ເປົາໂລຜູ້ໄຂສຳແດງຂໍ້ເລິກລັບຂອງພຣະກຣິສໂຕ

1.ດ້ວຍເຫດນີ້ ຂ້າພະເຈົ້າເປົາໂລຜູ້ຖືກຄຸມຂັງຍ້ອນພຣະກຣິສໂຕເຈົ້າ ເພື່ອພວກພີ່ນ້ອງຜູ້ຕ່າງສາດສະໜາ... 2.ພວກພີ່ນ້ອງຄົງຮູ້ຈັກດີເຖິງແຜນການແຫ່ງພຣະຄຸນ ທີ່ພຣະເປັນເຈົ້າໄດ້ປະທານໃຫ້ຂ້າພະເຈົ້າເພື່ອພວກທ່ານ. 3.ຄືພຣະອົງໄດ້ໄຂສຳແດງໃຫ້ຂ້າພະເຈົ້າມີຄວາມຮູ້ເຖິງຂໍ້ເລິກລັບ ທີ່ຂ້າພະເຈົ້າໄດ້ບັນລະຍາຍມາແລ້ວຢ່າງຫຍໍ້ໆ. 4.ເມື່ອພວກພີ່ນ້ອງອ່ານແລ້ວ, ພວກພີ່ນ້ອງກໍສັງເກດໄດ້ວ່າ ຂ້າພະເຈົ້າມີຄວາມຮູ້ເຖິງຂໍ້ເລິກລັບກ່ຽວກັບພຣະກຣິສໂຕເຈົ້າ, 5.ອັນແມ່ນຂໍ້ເລິກລັບທີ່ພຣະເປັນເຈົ້າບໍ່ໄດ້ໄຂສຳແດງໃຫ້ຄົນສະໄໝກ່ອນຮູ້, ແຕ່ໃນສະໄໝດຽວນີ້ ເດຊະພຣະຈິດເຈົ້າ ພຣະອົງໄດ້ໄຂສຳແດງໃຫ້ອັກຄະທຳມະທູດຜູ້ສັກສິດ ແລະປະພາສົກທັງຫລາຍຊາບ ຄື: 6.ພວກຄົນຕ່າງສາດສະໜາໄດ້ເຂົ້າມາຮ່ວມຮັບມໍລະດົກອັນດຽວ, ເປັນອະໄວຍະວະແຫ່ງພຣະກາຍອັນດຽວ, ໄດ້ຮັບຜົນປະໂຫຍດຈາກພຣະສັນຍາອັນດຽວກັນ ໃນພຣະເຢຊູກຣິສໂຕ ດ້ວຍອາໄສພຣະວໍຣະສານ. 7. ຂ້າພະເຈົ້າໄດ້ຖືກແຕ່ງຕັ້ງໃຫ້ເປັນຜູ້ປະກາດຂ່າວດີນີ້ ເດຊະພຣະຄຸນທີ່ພຣະເປັນເຈົ້າໄດ້ປະທານແກ່ຂ້າພະເຈົ້າ ດ້ວຍລິດເດດຂອງພຣະອົງ. 8. ຂ້າພະເຈົ້າຜູ້ຕ່ຳຕ້ອຍທີ່ສຸດໃນພວກກຣິສຕັງ ໄດ້ຮັບມອບໝາຍພຣະຄຸນນີ້ ຄື ໃຫ້ປະກາດຂ່າວຄວາມຮັ່ງມີອັນເຫລືອທີ່ຈະພັນລະນາຂອງພຣະກຣິສໂຕໃຫ້ນານາຊາດຊາບ, 9.ແລະໃຫ້ຄົນທັງຫລາຍຮູ້ແຈ້ງເຖິງແຜນການອັນເລິກລັບ ຊຶ່ງພຣະເຈົ້າຜູ້ສ້າງສາລະພັດໄດ້ປິດບັງໄວ້ຕັ້ງແຕ່ຕົ້ນສ້າງໂລກ, 10.ເພື່ອໃຫ້ນິກອນເທວະດາ ຄະນະນາຍ ແລະຄະນະມີອຳນາດໃນສະຫວັນ ໄດ້ຮູ້ຈັກເຖິງຄວາມສະຫລາດສຸຂຸມຂອງພຣະເຈົ້າໂດຍທາງພຣະກຣິສຕະຈັກ. 11.ຕາມແຜນການນິຣັນດອນທີ່ພຣະອົງໄດ້ຈັດແຕ່ງຂຶ້ນໄວ້ແລ້ວ ໃນພຣະເຢຊູກຣິສໂຕພຣະເຈົ້າຂອງເຮົາທັງຫລາຍ. 12.ອາໄສຄວາມເຊື່ອໃນພຣະກຣິສໂຕນັ້ນ ພວກເຮົາຈຶ່ງກ້າເຂົ້າໄປຫາພຣະເປັນເຈົ້າໄດ້ ດ້ວຍຄວາມໄວ້ວາງໃຈທຸກປະການ. 13.ດ້ວຍເຫດນີ້ ຂ້າພະເຈົ້າຈຶ່ງວິງວອນຂໍພວກພີ່ນ້ອງ ຢ່າມີຄວາມນ້ອຍໃຈ ເມື່ອເຫັນຂ້າພະເຈົ້າສູ້ທົນຄວາມລຳບາກເພື່ອພວກພີ່ນ້ອງ, ຄວາມລຳບາກເຫລົ່ານັ້ນແຫລະເປັນກຽດສັກສີໃຫ້ພວກພີ່ນ້ອງ.

ໃຫ້ເຂົ້າໃຈຄວາມຮັກຂອງພຣະກຣິສໂຕ

14.ດ້ວຍເຫດນີ້, ຂ້າພະເຈົ້າຂາບລົງຕໍ່ພຣະພັກພຣະບິດາເຈົ້າ 15.ຍ້ອນວ່າພຣະອົງເປັນກຳເນີດແຫ່ງການເປັນບິດາຂອງທຸກຊາດທຸກຕະກູນ ທັງຢູ່ສະຫວັນແລະຢູ່ແຜ່ນດິນ. 16.ຂໍພຣະອົງຊົງປະທານໃຫ້ພວກພີ່ນ້ອງໄດ້ກ້າວໜ້າຢ່າງເຂັ້ມແຂງທາງຈິດໃຈ ຕາມຄວາມອຸດົມສົມບູນແຫ່ງສີມຸງຄຸນຂອງພຣະອົງ ດ້ວຍອາໄສລິດເດດຂອງພຣະຈິດຊ່ວຍ. 17.ຂໍໃຫ້ພຣະກຣິສໂຕສະຖິດຢູ່ໃນໃຈຂອງພວກພີ່ນ້ອງທາງຄວາມເຊື່ອ, ໃຫ້ພວກພີ່ນ້ອງມີຮາກຖານທາງຄວາມຮັກ, 18.ແລ້ວຈະໄດ້ເຂົ້າໃຈຄືພວກນັກບຸນທັງຫລາຍວ່າ ຄວາມຮັກອັນສຸດຄວາມເຂົ້າໃຈຂອງພຣະກຣິສໂຕນັ້ນ ມີຂະໜາດກວ້າງຍາວສູງເລິກເທົ່າໃດ. 19.ແລ້ວພວກພີ່ນ້ອງຈະໄດ້ຊາບຊຶ້ງເຖິງຄວາມຮັກຂອງພຣະກຣິສໂຕ ທີ່ຢູ່ເໜືອຄວາມຮູ້ແລະສະຕິປັນຍາຂອງມະນຸດ, ດັ່ງນີ້ພວກພີ່ນ້ອງຈະໄດ້ເຕັມພຽບດ້ວຍຄວາມໄພບູນຂອງພຣະເປັນເຈົ້າ. 20.ສີມຸງຄຸນຈົ່ງມີແດ່ພຣະອົງຜູ້ຊົງລິດ ສາມາດກະທຳໄດ້ຢ່າງມາກມາຍ ແລະເກີນກວ່າທີ່ພວກເຮົາວອນຂໍຫລືຄິດອອກໄດ້. 21.ສີມຸງຄຸນຈົ່ງມີແດ່ພຣະອົງໃນພຣະກຣິສຕະຈັກແລະໃນພຣະເຢຊູກຣິສໂຕ ຕະຫລອດທຸກຊົ່ວອາຍຸຄົນ ແລະທຸກກາລະສະໄໝເທີ້ນ, ອາແມນ.