1.ສ່ວນຜູ້ເປັນນາຍ, ຈົ່ງສຳແດງຄວາມຍຸຕິທຳ ແລະມີໃຈເປັນທຳຕໍ່ຜູ້ເປັນລູກນ້ອງ ໂດຍຮູ້ວ່າ ຕົວທ່ານເອງກໍມີນາຍຜູ້ໜຶ່ງຢູ່ສະຫວັນດ້ວຍ. 2.ຈົ່ງໝັ່ນພຽນໃນການພາວະນາ. ຈົ່ງເຝົ້າງັນພາວະນາຂອບພຣະຄຸນພຣະເປັນເຈົ້າ. 3.ແລະຂໍໃຫ້ສວດພາວະນາຊ່ວຍພວກເຮົາດ້ວຍ, ຂໍພຣະເຈົ້າໂຜດໃຫ້ພວກເຮົາມີຊ່ອງທາງເທດສອນໂດຍສະດວກສະບາຍ ເພື່ອຈະໄດ້ປ່າວປະກາດຂໍ້ເລິກລັບຂອງພຣະກຣິສໂຕ. ຍ້ອນຂໍ້ນີ້ແລ້ວ ຂ້າພະເຈົ້າຈຶ່ງຖືກຄຸມຂັງຢູ່ດຽວນີ້. 4.ຂໍໃຫ້ຂ້າພະເຈົ້າໄດ້ປ່າວປະກາດຂໍ້ເລິກລັບນັ້ນ ຕາມໜ້າທີ່ຂອງຕົນ. 5.ຈົ່ງສະຫລາດສະຫລຽວໃນການຕິດຕໍ່ກັບຄົນຕ່າງສາດສະໜາ. ຈົ່ງຮູ້ຈັກສວຍໂອກາດທີ່ພົບພໍ້ໃຫ້ເກີດປະໂຫຍດ. 6.ຂໍໃຫ້ຄວາມປາກຄວາມເວົ້າຂອງພວກພີ່ນ້ອງເປັນທີ່ຈັບຈິດຈັບໃຈຜູ້ອື່ນ, ເໝາະສົມກັບກາລະເທສະແລະຜູ້ຟັງ, ທັງຮູ້ຈັກໃຫ້ຄຳຕອບທີ່ພໍອົກພໍໃຈແກ່ທຸກຄົນດ້ວຍ.

ຂ່າວສ່ວນຕົວ

7.ສ່ວນເລື່ອງການເປັນຢູ່ຂອງຂ້າພະເຈົ້ານັ້ນ, ທ່ານຕີກີໂກຈະຂ່າວໃຫ້ພວກພີ່ນ້ອງຊາບ ດອກ. ເພິ່ນເປັນນ້ອງທີ່ຮັກຂອງຂ້າພະເຈົ້າ, ເປັນຜູ້ຊ່ວຍວຽກທີ່ສັດຊື່ ແລະເປັນເພື່ອນຮ່ວມງານໃນພຣະອົງເຈົ້າດ້ວຍ. 8. ຂ້າພະເຈົ້າຕັ້ງສົ່ງເພິ່ນມາຫາພວກພີ່ນ້ອງ ເພື່ອຂ່າວການເປັນຢູ່ຂອງພວກເຮົາໃຫ້ພວກພີ່ນ້ອງຊາບ ທັງເປັນກຳລັງໃຈໃຫ້ພວກພີ່ນ້ອງອີກ. 9.ທ່ານໂອນາຊິມ, ນ້ອງຜູ້ສັດຊື່ແລະທີ່ຮັກຍິ່ງ, ກໍຈະມານຳທ່ານຕີກີໂກດ້ວຍ. ເພິ່ນເປັນຄົນເມືອງດຽວກັບພວກພີ່ນ້ອງ. 10.ທ່ານອາຣິດສະຕັກໂກ ຜູ້ຖືກຄຸກກັບຂ້າພະເຈົ້າ ຝາກຄວາມຢາມພວກພີ່ນ້ອງ. ທ່ານມັກໂກ, ນ້ອງຂອງບາກນາບາ, ກໍຝາກຄວາມຢາມພວກພີ່ນ້ອງດ້ວຍ. ສ່ວນເລື່ອງທ່ານມັກໂກນັ້ນ, ພວກພີ່ນ້ອງກໍໄດ້ຮັບຄຳຊີ້ແຈງມາແລ້ວ. ຖ້າເພິ່ນມາຢາມ, ຂໍໃຫ້ພວກພີ່ນ້ອງຕ້ອນຮັບເພິ່ນຢ່າງດີ. 11.ທ່ານເຊຊູອາ, ຜູ້ມີນາມນ້ອຍວ່າຢຸດສະໂຕນັ້ນ, ກໍຝາກຄວາມຢາມພວກພີ່ນ້ອງດ້ວຍ. ໃນບັນດາພວກທີ່ຮັບສິນຕັດ (ຊາວຢິວ), ມີແຕ່ພວກນີ້ແລ້ວທຳງານຮ່ວມກັບຂ້າພະເຈົ້າ ໃນການແຜ່ຜາຍພຣະຣາໄຊຂອງພຣະເຈົ້າ. ພວກເພິ່ນເປັນຄວາມບັນເທົາໃຈຂອງຂ້າພະເຈົ້າ. 12.ທ່ານເອປາຟຣັດ, ຄົນເມືອງດຽວກັບພວກພີ່ນ້ອງ, ກໍຝາກຄວາມຢາມດ້ວຍ. ຜູ້ຮັບໃຊ້ຂອງພຣະກຣິສໂຕຜູ້ນີ້ ໄດ້ສູ້ຮົບເພື່ອພວກພີ່ນ້ອງໃນຄຳພາວະນາຢ່າງບໍ່ຂາດສາຍ, ເພື່ອໃຫ້ພວກພີ່ນ້ອງໄດ້ໝັ້ນໜຽວ, ເປັນຜູ້ບໍລິບູນ ແລະເຕັມໃຈນອບນ້ອມຕາມນ້ຳພຣະໄທພຣະເຈົ້າທຸກປະການ. 13. ຂ້າພະເຈົ້າຂໍຢືນຢັນວ່າ ເພິ່ນຍອມເສຍສະລະຢ່າງມາກມາຍເພື່ອພວກພີ່ນ້ອງ, ເພື່ອກຣິສຕະຊົນຊາວເມືອງເລົາດີເຊແລະອີເອຣາໂປລີ. 14.ທ່ານລູກາ, ນາຍໝໍທີ່ຮັກ ແລະທ່ານເດມາ ກໍຝາກຄວາມຢາມພວກພີ່ນ້ອງດ້ວຍ. 15.ຂໍຝາກຄວາມຢາມພວກພີ່ນ້ອງຢູ່ເມືອງເລົາດີເຊ, ຝາກຄວາມຢາມນາງນິມຟາ ພ້ອມທັງພວກກຣິສຕະຊົນທີ່ອາໄສຢູ່ເຮືອນນາງ. 16.ເມື່ອພວກພີ່ນ້ອງໄດ້ອ່ານຈົດໝາຍຂອງຂ້າພະເຈົ້າແລ້ວ, ຂໍສົ່ງຕໍ່ໄປຫາກຸ່ມກຣິສຕະຊົນຢູ່ເມືອງເລົາດີເຊ ໃຫ້ເຂົາໄດ້ອ່ານດ້ວຍ. 17.ຂໍບອກກັບອັກກຣິບປາແດ່ວ່າ: “ຈົ່ງປະຕິບັດໜ້າທີ່ທີ່ພຣະເປັນເຈົ້າມອບໝາຍໃຫ້ນັ້ນ ສຳເລັດໄປຢ່າງດີ”. 18. ຂ້າພະເຈົ້າເປົາໂລ ຂໍຝາກຄວາມຢາມພວກພີ່ນ້ອງ ດ້ວຍລາຍມືຂອງຂ້າພະເຈົ້າເອງ. ຂໍລະລຶກເຖິງຂ້າພະເຈົ້າຜູ້ກຳລັງຖືກໂສ້ມັດລ່າມໄວ້ຢູ່ດຽວນີ້. ຂໍພຣະຄຸນສະຖິດຢູ່ກັບພວກພີ່ນ້ອງທຸກຄົນເທີ້ນ!