1.ຈົ່ງເອົາຢ່າງພຣະເຈົ້າຄືລູກສຸດທີ່ຮັກຂອງພຣະອົງ. 2.ຈົ່ງປະພຶດຕົນຢູ່ໃນຄວາມຮັກ ຄືພຣະກຣິສໂຕໄດ້ຊົງຮັກພວກເຮົາ ແລະຊົງມອບພຣະອົງເອງເປັນເຄື່ອງບັນນາການ ແລະເຄື່ອງບູຊາອັນຊົງກິ່ນຫອມແດ່ພຣະເຈົ້າ ເພື່ອອຸທິດໃຫ້ພວກເຮົາ. 3.ສ່ວນເລື່ອງການລ່ວງປະເວນີ, ຄວາມຊົ່ວຊ້າລາມົກຕ່າງໆ ແລະຄວາມໂລບໂລພານັ້ນ, ຢ່າໃຫ້ມີຂຶ້ນໃນໝູ່ພວກພີ່ນ້ອງເລີຍ ດັ່ງນີ້ຈຶ່ງຈະເໝາະສົມກັບຜູ້ສັກສິດ. 4.ຄວາມເວົ້າຫຍາບຄາຍບໍ່ມີແກ່ນສານ ແລະຄວາມເວົ້າເຫລວໄຫລເຫລົ່ານີ້ເປັນການບໍ່ສົມຄວນ. ຈົ່ງຂອບພຣະຄຸນພຣະເປັນເຈົ້າດີກວ່າ. 5.ພວກພີ່ນ້ອງຈົ່ງຮູ້ໄວ້ເຖີດວ່າ ຄົນລ່ວງປະເວນີ, ຄົນລາມົກແລະໂລບມາກນັ້ນ (ຊຶ່ງເປັນຄືຄົນນົບພະເທັດທຽມ) ຄົນພວກນີ້ຈະບໍ່ມີສິດຮັບມໍລະດົກໃນພຣະຣາໄຊຂອງພຣະກຣິສໂຕແລະຂອງພຣະເປັນເຈົ້າໄດ້ ແມ່ນແຕ່ຄົນດຽວ. 6.ຢ່າໃຫ້ມີໃຜໃຊ້ຄວາມເວົ້າອັນເຫລວໄຫລມາຫລອກລວງພວກພີ່ນ້ອງ. ແມ່ນຄວາມຜິດເຫລົ່ານີ້ເອງ ທຳໃຫ້ພຣະເປັນເຈົ້າລົງໂທດຜູ້ທີ່ເປັນຂະບົດ ບໍ່ຍອມເຊື່ອຟັງ. 7.ດັ່ງນັ້ນ ພວກພີ່ນ້ອງຢ່າຄົບຄ້າສະມາຄົມກັບຄົນພວກນີ້ເລີຍ. 8.ແຕ່ກ່ອນພວກພີ່ນ້ອງເປັນຄວາມມືດ, ດຽວນີ້ ໄດ້ເປັນຄວາມສະຫວ່າງໃນພຣະອົງເຈົ້າ. ຈົ່ງປະພຶດຕົວຄືບຸດແຫ່ງຄວາມສະຫວ່າງ. 9.ຍ້ອນວ່າໝາກຜົນຂອງຄວາມສະຫວ່າງ ຄືຄວາມດີ, ຄວາມຍຸຕິທຳແລະຄວາມຈິງ. 10.ຈົ່ງຮູ້ຈັກພິສູດເບິ່ງວ່າ ສິ່ງໃດພໍພຣະໄທພຣະອົງເຈົ້າ. 11.ຢ່າໄປຮ່ວມກັບກິດຈະການອັນໄຮ້ປະໂຫຍດແຫ່ງຄວາມມືດ, ແຕ່ຈົ່ງເປີດເຜີຍມັນອອກມາໃຫ້ປະຈັກແຈ້ງ. 12.ສິ່ງທີ່ຄົນພວກນີ້ກະທຳໄປຢ່າງລັບໆນັ້ນ ມັນເປັນໜ້າອັບອາຍ ເວົ້າເຖິງບໍ່ໄດ້. 13.ແຕ່ເມື່ອເລື່ອງເຫລົ່ານີ້ໄດ້ເຜີຍອອກມາແລ້ວ, ເຮົາກໍຈະໄດ້ຮູ້ເຫັນຊັດແຈ້ງຄືກາງເວັນ ແລະທຸກສິ່ງທີ່ປາກົດແຈ້ງແກ່ຕາແລ້ວ ກໍແມ່ນຄວາມສະຫວ່າງ. 14.ດ້ວຍເຫດນີ້ຈຶ່ງມີຄຳກ່າວວ່າ: “ຈົ່ງຕື່ນຂຶ້ນເຖີດ, ເຈົ້າຜູ້ນອນຫລັບຢູ່, ຈົ່ງລຸກຂຶ້ນຈາກພວກຜູ້ຕາຍ, ແລ້ວພຣະກຣິສໂຕຈະສ່ອງສະຫວ່າງໃຫ້ເຈົ້າ”. 15.ຈົ່ງເອົາໃຈໃສ່ປະພຶດຕົວດ້ວຍຄວາມລະມັດລະວັງ, ຢ່າເອົາຢ່າງຄົນໂງ່ຊ້າ, ແຕ່ເອົາຢ່າງຄົນສະຫລາດ, 16.ທີ່ຮູ້ຈັກໃຊ້ເວລາໃຫ້ເປັນປະໂຫຍດ, ຍ້ອນວ່າສະໄໝນີ້ແມ່ນສະໄໝທີ່ຊົ່ວຊ້າ. 17.ດ້ວຍເຫດນີ້, ຈົ່ງຢ່າເປັນຄົນທີ່ຂາດຄວາມຮອບຄອບ, ແຕ່ຈົ່ງພະຍາຍາມເຂົ້າໃຈນ້ຳພຣະໄທຂອງພຣະເປັນເຈົ້າ. 18.ຢ່າກິນເຫລົ້າເມົາຢາ, ຍ້ອນມັນເປັນເຫດໃຫ້ເກີດຄວາມເສື່ອມເສຍ, ແຕ່ຈົ່ງເຕັມພຽບດ້ວຍພຣະຈິດເຈົ້າ. 19.ຈົ່ງພ້ອມກັນຂັບຮ້ອງເພງສັກສິດ, ເພງນະມັດສະການ ແລະເພງສັນເສີນ ຕາມທີ່ພຣະຈິດເຈົ້າດົນໃຈ. 20.ຈົ່ງຂອບພຣະຄຸນພຣະເປັນເຈົ້າພຣະບິດາສະເໝີໄປ ຍ້ອນພຣະຄຸນຕ່າງໆທີ່ພຣະອົງໄດ້ປະທານໃຫ້ ເດຊະພຣະນາມຂອງພຣະກຣິສໂຕເຈົ້າ.

ຊີວິດຄອບຄົວກຣິສຕະຊົນ

ໜ້າທີ່ຂອງສາມີພັນລະຍາ

21.ຈົ່ງນອບນ້ອມຕໍ່ກັນແລະກັນດ້ວຍຄວາມເຄົາລົບຕໍ່ພຣະກຣິສໂຕເຈົ້າ. 22.ຜູ້ເປັນພັນລະຍາ ຈົ່ງນອບນ້ອມຕໍ່ສາມີ ຄືກັນກັບນອບນ້ອມຕໍ່ພຣະກຣິສໂຕເຈົ້າ. 23.ຍ້ອນວ່າສາມີເປັນສີສະຂອງພັນລະຍາ ເໝືອນກັບພຣະກຣິສໂຕເປັນສີສະຂອງພຣະກຣິສຕະຈັກ, ອັນແມ່ນຮ່າງກາຍຂອງພຣະອົງ, ແລະພຣະອົງເອງເປັນຜູ້ກູ້ໄຖ່ຮ່າງກາຍນັ້ນ. 24.ພຣະກຣິສຕະຈັກນອບນ້ອມຕໍ່ພຣະກຣິສໂຕເຈົ້າແນວໃດ, ພັນລະຍາກໍຕ້ອງນອບນ້ອມຕໍ່ສາມີດັ່ງດຽວກັນ. 25.ສ່ວນບັນດາສາມີ, ຈົ່ງຮັກພັນລະຍາຂອງຕົນ ຄືພຣະກຣິສໂຕເຈົ້າຊົງຮັກພຣະກຣິສຕະຈັກ ແລະມອບພຣະອົງເອງ, 26.ເພື່ອໃຫ້ພຣະກຣິສຕະຈັກສັກສິດແລະບໍລິສຸດ ດ້ວຍນ້ຳແຫ່ງສິນລ້າງບາບແລະວາຈາບັນດານຊີວິດ, 27.ອັນທຳໃຫ້ພຣະກຣິສຕະຈັກປາກົດແກ່ສາຍຕາຂອງພຣະອົງ ເຕັມພຽບດ້ວຍສີມຸງຄຸນ, ປາດສະຈາກບ່ອນຫຸບຫ່ຽວຫລືຫຍັງແນວອື່ນແບບນີ້, ແຕ່ເພື່ອໃຫ້ສັກສິດແລະປາດສະຈາກມົນທິນເທົ່ານັ້ນ. 28.ດັ່ງດຽວກັນ, ສາມີຕ້ອງຮັກພັນລະຍາຄືຮັກກາຍຂອງຕົນ. ຜູ້ໃດຮັກພັນລະຍາຂອງຕົນ ກໍແມ່ນຮັກຕົນເອງ. 29.ບໍ່ມີໃຜຄຽດຊັງກາຍໂຕເອງເລີຍ, ແຕ່ໃຜໆກໍເອົາໃຈໃສ່ບຳລຸງຮັກສາກາຍຂອງຕົນ ຄືພຣະກຣິສໂຕເຈົ້າຊົງເຝົ້າບຳລຸງຮັກສາພຣະກຣິສຕະຈັກນັ້ນເອງ, 30.ຍ້ອນວ່າພວກເຮົາເປັນອະໄວຍະວະແຫ່ງພຣະກາຍຂອງພຣະອົງ. 31.ດ້ວຍເຫດນີ້ ຜູ້ຊາຍຈະປະພໍ່ແມ່ໄປຢູ່ກິນກັບພັນລະຍາຂອງຕົນ, ທັງສອງຈະຮ່ວມກັນເປັນເນື້ອໜຶ່ງໜັງດຽວ. 32.ເລື່ອງນີ້ແມ່ນຂໍ້ເລິກລັບແທ້, ຂ້າພະເຈົ້າເວົ້າຄວາມນີ້ ເພື່ອໝາຍເຖິງພະ ກຣິສໂຕແລະພຣະກຣິສຕະຈັກ. 33.ເຖິງຢ່າງໃດກໍດີ ພວກເຈົ້າແຕ່ລະຄົນຕ້ອງຮັກພັນລະຍາຂອງຕົນເໝືອນຮັກຕົນເອງ, ແລະພັນລະຍາກໍຕ້ອງຢຳເກງສາມີຂອງຕົນ.