ສົ່ງຕີໂມເທໄປເທຊາໂລນິກ

1.ດັ່ງນີ້, ເມື່ອເຫັນວ່າທົນໄປບໍ່ໄຫວອີກແລ້ວ, ພວກເຮົາກໍຍອມຢູ່ຜູ້ດຽວທີ່ກຸງອາແທນ. 2.ເຮົາໄດ້ສົ່ງຕີໂມເທ, ນ້ອງຊາຍແລະຜູ້ຮ່ວມງານຂອງພຣະເຈົ້າ ໃນການແຜ່ຜາຍຂ່າວປະເສີດຂອງພະ7ຣິສໂຕເຈົ້າ ມາຫາພວກພີ່ນ້ອງ ເພື່ອຊ່ວຍພວກພີ່ນ້ອງໃຫ້ໝັ້ນແກ່ນ ແລະເປັນກຳລັງໃຈໃນຄວາມເຊື່ອ. 3.ເພື່ອບໍ່ໃຫ້ມີໃຜວຸ້ນວາຍໃຈຍ້ອນເຫດການທີ່ເປັນມາຢູ່ດຽວນີ້, ຍ້ອນພວກພີ່ນ້ອງຮູ້ດີແລ້ວວ່າ ພວກເຮົາໄດ້ຖືກກຳໜົດໄວ້ສຳລັບສູ້ທົນຄວາມທຸກລຳບາກນີ້. 4.ເມື່ອເວລາຍັງຢູ່ກັບພວກພີ່ນ້ອງ, ພວກເຮົາກໍໄດ້ບອກລ່ວງໜ້າໄວ້ແລ້ວວ່າ ພວກເຮົາຈະຕ້ອງໄດ້ຮັບຄວາມຍາກລຳບາກຫລາຍ, ແລະກໍໄດ້ເປັນມາຈິງດັ່ງພວກພີ່ນ້ອງຮູ້ແລ້ວ. 5.ດ້ວຍເຫດນີ້, ເມື່ອເຫັນວ່າທົນໄປບໍ່ໄຫວແລ້ວ, ຂ້າພະເຈົ້າຈຶ່ງສົ່ງຕີໂມເທມາສືບເອົາຂ່າວ ເລື່ອງຄວາມເຊື່ອຂອງພວກພີ່ນ້ອງ, ຢ້ານວ່າພະຍາມານຈະຫລອກລວງໃຫ້ພວກພີ່ນ້ອງ ຫລົງຜິດໄປ ແລະວຽກການຂອງເຮົາຈະເສຍໄປລ້າໆ.

ຂອບພຣະຄຸນເມື່ອໄດ້ຮັບຂ່າວດີ

6.ດຽວນີ້ຕີໂມເທຜູ້ໄດ້ມາຢາມພວກພີ່ນ້ອງນັ້ນ ຫລົບເມືອຫາພວກເຮົາແລ້ວ, ເພິ່ນໄດ້ເລົ່າຂ່າວດີເຖິງຄວາມເຊື່ອແລະຄວາມຮັກຂອງພວກພີ່ນ້ອງສູ່ພວກເຮົາຟັງ, ແລະຍັງບອກວ່າ ພວກພີ່ນ້ອງຍັງຄິດຮອດຄິດເຖິງພວກເຮົາສະເໝີ, ແລະປາດຖະໜາຢ່າງແຮງກ້າຢາກເຫັນໜ້າພວກເຮົາ ຄືພວກເຮົາຢາກເຫັນໜ້າພວກພີ່ນ້ອງນັ້ນແລ້ວ. 7.ພີ່ນ້ອງທັງຫລາຍ, ຄວາມເຊື່ອຂອງພວກພີ່ນ້ອງນີ້ແລ້ວເປັນກຳລັງໃຈໃຫ້ພວກເຮົາ ໃນເວລາຕ້ອງທຸກຍາກລຳບາກຕ່າງໆ. 8.ດຽວນີ້ ພວກເຮົາມີຊີວິດສົດຊື່ນຂຶ້ນໄໝ່ ຍ້ອນເຫັນພວກພີ່ນ້ອງຕັ້ງໝັ້ນຄົງໃນພຣະເຈົ້າ. 9.ພວກເຮົາຈະຕ້ອງຂອບພຣະຄຸນພຣະເປັນເຈົ້າໃຫ້ມາກມາຍສັກພຽງໃດຍ້ອນພວກພີ່ນ້ອງ, ຈຶ່ງຈະເໝາະສົມກັບຄວາມປະຕິຍິນດີ ທີ່ໄດ້ຮັບຍ້ອນພວກພີ່ນ້ອງຕໍ່ພຣະພັກພຣະເຈົ້າ. 10.ພວກເຮົາພາວະນາທັງເວັນທັງຄືນ ຂໍໃຫ້ມີໂອກາດພົບໜ້າພົບຕາພວກພີ່ນ້ອງ ແລະຊ່ວຍໃຫ້ສິ່ງທີ່ຂາດຕົກບົກພ່ອງໃນຄວາມເຊື່ອຂອງພວກພີ່ນ້ອງນັ້ນ ໄດ້ຮັບຄວາມສົມບູນ. 11.ຂໍໃຫ້ພຣະເຈົ້າພຣະບິດາຂອງພວກເຮົາພຣະອົງເອງ ແລະພຣະເຢຊູເຈົ້າ ເປີດທາງໃຫ້ພວກເຮົາ ມາຫາພວກພີ່ນ້ອງໃຫ້ຈົງໄດ້. 12.ຂໍພຣະອົງເຈົ້າຈົ່ງບັນດານໃຫ້ພວກພີ່ນ້ອງຈະເລີນກ້າວໜ້າຂຶ້ນໃນຄວາມຮັກ ຊຶ່ງພວກພີ່ນ້ອງມີຕໍ່ກັນແລະກັນ ແລະຕໍ່ທຸກຄົນ ຕາມແບບຢ່າງຄວາມຮັກທີ່ພວກເຮົາມີຕໍ່ພວກພີ່ນ້ອງ. 13.ຂໍພຣະອົງບັນດານໃຫ້ຈິດໃຈຂອງພວກພີ່ນ້ອງແໜ້ນແກ່ນໃນຄວາມສັກສິດອັນແທ້ຈິງ ຕໍ່ພຣະພັກພຣະເຈົ້າພຣະບິດາຂອງເຮົາ. ເມື່ອພຣະເຢຊູກຣິສໂຕພຣະເຈົ້າຂອງເຮົາ ສະເດັດມາພ້ອມກັບພວກນັກບຸນຂອງພຣະອົງ.