ຕຽມພ້ອມຄອງຖ້າພຣະເຢຊູເຈົ້າສະເດັດກັບມາໃໝ່

1.ພີ່ນ້ອງທັງຫລາຍ, ເລື່ອງວັນເວລາທີ່ພຣະອົງເຈົ້າຈະສະເດັດມານັ້ນ, ບໍ່ຈຳເປັນຕ້ອງຂຽນບອກພວກພີ່ນ້ອງດອກ. 2.ພວກພີ່ນ້ອງເອງກໍຮູ້ດີແລ້ວວ່າ ວັນຂອງພຣະອົງເຈົ້າຈະມາເຖິງ ເໝືອນຂະໂມຍທີ່ຈອບມາໃນເວລາກາງຄືນ. 3.ເວລາໃດຜູ້ຄົນພາກັນເວົ້າວ່າ: “ເກີນວ່າມີແຕ່ຄວາມສັນຕິແລະຄວາມປອດໄພແທ້”, ເວລານັ້ນແຫລະ ຄວາມພິນາດຈະອຸບັດຂຶ້ນແກ່ພວກເຂົາຢ່າງປັດຈຸບັນທັນດ່ວນ ເໝືອນດັ່ງຜູ້ຍິງຖືພາເຈັບທ້ອງລູກ. ແລະພວກເຂົາຈະໜີໄປບໍ່ພົ້ນເລີຍ. 4.ພີ່ນ້ອງທັງຫລາຍ, ພວກພີ່ນ້ອງບໍ່ໄດ້ຢູ່ໃນຄວາມມືດແລ້ວ. ວັນນັ້ນຈະບໍ່ມາເຖິງພວກພີ່ນ້ອງຢ່າງບໍ່ຮູ້ເມື່ອຕົວ ເໝືອນຂະໂມຍມາດອກ. 5.ຕາມຈິງແລ້ວ ພີ່ນ້ອງທຸກຄົນເປັນບຸດແຫ່ງຄວາມສະຫວ່າງ ເປັນບຸດແຫ່ງກາງເວັນແລ້ວ. ພວກເຮົາບໍ່ໄດ້ຢູ່ຝ່າຍກາງຄືນ ຫລືຄວາມມືດອີກ. 6.ດັ່ງນັ້ນ ພວກເຮົາຈົ່ງຢ່າເມົານອນຫລັບໄຫລເໝືອນຄົນອື່ນເຂົາ ແຕ່ຈົ່ງຕື່ນເຝົ້າລະວັງສະເໝີ ແລະຈົ່ງຮູ້ຈັກປະມານຕົນ. 7.ພວກທີ່ນອນຫລັບ, ກໍຫລັບເວລາກາງຄືນ; ພວກທີ່ເມົາ, ກໍເມົາເວລາກາງຄືນ. 8.ສ່ວນພວກເຮົາຜູ້ຢູ່ຝ່າຍກາງເວັນ, ຈົ່ງຮູ້ຈັກປະມານຕົວ, ຈົ່ງເອົາຄວາມເຊື່ອແລະຄວາມຮັກ ມາເປັນເຄື່ອງເຫລັກຕຸ້ມຫົ່ມ. ເອົາຄວາມຫວັງຈະໄດ້ຮອດ ມາເປັນໝວກເຫລັກສຸບຫົວ. 9.ຍ້ອນວ່າພຣະເປັນເຈົ້າບໍ່ໄດ້ໝາຍພວກເຮົາໄວ້ເພື່ອຖືກພຣະອົງຕິຮ້າຍ, ແຕ່ເພື່ອໃຫ້ພວກເຮົາໄດ້ຮອດດ້ວຍເດຊະພຣະເຢຊູກຣິສໂຕພຣະເຈົ້າຂອງເຮົາທັງຫລາຍ, 10.ຜູ້ໄດ້ສິ້ນພຣະຊົນເພື່ອພວກເຮົາ, ເພື່ອໃຫ້ພວກເຮົາທັງຜູ້ເປັນແລະຜູ້ຕາຍ ຈະໄດ້ມີຊີວິດຮ່ວມເປັນໜຶ່ງດຽວກັບພຣະອົງ. 11.ດ້ວຍເຫດນີ້ແຫລະ, ພວກພີ່ນ້ອງຈົ່ງເປັນກຳລັງໃຈໃຫ້ກັນແລະກັນ ແລະຊ່ວຍກັນໃຫ້ຈະເລີນຂຶ້ນ ດັ່ງທີ່ພວກພີ່ນ້ອງກຳລັງເຮັດຢູ່ດຽວນີ້.

ຄຳເຕືອນສຸດທ້າຍ

12.ພີ່ນ້ອງທັງຫລາຍ! ພວກເຮົາຂໍພວກພີ່ນ້ອງ ຈົ່ງມີຄວາມເຄົາລົບນັບຖືບັນດາຜູ້ທີ່ບາກບັ່ນທຳງານຢູ່ກັບພວກພີ່ນ້ອງ ເພື່ອຄຸ້ມຄອງແລະຕຸກເຕືອນພວກພີ່ນ້ອງໃນພຣະອົງເຈົ້າ. 13.ຈົ່ງມີຄວາມເຄົາລົບຢ່າງສູງຕໍ່ພວກເພິ່ນ, ຍ້ອນເຫັນແກ່ການງານທີ່ພວກເພິ່ນທຳ. ຈົ່ງຢູ່ດີກິນດີນຳກັນ. 14.ພີ່ນ້ອງທັງຫລາຍ, ພວກເຮົາວອນຂໍພວກພີ່ນ້ອງ ຈົ່ງຕຸກເຕືອນບອກສອນພວກຂີ້ ຄ້ານ, ໃຫ້ກຳລັງໃຈຜູ້ມີຄວາມຢ້ານກົວ, ຊວ້ານຊູຜູ້ອ່ອນແອ, ອົດທົນກັບໝົດທຸກຄົນ. 15.ຈົ່ງລະວັງຢ່າໃຫ້ມີໃຜເອົາຄວາມຜິດມາຕອບສະໜອງຄວາມຜິດ. ຈົ່ງຊອກທຳດີຕໍ່ກັນແລະກັນ ແລະຕໍ່ທຸກຄົນດ້ວຍ. 16.ຈົ່ງຊື່ນຊົມຍິນດີສະເໝີ. 17.ຈົ່ງສວດພາວະນາຢ່າໄດ້ຂາດ, 18.ຈົ່ງຂອບພຣະຄຸນໃນທຸກໂອກາດ, ຍ້ອນແມ່ນສິ່ງທີ່ພຣະເປັນເຈົ້າຊົງປາດຖະໜາໃຫ້ພວກພີ່ນ້ອງທຳໃນພຣະກຣິສໂຕເຢຊູ. 19.ຢ່າກີດກັ້ນວຽກການຂອງພຣະຈິດ. 20.ຢ່າປະໝາດພຣະຄຸນແຫ່ງການປະກາດພຣະວາຈາ. 21.ຈົ່ງພິສູດເບິ່ງທຸກສິ່ງໃຫ້ແຈ່ມແຈ້ງ: ແນວໃດດີ, ໃຫ້ຢຶດຖືເອົາໄວ້. 22.ຈົ່ງລະເວັ້ນຄວາມຊົ່ວທຸກຢ່າງ.

ຄຳພາວະນາສຸດທ້າຍແລະສັ່ງລາ

23.ຂໍພຣະເຈົ້າແຫ່ງສັນຕິສຸກ ໂຜດທຳໃຫ້ພວກພີ່ນ້ອງສັກສິດບໍລິບູນໄປ. ຈົ່ງຮັກສາຈິດໃຈ, ວິນຍານ ແລະກາຍຂອງຕົນ ໃຫ້ປາດສະຈາກຄວາມຕ້ອງຕິທຸກຢ່າງ ຈົນເຖິງເວລາພຣະເຢຊູ ກຣິສໂຕພຣະເຈົ້າຂອງເຮົາຈະສະເດັດກັບມາໃໝ່. 24.ພຣະອົງຜູ້ຊົງຮຽກເອົາພວກພີ່ນ້ອງມານັ້ນ ເປັນຜູ້ສັດຊື່; ພຣະອົງນັ້ນແຫລະຈະດຳເນີນງານຕໍ່ໄປ. 25.ຂໍພວກພີ່ນ້ອງວິງວອນພາວະນາໃຫ້ພວກເຮົາດ້ວຍ. 26.ຂໍຝາກຄວາມຢາມອັນອົບອຸ່ນມາຍັງພີ່ນ້ອງທຸກຖ້ວນໜ້າ. 27.ຂໍສັ່ງພີ່ນ້ອງທັງຫລາຍດ້ວຍອຳນາດຂອງພຣະອົງເຈົ້າວ່າ: ຈົ່ງອ່ານຈົດໝາຍກ້ານນີ້ໃຫ້ພີ່ນ້ອງທຸກຄົນຟັງ. 28.ຂໍໃຫ້ພຣະຄຸນຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ ສະຖິດຢູ່ກັບພວກພີ່ນ້ອງເທີ້ນ.