບັນເທົານິຣັນດອນແລະຄວາມຫວັງອັນປະເສີດໃຫ້ພວກເຮົາ ເດຊະພຣະຄຸນຂອງພຣະອົງນັ້ນ, 17.ຈົ່ງບັນເທົາ ແລະທຳໃຫ້ຈິດໃຈຂອງພວກພີ່ນ້ອງເຂັ້ມແຂງໃນວຽກການ ແລະໃນຄວາມດີງາມທຸກຢ່າງເທີ້ນ!