ຈົດໝາຍຂອງນັກບຸນເປົາໂລຂຽນເຖິງສັດຕະບຸຣຸດຢູ່ເມືອງເທຊາໂລນິກ ສະບັບທີ 1

ຄຳນັບຖາມຂ່າວ

1.ຈາກຂ້າພະເຈົ້າເປົາໂລ, ພ້ອມກັບຊິນວາໂນແລະຕີໂມເທ, ເຖິງກຸ່ມກຣິສຕະຊົນເມືອງເທຊະໂລນິກ ຊຶ່ງຢູ່ໃນພຣະເຈົ້າພຣະບິດາແລະໃນອົງພຣະເຢຊູກຣິສໂຕເຈົ້າ. ຂໍພຣະຄຸນແລະສັນຕິ ສຸກຈົ່ງຢູ່ນຳພວກພີ່ນ້ອງເທີ້ນ.

ຄວາມເຊື່ອຂອງຊາວເມືອງເທຊາໂລນິກ

2.ພວກເຮົາສົມມະນາພຣະຄຸນພຣະເຈົ້າເພື່ອພວກພີ່ນ້ອງສະເໝີ, ແລະໃນເວລາພາວະນາ ພວກເຮົາກໍລຳລຶກເຖິງພວກພີ່ນ້ອງຢູ່ບໍ່ຂາດ. 3.ພວກເຮົາຍັງລະລຶກຕໍ່ພຣະພັກພຣະເຈົ້າພຣະບິດາຂອງເຮົາທັງຫລາຍ ເຖິງວຽກການທີ່ພວກພີ່ນ້ອງໄດ້ກະທຳດ້ວຍຄວາມເຊື່ອ, ໄດ້ສູ້ທົນຄວາມຍາກລຳບາກ ດ້ວຍຄວາມຮັກແລະພາກພຽນອົດທົນ, ດ້ວຍຄວາມໄວ້ວາງໃຈໃນພຣະເຢຊູ ກຣິສໂຕພຣະເຈົ້າຂອງເຮົາທັງຫລາຍ. 4.ພີ່ນ້ອງຜູ້ຍອດຮັກຂອງພຣະເຈົ້າເອີຍ, ພວກເຮົາຮູ້ວ່າ ພວກພີ່ນ້ອງແມ່ນຜູ້ພຣະເຈົ້າເລືອກສັນ, 5.ຍ້ອນວ່າພຣະວໍຣະສານຊຶ່ງພວກເຮົາປະກາດແກ່ພວກພີ່ນ້ອງນັ້ນ, ບໍ່ແມ່ນເປັນແຕ່ຄວາມເວົ້າເທົ່ານັ້ນ, ແຕ່ເຕັມດ້ວຍຣິດທານຸພາບ ໂດຍມີພຣະຈິດເຈົ້າຊ່ວຍຊູອີກດ້ວຍ. ຕາມຈິງ ພວກພີ່ນ້ອງກໍຮູ້ດີວ່າ ພວກເຮົາໄດ້ປະຕິບັດຢ່າງໃດໃນໝູ່ພວກພີ່ນ້ອງ ເພື່ອຄວາມດີຂອງພວກພີ່ນ້ອງເອງ. 6.ສ່ວນພວກພີ່ນ້ອງເອງກໍໄດ້ເອົາຢ່າງພວກເຮົາ ແລະເອົາຢ່າງພຣະອົງເຈົ້າ ໂດຍຮັບເອົາພຣະວາຈາດ້ວຍຄວາມຍິນດີຂອງພຣະຈິດ ໃນເວລາຖືກຍາກລຳບາກຕ່າງໆ. 7.ຈົນໄດ້ກາຍເປັນແບບຢ່າງໃຫ້ພວກທີ່ມີຄວາມເຊື່ອທຸກຄົນ ໃນແຂວງມາເຊດວນແລະອາກາຢາ. 8.ຍ້ອນວ່າພຣະວາຈາຂອງພຣະເຈົ້າໄດ້ແຜ່ຜາຍອອກຈາກພວກພີ່ນ້ອງ ໄປຫາ ບໍ່ແມ່ນແຕ່ໃນແຂວງມາເຊດວນແລະອາກາຢາເທົ່ານັ້ນ, ແຕ່ຄວາມເຊື່ອຂອງພວກພີ່ນ້ອງໃນພຣະເຈົ້ານັ້ນ ຍັງໄດ້ແຜ່ໄປທົ່ວທຸກບ່ອນອີກ ຈົນພວກເຮົາບໍ່ຈຳເປັນເວົ້ົ້າເຖິງອີກ. 9.ບໍ່ວ່າຢູ່ບ່ອນໃດ, ໃຜໆກໍເລົ່າລືເຖິງການຕ້ອນຮັບອັນອົບອຸ່ນ ທີ່ພວກພີ່ນ້ອງທຳຕໍ່ພວກເຮົາ, ແລະຍັງເລົ່າລືເຖິງການທີ່ພວກພີ່ນ້ອງໄດ້ປະຖິ້ມພະເທັດທຽມ ເພື່ອຫັນມາຮັບໃຊ້ພະເຈົ້ົ້າຜູ້ຊົງຊີວິດແລະທ່ຽງແທ້, 10.ແລະເພື່ອຄອງຖ້າພຣະບຸດຂອງພຣະອົງຈາກສະຫວັນ ຄືພຣະເຢຊູກຣິສໂຕ ຜູ້ພຣະອົງໄດ້ໃຫ້ກັບຄືນຊີບຈາກບັນດາຜູ້ຕາຍ. ເພື່ອຊ່ວຍພວກເຮົາໃຫ້ພົ້ົ້ນຈາກພະພິໂລດໃນພາຍໜ້າ.