ໜ້າທີ່ຂອງລູກຕໍ່ພໍ່ແມ່ ແລະໜ້າທີ່ຂອງພໍ່ແມ່ຕໍ່ລູກ

1.ສ່ວນພວກເຈົ້າຜູ້ເປັນລູກ, ຈົ່ງເຊື່ອຟັງບິດາມານດາຍ້ອນເຫັນແກ່ພຣະເຈົ້າ ນີ້ແມ່ນການກະທຳທີ່ຖືກຕ້ອງ 2.“ຈົ່ງນັບຖືບິດາມານດາ” ນີ້ແມ່ນພຣະບັນຢັດປະການທີໜຶ່ງ ຊຶ່ງມີພຣະສັນຍາຕິດຕາມໄປພ້ອມ ຄື: 3.“ແລ້ວພວກເຈົ້າຈະມີຄວາມຜາສຸກ ແລະມີອາຍຸຍືນນານໃນແຜ່ນດິນນີ້”, 4.ສ່ວນພວກເຈົ້າຜູ້ເປັນພໍ່ແມ່, ຢ່າທຳໃຫ້ລູກເຕົ້າເຄືອງໃຈເກີນໄປ, ແຕ່ໃຫ້ອົບຮົມສັ່ງສອນເຂົາດ້ວຍການດັດນິໄສ ແລະໃຫ້ຄຳຕຸກເຕືອນແນະນຳຕາມຄຳສອນຂອງພຣະເຈົ້າ. 5.ສ່ວນພວກເປັນຜູ້ຮັບໃຊ້ກໍຈົ່ງເຊື່ອຟັງຜູ້ເປັນນາຍໃນໂລກນີ້ ດ້ວຍຄວາມເຄົາລົບຢຳເກງ ດ້ວຍໃຈຈິງ ເໝືອນດັ່ງນອບນ້ອມເຊື່ອຟັງພຣະກຣິສໂຕເຈົ້າ. 6.ບໍ່ແມ່ນເພິ່ນຈອບແນມ, ຈົ່ງເຮັດດີແຕ່ຕໍ່ໜ້າເພື່ອໃຫ້ຖືກໃຈຄົນ, ແຕ່ຈົ່ງທຳດັ່ງຜູ້ຮັບໃຊ້ຂອງພຣະກຣິສໂຕ ຄືທຳຕາມນ້ຳ ພຣະໄທຂອງພຣະເຈົ້າດ້ວຍເຕັມໃຈ. 7.ຈົ່ງຮັບໃຊ້ນາຍດ້ວຍໃຈຊື່ນບານ, ຄືດັ່ງຮັບໃຊ້ພຣະເຈົ້າບໍ່ແມ່ນຮັບໃຊ້ຄົນ. 8.ພີ່ນ້ອງກໍຮູ້ດີວ່າ ຜູ້ໃດກໍຈະໄດ້ຮັບຕອບແທນຈາກພຣະເຈົ້າ ຕາມຄວາມດີຄວາມຊອບທີ່ໄດ້ກະທຳໄວ້, ແມ່ນວ່າເຂົາຈະເປັນຂ້ອຍທາດຫລືມີເສລີກໍຕາມ. 9.ສ່ວນພວກທ່ານຜູ້ເປັນນາຍ, ຈົ່ງປະຕິບັດດັ່ງດຽວກັນ. ຈົ່ງຫລີກເວັ້ນການຂົ່ມຂູ່, ຍ້ອນພວກທ່ານກໍຮູ້ດີແລ້ວວ່າ ພຣະອົງຜູ້ເປັນນາຍຂອງທ່ານແລະຂອງເຂົາ ສະຖິດຢູ່ສະຫວັນ ແລະພຣະອົງບໍ່ມີຮັກບັງຊັງບ່ຽງເລີຍ. 

ຄວາມກ້າຫານແລະຄວາມຮອບຄອບ

ອາວຸດຂອງພຣະເປັນເຈົ້າ

10.ທ້າຍສຸດນີ້, ພວກພີ່ນ້ອງຈົ່ງເປັນຜູ້ເຂັ້ມແຂງໃນພຣະເຈົ້າ, ແລະເຂັ້ມແຂງດ້ວຍຣິດທານຸພາບຂອງພຣະອົງ. 11.ຈົ່ງສວມເສື້ອເຫລັກຂອງພຣະເຈົ້າ ເພື່ອສາມາດຕໍ່ຕ້ານກັບເລ່ກົນຂອງຜີປີສາດ. 12.ຍ້ອນວ່າພວກເຮົາບໍ່ໄດ້ຕໍ່ສູ້ກັບມະນຸດທຳມະດາ, ແຕ່ຕໍ່ສູ້ກັບເທບນິກອນຜູ້ປົກຄອງ, ຜູ້ມີອຳນາດ ແລະຜູ້ເປັນເຈົ້າໂລກອັນມືດມົວນີ້, ຕໍ່ສູ້ກັບຈິດຊົ່ວຮ້າຍໃນອາກາດ. 13.ດ້ວຍເຫດນີ້ ຈົ່ງສວມເສື້ອເຫລັກຂອງພຣະເຈົ້າ, ເພື່ອຈະສາມາດຕໍ່ຕ້ານແລະໝັ້ນໜຽວໃນວັນອັນຊົ່ວຮ້າຍນັ້ນ. ແລະເມື່ອໄດ້ໃຊ້ທຸກວິທີແລ້ວ, ພວກພີ່ນ້ອງກໍຈະຢືນຢູ່ຢ່າງໝັ້ນໜຽວໄດ້. 14.ດັ່ງນີ້ ຈົ່ງຢືນກົງ! ເອົາຄວາມຈິງມາເປັນມັດແອວ, ເອົາຄວາມຊອບທຳມາເປັນເສື້ອເຫລັກ 15.ແລະເອົາຄວາມຮ້ອນເຮັ່ງສັດທາໃນການແຜ່ຂ່າວປະເສີດແຫ່ງສັນຕິສຸກ ມາເປັນເກີບໃສ່ຕີນ, 16.ເອົາຄວາມເຊື່ອມາເປັນເຂນ ເພື່ອໃຊ້ມອດລູກສອນໄຟຂອງຜີປີສາດ. 17.ຈົ່ງເອົາຄວາມຮອດເປັນໝວກເຫລັກສຸບຫົວ ແລະຖືງ້າວຂອງພຣະຈິດ ອັນແມ່ນພຣະວາຈາຂອງພຣະເຈົ້າ. 18.ຂໍພຣະຈິດເຈົ້າດົນບັນດານໃຫ້ພວກພີ່ນ້ອງສວດພາວະນາໃນແບບຕ່າງໆ ເພື່ອຄວາມຕ້ອງການຂອງຕົນໃນທຸກໂອກາດ. ຈົ່ງເຝົ້າລະວັງສະເໝີ ແລະວິງວອນພາວະນາເພື່ອໝູ່ກຣິສຕະຊົນທຸກຄົນ 19.ແລະເພື່ອຂ້າພະເຈົ້າດ້ວຍ, ເພື່ອຈະໄດ້ເປີດປາກອອກປ່າວປະກາດຂໍ້ເລິກລັບແຫ່ງພຣະວໍຣະສານຢ່າງອົງອາດກ້າຫານ. 20. ຂ້າພະເຈົ້າເປັນທູດທີ່ຖືກຄຸມຂັງຢູ່ຍ້ອນພຣະວໍຣະສານນີ້. ຂໍໃຫ້ຂ້າພະເຈົ້າມີຄວາມກ້າຫານປະກາດພຣະວໍຣະສານ ດັ່ງທີ່ໄດ້ຕັ້ງໃຈໄວ້.

ຄຳມ້ວນທ້າຍ

21. ຂ້າພະເຈົ້າຢາກໃຫ້ພວກພີ່ນ້ອງຮູ້ວ່າ ຂ້າພະເຈົ້າເປັນຢູ່ຢ່າງໃດ ແລະກຳລັງເຮັດຫຍັງ. ຕີກີໂກ, ນ້ອງຊາຍທີ່ຮັກຂອງຂ້າພະເຈົ້າ ແລະຜູ້ຮັບໃຊ້ທີ່ສັດຊື່ໃນພຣະອົງເຈົ້າ ຈະເລົ່າໃຫ້ພວກ ພີ່ນ້ອງຟັງທຸກຢ່າງ. 22. ຂ້າພະເຈົ້າຕັ້ງສົ່ງເພິ່ນມາຫາພວກພີ່ນ້ອງ ເພື່ອຂ່າວໃຫ້ຮູ້ວ່າ ເຮົາເປັນແນວໃດດຽວນີ້ ແລະເພື່ອໃຫ້ກຳລັງໃຈແກ່ພວກພີ່ນ້ອງດ້ວຍ. 23.ຂໍພຣະເປັນເຈົ້າພຣະບິດາ ແລະພຣະເຢຊູກຣິສໂຕເຈົ້າ ປະທານສັນຕິສຸກ, ຄວາມຮັກ ແລະຄວາມສັດທາແກ່ພວກພີ່ນ້ອງ. 24.ຂໍພຣະພອນຈົ່ງສະຖິດຢູ່ກັບທຸກຄົນ ທີ່ຮັກແພງພຣະເຢຊູກຣິສໂຕ ພຣະເຈົ້າຂອງເຮົາ ຢ່າງບໍ່ມີວັນເສື່ອມສູນ.