ການດຳເນີນຊີວິດທີ່ຊອບພຣະໄທພຣະເຈົ້າ

1.ອີກປະການໜຶ່ງ, ເຮົາຂໍວິງວອນແລະເຕືອນພວກພີ່ນ້ອງ ຄື ພວກພີ່ນ້ອງໄດ້ຮຽນຈາກເຮົາແລ້ວວ່າ ຄວນປະພຶດຕົວຢ່າງໃດຈຶ່ງຈະເປັນທີ່ຊອບພຣະໄທພຣະເປັນເຈົ້າ ແລະພວກພີ່ນ້ອງກຳລັງປະພຶດຕົວຢ່າງນັ້ນຢູ່ແລ້ວ, ແຕ່ຂໍໃຫ້ກ້າວໜ້າທະວີຂຶ້ນໄປອີກ. 2.ຕາມຈິງແລ້ວ, ພວກພີ່ນ້ອງກໍຮູ້ຈັກບົດບັນຢັດທີ່ພວກເຮົາໄດ້ສອນໃຫ້ພວກພີ່ນ້ອງ ໃນນາມພຣະເຢຊູເຈົ້າແລ້ວ. 3.ນ້ຳພຣະໄທຂອງພຣະເປັນເຈົ້າຄື ໃຫ້ພວກພີ່ນ້ອງເປັນຜູ້ສັກສິດ, ຫລີກເວັ້ນການຊົ່ວລາມົກ. 4.ໃຫ້ທຸກຄົນຮູ້ຈັກໃຊ້ຮ່າງກາຍທີ່ເປັນຂອງຕົນນັ້ນ ເພື່ອດຳເນີນຊີວິດໃນຄວາມສັກສິດ ແລະໃນກຽດສັກສີ, 5.ໂດຍບໍ່ປ່ອຍຕົວຕາມລາຄະຕັນຫາດັ່ງພວກຄົນຕ່າງສາດສະໜາ ທີ່ບໍ່ຮູ້ຈັກພຣະເຈົ້າ ເຄີຍກະທຳ. 6.ຢ່າໃຫ້ມີໃຜລ່ວງເກີນຫລືທຳຄວາມເສຍຫາຍໃຫ້ພວກພີ່ນ້ອງຂອງຕົນໃນເລື່ອງນີ້, ຍ້ອນພຣະອົງເຈົ້າຊົງລົງໂທດຍ້ອນຄວາມຜິດແບບນີ້, ພວກເຮົາເອງເຄີຍໄດ້ບອກ, ໄດ້ຢັ້ງຢືນກັບພວກພີ່ນ້ອງມາແລ້ວ. 7.ຍ້ອນວ່າພຣະເປັນເຈົ້າບໍ່ໄດ້ຮຽກພວກເຮົາມາໃຫ້ເປັນຄົນລາມົກໂສມົມ, ແຕ່ຮຽກມາເພື່ອໃຫ້ຈຳເລີນຊີວິດເປັນຜູ້ສັກສິດບໍລິສຸດ. 8.ດັ່ງນີ້, ຖ້າຜູ້ໃດປະຖິ້ມຄຳສອນນີ້, ບໍ່ແມ່ນເຂົາປະຖິ້ມຄົນດອກ, ແຕ່ປະຖິ້ມພຣະເປັນເຈົ້າ ຜູ້ປະທານພຣະຈິດຂອງພຣະອົງແກ່ພວກພີ່ນ້ອງ. 9.ສ່ວນເລື່ອງຄວາມຮັກຕໍ່ກັນແລະກັນດັ່ງພີ່ນ້ອງ ນັ້ນ ບໍ່ຈຳເປັນຕ້ອງໃຫ້ໃຜຂຽນມາສອນພວກພີ່ນ້ອງດອກ, ຍ້ອນພວກພີ່ນ້ອງເອງກໍໄດ້ຮັບຄຳສອນນີ້ມາຈາກພຣະເຈົ້າແລ້ວວ່າ ໃຫ້ຮັກກັນແລະກັນ, 10.ແລະພວກພີ່ນ້ອງກໍໄດ້ປະຕິບັດເລື່ອງນີ້ ຕໍ່ພວກພີ່ນ້ອງຢູ່ທົ່ວແຂວງມາເຊດວນແລ້ວ. ແຕ່ເຮົາຂໍເຕືອນພວກພີ່ນ້ອງໃຫ້ກ້າວໜ້າທະວີຂຶ້ນຕໍ່ໄປໃນເລື່ອງນີ້ຫລາຍກວ່າອີກ. 11.ຈົ່ງຈຳເລີນຊີວິດຢ່າງສະຫງົບງຽບ. ເອົາໃຈໃສ່ໃນໜ້າທີ່ພະນັກງານຂອງຕົນ ແລະທຳງານດ້ວຍນ້ຳເຫື່ອນ້ຳແຮງຂອງຕົນເອງ. 12.ເພື່ອຈະໄດ້ເປັນທີ່ເຄົາລົບນັບຖືຈາກຜູ້ອື່ນ ແລະບໍ່ຕ້ອງເພິ່ງພາອາໄສໃຜ.

ຜູ້ເປັນແລະຜູ້ຕາຍ ໃນມື້ພຣະອົງຈະສະເດັດມາ

13.ພີ່ນ້ອງທັງຫລາຍ, ເຮົາຢາກໃຫ້ພວກພີ່ນ້ອງຊາບເລື່ອງຄົນທີ່ລ່ວງລັບໄປແລ້ວ, ເພື່ອບໍ່ໃຫ້ພວກພີ່ນ້ອງຕ້ອງທຸກໂສກຄືພວກຄົນອື່ນ ທີ່ບໍ່ມີຄວາມໄວ້ໃຈ. 14.ດັ່ງນີ້, ຖ້າພວກເຮົາເຊື່ອວ່າ ພຣະເຢຊູເຈົ້າໄດ້ສິ້ນພຣະຊົນແລະກັບຄືນຊີບແລ້ວ, ພວກເຮົາກໍຕ້ອງເຊື່ອວ່າ ພຣະເປັນເຈົ້າ ຈະໃຫ້ພຣະເຢຊູພາພວກທີ່ລ່ວງລັບໄປແລ້ວນັ້ນ ມາພ້ອມກັບພຣະອົງ. 15.ເຮົາກ່າວກັບພວກພີ່ນ້ອງ ໂດຍອ້າງອິງຕາມຄຳສອນຂອງພຣະອົງເຈົ້າວ່າ: ພວກເຮົາຜູ້ຈະຍັງມີຊີວິດຢູ່ຈົນຮອດມື້ ພຣະອົງສະເດັດມານັ້ນ ຈະບໍ່ໄປກ່ອນພວກທີ່ລ່ວງລັບໄປແລ້ວດອກ, 16.ຍ້ອນວ່າ ເມື່ອໄດ້ຍິນອັກຄະເທວະດາຮ້ອງສັ່ງ ແລະສຽງແກຂອງພຣະເຈົ້າດັງຂຶ້ນ, ພຣະອົງເຈົ້າເອງຈະສະເດັດລົງມາຈາກສະຫວັນ. ແລ້ວນັ້ນ ພວກທີ່ລ່ວງລັບໄປໃນພຣະກຣິສໂຕ ຈະກັບເປັນຄືນມາກ່ອນ, 17.ຕໍ່ມາ ກໍແມ່ນພວກເຮົາຜູ້ຍັງຈະມີຊີວິດຢູ່ຈົນຮອດເວລານັ້ນ; ພວກເຮົາຈະຖືກຍົກຂຶ້ນໄປເທິງເມກພ້ອມກັບພວກເຂົາ ເພື່ອໄປພົບພຣະອົງເຈົ້າຢູ່ໃນເວຫາອາກາດ. ດັ່ງນີ້ ພວກເຮົາຈະຢູ່ກັບພຣະອົງເຈົ້າສະເໝີໄປ. 18.ໃຫ້ພວກພີ່ນ້ອງທຸເລົາໃຈກັນແລະກັນດ້ວຍຄວາມເວົ້າເຫລົ່ານີ້ເຖີດ.