ຈົດໝາຍຂອງນັກບຸນເປົາໂລຂຽນເຖິງສັດຕະບຸຣຸດຢູ່ເມືອງເອເຟໂຊ

ຄຳນັບຖາມຂ່າວ - ອວຍພອນ

1. ຂ້າພະເຈົ້າເປົາໂລ, ຜູ້ເປັນອັກຄະທຳມະທູດຂອງພຣະເຢຊູກຣິສໂຕ ຕາມນ້ຳພຣະໄທຂອງພຣະເຈົ້າ. ເຖິງບັນດາກຸ່ມກຣິສຕະຊົນຜູ້ມີຄວາມເຊື່ອໝັ້ນໃນພຣະເຢຊູກຣິສໂຕເຈົ້າ. 2.ຂໍພຣະຄຸນແລະສັນຕິສຸກທີ່ມາຈາກພຣະບິດາພຣະເຈົ້າຂອງເຮົາທັງຫລາຍ ແລະຈາກພຣະເຢຊູກຣິສໂຕເຈົ້າ ຈົ່ງສະຖິດຢູ່ນຳພວກພີ່ນ້ອງທຸກຄົນເທີ້ນ.

ແຜນການຂອງພຣະເຈົ້າໃນການໄຖ່ເອົາມະນຸດ

3.ຂໍຖະຫວາຍພອນແດ່ພຣະເຈົ້າ ພຣະບິດາຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ, ຜູ້ໄດ້ຊົງປະທານພຣະພອນສະຫວັນຝ່າຍວິນຍານນານາປະການແກ່ພວກເຮົາຢູ່ສະຫວັນໂດຍທາງພຣະກຣິສໂຕເຈົ້າ. 4.ພຣະອົງໄດ້ຊົງເລືອກສັນພວກເຮົາໄວ້ໃນພຣະກຣິສໂຕເຈົ້າຕັ້ງແຕ່ກ່ອນສ້າງໂລກ ເພື່ອໃຫ້ພວກເຮົາບໍລິສຸດແລະປາດສະຈາກມົນທິນຕໍ່ພຣະພັກພຣະອົງດ້ວຍຄວາມຮັກ. 5.ພຣະອົງຊົງພໍພຣະໄທກຳໜົດໄວ້ກ່ອນແລ້ວວ່າ ຈະໃຫ້ພວກເຮົາເປັນບຸດບຸນທຳຂອງພຣະອົງເດຊະພຣະກຣິສໂຕເຈົ້າ. 6.ເພື່ອເປັນການຍ້ອງຍໍສໍລະເສີນພຣະຄຸນອັນຍິ່ງໃຫຍ່ ທີ່ພຣະອົງໄດ້ຊົງປະທານແກ່ພວກເຮົາໃນພຣະບຸດສຸດທີ່ຮັກຂອງພຣະອົງ. 7.ຢູ່ໃນພຣະອົງ ພວກເຮົາໄດ້ຮັບການໄຖ່ບາບແລະການອະໄພໂທດ ດ້ວຍອາໄສພຣະໂລຫິດຂອງພຣະອົງ ຕາມພຣະຄຸນອັນອຸດົມສົມບູນຂອງພຣະອົງ. 8.ຊຶ່ງພຣະເປັນເຈົ້າໄດ້ປະທານໃຫ້ພວກເຮົາຢ່າງເຫລືອລົ້ນ ດ້ວຍບັນດານໃຫ້ພວກເຮົາມີຄວາມສະຫລາດແລະຄວາມຮູ້ຢ່າງເຕັມພຽບ. 9.ພຣະອົງໄດ້ເປີດເຜີຍຂໍ້ເລິກລັບແຫ່ງນ້ຳພຣະໄທຂອງພຣະອົງ, ຄືແຜນການອັນມີເມດຕາ ຊຶ່ງພຣະອົງໄດ້ຄິດໄລ່ໄວ້ລ່ວງໜ້າໃນພຣະກຣິສໂຕເຈົ້າ, 10.ເພື່ອໃຫ້ເກີດຜົນຢ່າງແທ້ຈິງ ເມື່ອເວລາທີ່ໄດ້ກຳໜົດໄວ້ນັ້ນສຳເລັດໄປ ຄືວ່າຮວບຮວມທຸກສິ່ງທຸກຢ່າງຢູ່ສະຫວັນແລະແຜ່ນດິນ ໄວ້ຢູ່ກ້ອງອຳນາດຂອງຫົວໜ້າຜູ້ດຽວຄືພຣະກຣິສໂຕເຈົ້າ. 11.ພຣະອົງໄດ້ເລືອກສັນພວກເຮົາໄວ້ລ່ວງໜ້າແລ້ວໃນພຣະກຣິສໂຕເຈົ້າ ຕາມແຜນການຂອງພຣະອົງ ຜູ້ຊົງນຳທຸກຢ່າງໃຫ້ເປັນໄປຕາມນ້ຳພຣະໄທຂອງພຣະອົງ. 12.ເພື່ອໃຫ້ພວກເຮົາຜູ້ມີຄວາມຫວັງໃນພຣະກຣິສໂຕເຈົ້າກ່ອນຜູ້ອື່ນ ໄດ້ເປັນຜູ້ຍ້ອງຍໍສໍລະເສີນຖະຫວາຍສີມຸງຄຸນແດ່ພຣະອົງ. 13.ແມ່ນໃນພຣະອົງອີກ ທີ່ພວກພີ່ນ້ອງໄດ້ຟັງວາຈາແຫ່ງຄວາມຈິງ, ຄືຂ່າວປະເສີດທີ່ຊ່ວຍພວກພີ່ນ້ອງໄດ້ຮອດ, ແລະໄດ້ເຊື່ອໃນພຣະອົງ, ທັງໄດ້ຮັບຕາຂອງພຣະຈິດ ຊຶ່ງພຣະເປັນເຈົ້າຊົງສັນຍາຈະປະທານໃຫ້. 14.ພຣະຈິດຜູ້ສັກສິດນີ້ແຫລະ ເປັນມັດຈຳແຫ່ງການຮັບມໍລະດົກຂອງພວກເຮົາໄວ້ ຈົນກວ່າຈະເຖິງເວລາໄດ້ຮັບການປົດປ່ອຍຢ່າງສິ້ນເຊິງແລ້ວ. ເວລານັ້ນ ພວກເຮົາຈະໄດ້ຮັບເປັນກຳມະສິດ ເພື່ອຖະຫວາຍສັນຣະເສີນພະກຽດມຸງຄຸນຂອງພຣະອົງ.

ພາວະນາຂໍຄວາມແຈ້ງສະຫວ່າງໃຫ້ສະຕິປັນຍາ

15.ດ້ວຍເຫດນີ້ ເມື່ອເວລາຂ້າພະເຈົ້າໄດ້ຍິນວ່າ ພວກພີ່ນ້ອງມີຄວາມເຊື່ອໃນພຣະກຣິສໂຕເຈົ້າ ແລະມີຄວາມຮັກແພງຕໍ່ເພື່ອນກຣິສຕັງດ້ວຍກັນ, 16. ຂ້າພະເຈົ້າຈຶ່ງຂອບພຣະຄຸນເພື່ອພວກພີ່ນ້ອງຢ່າງບໍ່ຢຸດຢ່ອນ ດ້ວຍລະລຶກເຖິງພວກພີ່ນ້ອງໃນຄຳພາວະນາ. 17.ຂໍພຣະເຈົ້າຂອງພຣະເຢຊູກຣິສໂຕ ພຣະອົງເຈົ້າຂອງເຮົາ ພຣະບິດາຜູ້ຊົງສິລິມຸງຄຸນໄດ້ປະທານໃຫ້ພວກພີ່ນ້ອງມີຈິດໃຈເຕັມດ້ວຍຄວາມສະຫລາດ ແລະໄດ້ຮັບຄວາມສະຫວ່າງເພື່ອຮູ້ແຈ້ງເຖິງພຣະອົງ. 18.ຂໍພຣະອົງປະທານຄວາມສະຫວ່າງແກ່ດວງໃຈຂອງພວກພີ່ນ້ອງ ເພື່ອໃຫ້ຮູ້ວ່າ ການທີ່ພຣະອົງຮຽກພວກພີ່ນ້ອງນັ້ນ ເພື່ອຫວັງອັນໃດແດ່ ແລະໃຫ້ຮູ້ວ່າ ມໍລະດົກທີ່ຈະໄດ້ຮັບຮ່ວມກັບພວກນັກບຸນນັ້ນ ມີສະງ່າລາສີອຸດົມສົມບູນສັກພຽງໃດ, 19.ທັງໃຫ້ຮູ້ວ່າ ຣິດທານຸພາບທີ່ພຣະອົງໄດ້ສຳແດງອອກມາ ເພື່ອພວກເຮົາຜູ້ເຊື່ອພຣະອົງນັ້ນ ຍິ່ງໃຫຍ່ສັກພຽງໃດດ້ວຍ. 20.ສ່ວນອຳນາດ, ກຳລັງ ແລະຣິດທານຸພາບອັນຍິ່ງໃຫຍ່ສຸດຄະນານັບນັ້ນ ພຣະອົງໄດ້ສຳແດງໃຫ້ປາກົດໃນອົງພຣະກຣິສໂຕເຈົ້າ ໂດຍປະທານໃຫ້ພຣະອົງກັບຄືນຊີບຈາກພວກຜູ້ຕາຍ ແລະໃຫ້ປະທັບຢູ່ເບື້ອງຂວາຂອງພຣະອົງໃນສະຫວັນ. 21.ເໜືອບັນດາເທບນິກອນ ຜູ້ປົກຄອງ ຜູ້ມີອຳນາດ, ຜູ້ມີຣິດເດດ, ຜູ້ມີອະນຸພາບ ແລະເໜືອນາມທັງປວງທີ່ເອີ່ຍອອກມາໄດ້, ບໍ່ແມ່ນແຕ່ສະໄໝນີ້ເທົ່ານັ້ນ, ແຕ່ໃນສະໄໝໜ້າອີກດ້ວຍ. 22.ພຣະເຈົ້າຊົງຜາບສິ່ງສາລະພັດໄວ້ຢູ່ໃຕ້ ພະບາດພຣະກຣິສໂຕ ແລະຊົງແຕ່ງພຣະອົງໃຫ້ຢູ່ເໜືອສັບພະສິ່ງທັງຫລາຍ, ໃຫ້ເປັນສີສະຂອງພຣະກຣິສຕະຈັກ, 23.ຊຶ່ງເປັນພຣະກາຍທິບຂອງພຣະອົງ, ອັນເປັນຄວາມສົມບູນຂອງພຣະອົງ ຜູ້ຊົງທຳໃຫ້ທຸກສິ່ງຄົບບໍລິບູນໃນທຸກຢ່າງ.