ຈົດໝາຍຂອງນັກບຸນເປົາໂລຂຽນເຖິງສັດຕະບຸຣຸດຢູ່ເມືອງເທຊາໂລນິກ ສະບັບທີ 2

ຄຳນັບຖາມຂ່າວ

1.ຈາກຂ້າພະເຈົ້າເປົາໂລ, ພ້ອມກັບຊິນວາໂນແລະຕີໂມເທ, ເຖິງກຸ່ມກຣິສຕະຊົນເມືອງ ເທຊະໂລນິກ ຊຶ່ງຢູ່ໃນພຣະເຈົ້າພຣະບິດາ ແລະໃນອົງພຣະເຢຊູກຣິສໂຕເຈົ້າ. 2.ຂໍພຣະຄຸນແລະສັນຕິສຸກທີ່ມາຈາກພຣະເຈົ້າພຣະບິດາ ແລະພຣະເຢຊູກຣິສໂຕເຈົ້າ ຈົ່ງເປັນຂອງພວກພີ່ນ້ອງເທີ້ນ.

ຂອບພຣະຄຸນ - ໃຫ້ກຳລັງໃຈ - ການພິພາກສາ

3.ພີ່ນ້ອງທັງຫລາຍ! ພວກເຮົາຕ້ອງຂອບພຣະຄຸນພຣະເປັນເຈົ້າສະເໝີໄປເພື່ອພວກພີ່ນ້ອງ ແລະເປັນການຖືກຕ້ອງແລ້ວ. ດ້ວຍວ່າ ຄວາມເຊື່ອຂອງພວກພີ່ນ້ອງໄດ້ກ້າວໜ້າໄປຫລາຍ ແລະຄວາມຮັກຕໍ່ກັນແລະກັນກໍເພີ່ມທະວີຂຶ້ນໃນຕົວພວກພີ່ນ້ອງທຸກຄົນດ້ວຍ. 4.ຈົນວ່າ ພວກເຮົາໄດ້ຍົກເອົາພວກພີ່ນ້ອງມາອວດ ຕໍ່ໜ້າໝູ່ກຣິສຕະຊົນຂອງພຣະເຈົ້າ, ຍ້ອນເຫັນພວກພີ່ນ້ອງມີຄວາມອົດທົນພາກພຽນ ແລະມີຄວາມເຊື່ອໃນເວລາຖືກບັງບຽດແລະຖືກທຸກລຳບາກຕ່າງໆ. 5.ນັ້ນສະແດງໃຫ້ເຫັນການພິພາກສາອັນຍຸຕິທຳຂອງພຣະເປັນເຈົ້າ ຄືທຳໃຫ້ພວກພີ່ນ້ອງສົມກັບອານາຈັກຂອງພຣະເຈົ້າ, ຊຶ່ງພວກພີ່ນ້ອງຍອມຮັບຄວາມທຸກທໍຣະມານຍ້ອນ. 6.ຕາມຈິງ, ມັນເປັນການຖືກຕ້ອງແລ້ວ ທີ່ພຣະເປັນເຈົ້າຈະໃຫ້ພວກທີ່ໄດ້ທຳໃຫ້ພວກພີ່ນ້ອງທຸກທໍຣະມານນັ້ນ ຕ້ອງໄດ້ຮັບຄວາມທຸກທໍຣະມານເປັນການຕອບແທນ, 7.ແລະໂຜດໃຫ້ພວກພີ່ນ້ອງຜູ້ຕ້ອງທຸກທໍຣະມານນັ້ນ ໄດ້ຮັບການພັກຜ່ອນສຸກສຳຣານກັບພວກເຮົາ, ເມື່ອພຣະເຢຊູເຈົ້າຈະສຳແດງພຣະອົງ ແລະສະເດັດລົງມາຈາກສະຫວັນ ພ້ອມກັບເຫລົ່ານິກອນເທວະດາຂອງພຣະອົງ. 8.ພຣະອົງຈະສະເດັດມາ ຫ້ອມລ້ອມດ້ວຍແປວໄຟທີ່ຮ້ອນແຮງແດງຈ້າ ເພື່ອລົງໂທດພວກທີ່ບໍ່ຮູ້ຈັກພຣະເຈົ້າ ແລະພວກທີ່ບໍ່ຍອມເຊື່ອຟັງຂ່າວປະເສີດຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ. 9.ໂທດກຳຂອງຄົນເຫລົ່ານີ້ ແມ່ນຄວາມພິນາດຈິບຫາຍຕະຫລອດນິຣັນດອນ, ບໍ່ເຫັນພຣະພັກພຣະເຈົ້າ ແລະບໍ່ເຫັນແສງລັດສະໝີແຫ່ງຄວາມສະງ່າງາມຂອງພຣະອົງ, 10.ມື້ນັ້ນ, ຄືມື້ພຣະອົງຈະສະເດັດມາຮັບກຽດມຸງຄຸນຈາກບັນດາຜູ້ສັກສິດ ແລະຮັບການຍ້ອງຍໍສັນຣະເສີນຈາກບັນດາຜູ້ທີ່ເຊື່ອ. ສ່ວນພວກພີ່ນ້ອງນັ້ນ, ພວກພີ່ນ້ອງກໍໄດ້ເຊື່ອຕາມຄຳຢືນຢັນຂອງພວກເຮົາແລ້ວ. 11.ດ້ວຍເຫດນີ້ແລ້ວ, ພວກເຮົາຈຶ່ງບໍ່ຢຸດຢ່ອນພາວະນາອຸທິດໃຫ້ພວກພີ່ນ້ອງ ເພື່ອຂໍພຣະເຈົ້າຂອງເຮົາທັງຫລາຍ ທຳໃຫ້ພວກພີ່ນ້ອງສົມກັບພະກະແສຮຽກຂອງພວກພີ່ນ້ອງ, ແລະຂໍໃຫ້ຣິດທານຸພາບຂອງພຣະອົງ ຊ່ວຍໃຫ້ຄວາມປາດຖະໜາອັນດີທຸກຢ່າງຂອງພວກພີ່ນ້ອງ ພ້ອມທັງກິດຈະການແຫ່ງຄວາມເຊື່ອ ໄດ້ບັນລຸຜົນສຳເລັດຢ່າງບໍລິບູນດ້ວຍ. 12.ດັ່ງນີ້ ພຣະນາມຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ ຈະໄດ້ຮັບກຽດມຸງຄຸນໃນພວກພີ່ນ້ອງ ແລະພວກພີ່ນ້ອງກໍຈະໄດ້ຮັບກຽດມຸງຄຸນໃນພຣະອົງ ຕາມພຣະຄຸນຂອງພຣະເຈົ້າຂອງເຮົາ ແລະຂອງພຣະເຢຊູກຣິສໂຕເຈົ້າດ້ວຍ.