ຈົດໝາຍຂອງນັກບຸນເປົາໂລຂຽນເຖິງສັດຕະບຸຣຸດຢູ່ເມືອງໂກໂລຊາ

ຄຳນັບຖາມຂ່າວ

1.ຈາກຂ້າພະເຈົ້າເປົາໂລ ອັກຄະທຳມະທູດຂອງພຣະເຢຊູກຣິສໂຕເຈົ້າ, ຕາມນ້ຳພຣະໄທຂອງພຣະເຈົ້າ, ພ້ອມທັງຕີໂມເທຜູ້ນ້ອງຊາຍ. 2.ເຖິງພວກພີ່ນ້ອງກຣິສຕະຊົນ ແລະພວກທີ່ມີຄວາມເຊື່ອໝັ້ນໜຽວໃນພຣະກຣິສໂຕເຈົ້າ ຢູ່ເມືອງໂກໂລຊາ, ຂໍພຣະຄຸນແລະສັນຕິສຸກທີ່ມາຈາກພຣະເຈົ້າພຣະບິດາ ຈົ່ງສະຖິດຢູ່ນຳພວກທ່ານເທີ້ນ.

ຂອບພຣະຄຸນຍ້ອນພຣະວໍຣະສານ

3.ເມື່ອພວກເຮົາວິງວອນພາວະນາເພື່ອພວກພີ່ນ້ອງ, ພວກເຮົາກໍຂອບພຣະຄຸນພຣະເປັນເຈົ້າ ພຣະບິດາຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ ຢູ່ສະເໝີ. 4.ຍ້ອນພວກເຮົາໄດ້ຮູ້ຂ່າວເຖິງຄວາມເຊື່ອອັນໜຽວແໜ້ນຂອງພວກພີ່ນ້ອງໃນພຣະກຣິສໂຕເຢຊູ ແລະເລື່ອງຄວາມຮັກຊຶ່ງພວກພີ່ນ້ອງມີຕໍ່ໝູ່ກຣິສຕະຊົນທັງຫລາຍ. 5.ດ້ວຍວ່າພວກພີ່ນ້ອງມີຄວາມຫວັງຈະໄດ້ຮັບບຳເໜັດ ທີ່ໄດ້ສະຫງວນໄວ້ສຳລັບພວກພີ່ນ້ອງໃນສະຫວັນແລ້ວ ພວກພີ່ນ້ອງໄດ້ຟັງປະກາດເລື່ອງຄວາມຫວັງນີ້ຈາກພຣະວາຈາແຫ່ງຄວາມຈິງ ຄື ພຣະວໍຣະສານ 6.ຊຶ່ງແຜ່ຜາຍມາເຖິງພວກພີ່ນ້ອງ ດັ່ງທີ່ກຳລັງເກີດດອກອອກຜົນແລະຈະເລີນເຕີບໂຕຂຶ້ນຢູ່ທົ່ວພິພົບ, ດັ່ງດຽວກັບທີ່ກຳລັງເກີດດອກອອກຜົນ ແລະຈະເລີນຂຶ້ນໃນຕົວພວກພີ່ນ້ອງ, ນັບແຕ່ມື້ພວກພີ່ນ້ອງໄດ້ຟັງແລະເຂົ້າໃຈພຣະຄຸນຂອງພຣະເປັນເຈົ້າໃນຄວາມຈິງ, 7.ຕາມທີ່ທ່ານເອປາຟຣາ ເພື່ອນຮ່ວມງານທີ່ຮັກຂອງພວກເຮົາ ໄດ້ສັ່ງສອນພວກພີ່ນ້ອງ ເພິ່ນທຳງານແທນພວກເຮົາດ້ວຍຄວາມສັດຊື່ ໃນຖານະເປັນຜູ້ຮັບໃຊ້ພຣະກຣິສໂຕເຈົ້າ. 8.ແມ່ນເພິ່ນເອງໄດ້ເລົ່າໃຫ້ພວກເຮົາຟັງວ່າ ພຣະເຈົ້າໄດ້ບັນດານໃຫ້ພວກພີ່ນ້ອງເກີດມີຄວາມຮັກອັນແຮງກ້າສັກພຽງໃດ. 9.ດ້ວຍເຫດນີ້ ນັບຕັ້ງແຕ່ໄດ້ຮັບຂ່າວນັ້ນ ພວກເຮົາກໍວິງວອນພາວະນາເພື່ອພວກພີ່ນ້ອງຢ່າງບໍ່ຢຸດບໍ່ເຊົາ. ພວກເຮົາວອນຂໍພຣະເປັນເຈົ້າ ໂຜດໃຫ້ພວກພີ່ນ້ອງເຕັມພຽບດ້ວຍຄວາມຮູ້ເຖິງນ້ຳພຣະໄທຂອງພຣະອົງ ເຕັມພຽບດ້ວຍຄວາມສະຫລາດສຸຂຸມ ແລະຄວາມເຂົ້າໃຈເລິກເຊິ່ງໃນວິນຍານ, 10.ເພື່ອພວກພີ່ນ້ອງຈະໄດ້ຈຳເລີນຊີວິດໃຫ້ສົມກັບພຣະເປັນເຈົ້າ ແລະເປັນທີ່ຊອບພຣະໄທພຣະອົງໃນທຸກຢ່າງ ແລ້ວພວກພີ່ນ້ອງຈະໄດ້ຫ້າວຫັນ ມັກຊອບທຳຄວາມດີໃຫ້ເກີດຜົນອຸດົມໃນທຸກດ້ານ ແລະຈະເລີນກ້າວໜ້າໃນຄວາມຮູ້ເຖິງພຣະເປັນເຈົ້າດ້ວຍ. 11.ພວກພີ່ນ້ອງຈະໄດ້ຮັບພາລະກຳລັງມາກຂຶ້ນໃນທຸກດ້ານ ດ້ວຍອາໄສລິດເດດແຫ່ງສີມຸງຄຸນຂອງພຣະອົງ ອັນຈະພາໃຫ້ພວກພີ່ນ້ອງມີຄວາມຂະຫຍັນໝັ່ນພຽນ ແລະຄວາມອົດທົນໃນທຸກຢ່າງໄດ້.

ບົດເພງສັນຣະເສີນພຣະກຣິສໂຕເຈົ້າຜູ້ເປັນເຈົ້າແຫ່ງໂລກພິພົບ

12.ຈົ່ງປິຕິຍິນດີຂອບພຣະຄຸນພຣະບິດາເຈົ້າ ຜູ້ໄດ້ຊົງປະທານໃຫ້ພວກເຮົາສົມໄດ້ຮັບສ່ວນມໍລະດົກກັບພວກນັກບຸນໃນຄວາມສະຫວ່າງ. 13.ພຣະອົງໄດ້ຊົງດຶງພວກເຮົາອອກຈາກອຳນາດຂອງຄວາມມືດ ແລະພາເຂົ້າມາໃນອານາຈັກແຫ່ງພຣະບຸດສຸດທີ່ຮັກຂອງພຣະອົງ. 14.ໃນອົງ ພຣະບຸດນີ້ແຫລະ ພວກເຮົາໄດ້ຮັບການກູ້ໄຖ່ ແລະການອະໄພບາບທັງມວນ. 15.ພຣະອົງຊົງເປັນຮູບແບບຂອງພຣະເຈົ້າທີ່ເຮົາແລເຫັນບໍ່ໄດ້, ຊົງມີກຳເນີດກ່ອນທຸກສິ່ງທີ່ພຣະເຈົ້າຊົງສ້າງມາ. 16.ດ້ວຍວ່າສັບພະສິ່ງໄດ້ຖືກສ້າງໃນພຣະອົງ ຈະແມ່ນຢູ່ສະຫວັນ, ຢູ່ແຜ່ນດິນ, ທີ່ແນມເຫັນໄດ້ແລະແນມເຫັນບໍ່ໄດ້ກໍຕາມ, ບໍ່ວ່າເທບນິກອນ ຄະນະພະທີ່ນັ່ງ ຄະນະນາຍ ຄະນະເຈົ້າ ຫລືຄະນະມີອຳນາດກໍຕາມ, ທຸກສິ່ງໄດ້ຖືກສ້າງຂຶ້ນມາ ດ້ວຍອາໄສພຣະອົງແລະເພື່ອ ພຣະອົງ 17.ພຣະອົງເປັນຢູ່ກ່ອນທຸກຢ່າງ ແລະທຸກຢ່າງດຳຣົງຢູ່ໃນພຣະອົງ. 18.ພຣະອົງເປັນສີສະຂອງຮ່າງກາຍ ຊຶ່ງແມ່ນພຣະກຣິສຕະຈັກ ພຣະອົງເປັນກົກເຄົ້າ ເປັນຜູ້ກັບຄືນຊີບກ່ອນໝູ່ໃນພວກຜູ້ຕາຍ ເພື່ອຈະໄດ້ມີຕຳແໜ່ງເປັນທີໜຶ່ງໃນທຸກສິ່ງ. 19.ຍ້ອນພຣະບິດາຊົງພໍພຣະໄທໃຫ້ພຣະອົງຊົງຄວາມບໍລິບູນທຸກຢ່າງ 20.ໃຫ້ທຸກສິ່ງຢູ່ແຜ່ນດິນຫລືຢູ່ສະຫວັນ ໄດ້ເຂົ້າດີກັບພະ ເຈົ້າ ໂດຍອາໄສພຣະອົງຜູ້ໄດ້ສ້າງສັນຕິສຸກ ເດຊະພຣະໂລຫິດທີ່ພຣະອົງໄດ້ຫລັ່ງໄຫລຢູ່ເທິງກາງເຂນ.

21.ແຕ່ກ່ອນພວກພີ່ນ້ອງເປັນຄົນແປກໜ້າບໍ່ຮູ້ຈັກພຣະເປັນເຈົ້າ ແລະໄດ້ທຳກິດຈະການບໍ່ດີຕ່າງໆ ເປັນປໍລະປັກຕໍ່ພຣະອົງ. 22.ເຫັນບໍ ດຽວນີ້ພຣະເປັນເຈົ້າໄດ້ທຳໃຫ້ພວກພີ່ນ້ອງເຂົ້າດີກັບພຣະອົງ ຢູ່ໃນພຣະກາຍອັນຕາຍເປັນຂອງພຣະເຢຊູເຈົ້າ ເພື່ອໃຫ້ພວກພີ່ນ້ອງເປັນຜູ້ສັກສິດ,ປາດສະຈາກມົນທິນແລະຄຳຕ້ອງຕິຕ່າງໆຕໍ່ພຣະພັກພຣະອົງ ດ້ວຍອາໄສການສິ້ນພຣະຊົນຂອງພຣະບຸດເຈົ້າ. 23.ຂໍແຕ່ໃຫ້ພວກພີ່ນ້ອງໝັ້ນຄົງ ແລະແໜ້ນໜາຖາວອນໃນຄວາມເຊື່ອ. ໂດຍບໍ່ປ່ອຍຕົວໃຫ້ເຫີນຫ່າງຈາກຄວາມຫວັງທີ່ພຣະວໍຣະສານໄດ້ກ່າວໄວ້ ດັ່ງທີ່ພວກພີ່ນ້ອງເອງໄດ້ຍິນມາແລ້ວ. ບັດນີ້ ກໍໄດ້ມີການປະກາດພຣະວໍຣະສານນັ້ນແກ່ມວນມະນຸດທົ່ວໂລກ. ແລະຂ້າພະເຈົ້າເອງ ຄືເປົາໂລ ກໍເປັນຜູ້ປະກາດຜູ້ໜຶ່ງດ້ວຍ.

ການຕໍ່ສູ້ຂອງອັກຄະທຳມະທູດ

24.ບັດນີ້ ຂ້າພະເຈົ້າມີຄວາມຍິນດີ ຍ້ອນໄດ້ຮັບຄວາມທຸກທໍຣະມານເພື່ອພວກພີ່ນ້ອງ. ມີຄວາມທຸກໃດທີ່ຍັງຂາດຢູ່ໃນມະຫາທໍຣະມານຂອງພຣະກຣິສໂຕ ເພື່ອພຣະກາຍຂອງພຣະອົງ ອັນແມ່ນພຣະກຣິສຕະຈັກນັ້ນ, ຂ້າພະເຈົ້າກໍຮັບທົນເອົາຈົນສຳເລັດ ຢູ່ໃນເນື້ອໜັງຂອງຂ້າພະເຈົ້າເອງ. 25. ຂ້າພະເຈົ້າເປັນຜູ້ຮັບໃຊ້ຂອງພຣະກຣິສຕະຈັກ ແລະມີໜ້າທີ່ຕາມພຣະເປັນເຈົ້າໄດ້ມອບໝາຍໃຫ້ ຄືສອນພວກພີ່ນ້ອງໃຫ້ຮູ້ຈັກພຣະວາຈາຂອງພຣະອົງຢ່າງຄົບຖ້ວນ. 26.ອັນແມ່ນຂໍ້ເລິກລັບຊຶ່ງຖືກປົກປິດໄວ້ແຕ່ໃດໆມາໃນທຸກເຊັ່ນທຸກສະໄໝ ແຕ່ດຽວນີ້ຂໍ້ເລິກລັບນັ້ນໄດ້ເປີດເຜີຍອອກ ໃຫ້ປະຊາກອນສັກສິດຂອງພຣະອົງຮູ້ເຫັນແລ້ວ 27.ຍ້ອນພຣະເປັນເຈົ້າຊົງພໍພຣະໄທໃຫ້ພວກເຂົາຮູ້ວ່າ ສີມຸງຄຸນອັນລ້ຳເລີດແຫ່ງຂໍ້ເລິກລັບທີ່ປາກົດຢູ່ກາງນານາຊາດນັ້ນ ແມ່ນພຣະກຣິສໂຕສະຖິດຢູ່ກາງພວກພີ່ນ້ອງ ພຣະອົງເປັນຄວາມຫວັງທີ່ພາໄປເຖິງສີມຸງຄຸນ. 28.ແມ່ນພຣະກຣິສໂຕນີ້ແຫລະ ທີ່ພວກເຮົາປ່າວປະກາດຢູ່ດຽວນີ້. ພວກເຮົາຕຸກເຕືອນແລະສັ່ງສອນທຸກຄົນ ດ້ວຍຄວາມສະຫລຽວສະຫລາດສຸດຄວາມສາມາດ ເພື່ອຊ່ວຍທຸກຄົນໃຫ້ເປັນຜູ້ສັກສິດບໍລິບູນໃນພຣະກຣິສໂຕເຈົ້າ. 29.ຍ້ອນອັນນີ້ແຫລະ, ຂ້າພະເຈົ້າຈຶ່ງບາກບັ່ນທຳງານແລະຕໍ່ສູ້ ດ້ວຍອາໄສພາລະກຳລັງອັນຊົງລິດຂອງພຣະອົງຢູ່ໃນຕົວຂ້າພະເຈົ້າ.