1.ເວລານັ້ນ ພຣະຈິດເຈົ້າດົນບັນດານໃຫ້ພຣະເຢຊູເຈົ້າສະເດັດອອກໄປທີ່ປ່ຽວ, ເພື່ອຖືກປະຈົນຫລອກລວງຈາກຜີປີສາດ. 2.ພຣະອົງໄດ້ຖືສິນອົດອາຫານຕະຫລອດສີ່ສິບມື້ສີ່ສິບຄືນ. ຫລັງຈາກນັ້ນ, ພຣະອົງກໍຮູ້ສຶກຫິວໂຫຍ. 3.ຜີປີສາດເຈົ້າຕົວະຫລອກຈຶ່ງຫຍັບເຂົ້າມາໃກ້ພຣະອົງ ທູນວ່າ: “ຖ້າທ່ານຫາກເປັນບຸດຂອງພຣະເປັນເຈົ້າ, ຈົ່ງສັ່ງໃຫ້ກ້ອນຫີນເຫລົ່ານີ້ກາຍເປັນເຂົ້າໜົມປັງເຖີດ”. 4.ພຣະເຢຊູເຈົ້າຊົງຕອບວ່າ: “ມີຄຳຂຽນໄວ້ວ່າ: ມະນຸດບໍ່ມີຊີວິດຢູ່ໄດ້ດ້ວຍເຂົ້າໜົມປັງເທົ່ານັ້ນ, ແຕ່ຍັງມີຊີວິດຢູ່ໄດ້ ຍ້ອນວາຈາທີ່ອອກມາຈາກພຣະໂອດຂອງພຣະເປັນເຈົ້າ”. 5.ຜີປີສາດຈຶ່ງອູ້ມເອົາພຣະອົງໄປນະຄອນສັກສິດ, ວາງພຣະອົງລົງທີ່ຍອດພຣະວິຫານ, 6.ແລະທູນພຣະອົງວ່າ: “ຖ້າທ່ານຫາກເປັນບຸດຂອງພຣະເປັນເຈົ້າ ເຊີນໂຕນລົງລຸ່ມເບິ່ງດູ, ຍ້ອນມີຄຳຂຽນໄວ້ວ່າ: ພຣະອົງຈະສັ່ງພວກເທວະດາມາອູ້ມຊູທ່ານໄວ້, ຢ້ານວ່າຕີນຂອງທ່ານຈະຕຳກ້ອນຫິນ”. 7.ພຣະເຢຊູເຈົ້າຊົງຕອບວ່າ: “ຍັງມີຄຳທີ່ຂຽນໄວ້ວ່າ ຢ່າປະຈົນຫລອກລວງພຣະອົງພຣະເປັນເຈົ້າຂອງເຈົ້າເລີຍ”.

8.ຜີປີສາດຍັງອູ້ມເອົາພຣະອົງຂຶ້ນໄປເທິງພູສູງໜ່ວຍໜຶ່ງອີກ, ສະແດງໃຫ້ພຣະອົງເຫັນອານາຈັກຕ່າງໆອັນຮຸ່ງເຮືອງໃນໂລກ. 9.ແລະທູນພຣະອົງວ່າ: “ຖ້າທ່ານຂາບລົງນະມັດສະການເຮົາ, ອານາຈັກທັງໝົດນີ້ເຮົາຈະມອບໃຫ້ທ່ານ”. 10.ພຣະເຢຊູເຈົ້າຈຶ່ງກ່າວວ່າ: “ຊາຕານເອີຍ, ຈົ່ງໜີໄປເຖີດ, ດ້ວຍມີຄຳຂຽນໄວ້ວ່າ: ຈົ່ງໄຫວ້ນະມັດສະການພຣະອົງເຈົ້າພຣະເປັນເຈົ້າຂອງເຈົ້າ, ແລະຈົ່ງບູຊາພຣະອົງແຕ່ຜູ້ດຽວ”. 11.ເວລານັ້ນ, ຜີປີສາດຈຶ່ງປະພຣະອົງແລະໜີໄປ. ແລ້ວມີພວກເທວະດາໄດ້ຫຍັບເຂົ້າມາຮັບໃຊ້ພຣະອົງ.

ພຣະເຢຊູເຈົ້າກັບສູ່ແຂວງຄາລີເລ

12.ເມີ່ອຊົງຊາບວ່າທ່ານຢວງຖືກຈັບ ພຣະເຢຊູເຈົ້າຈຶ່ງກັບສູ່ແຂວງຄາລີເລ 13.ແລະຈາກເມືອງນາຊາແຣັດ ພຣະອົງຊົງມາອາໄສຢູ່ເມືອງກາຟາກນາອຸມແຄມຝັ່ງທະເລ ທີ່ຊາຍແດນຊາບູລອນແລະແນບທາລີ 14.ເປັນດັ່ງນີ້ ກໍເພື່ອໃຫ້ສຳເລັດຕາມຄຳທຳນາຍທີ່ທ່ານປະພາສົກອີຊາຢາໄດ້ກ່າວໄວ້ວ່າ: 15.ດິນແດນຊາບູລອນ ດິນແດນແນບທາລີ ທາງແຄມຝັ່ງທະເລ ດິນແດນຢໍແດນຟາກນັ້ນ ຄາລີເລແຫ່ງຊາວຕ່າງດ້າວ! 16.ລາດສະດອນທີ່ຢູ່ໃນຄວາມມືດ ໄດ້ແລເຫັນຄວາມສະຫວ່າງແຈ້ງອັນຍິ່ງໃຫຍ່ ຄວາມສະຫວ່າງໄດ້ຮຸ່ງແຈ້ງຂຶ້ນເໜືອພວກທີ່ຢູ່ໃນຮົ່ມເງົາແຫ່ງຄວາມຕາຍ. 17.ນັບແຕ່ເວລານັ້ນເປັນຕົ້ນມາ ພຣະເຢຊູເຈົ້າໄດ້ເລີ່ມປະກາດເທດສອນວ່າ: “ຈົ່ງເປັນທຸກກັບໃຈ, ດ້ວຍວ່າພຣະຣາໄຊສະຫວັນກໍໃກ້ເຂົ້າມາແລ້ວ.”

ຮຽກເອົາສາວົກສີ່ອົງຕົ້ນ

18.ໃນເວລານັ້ນ ພຣະເຢຊູເຈົ້າຊົງເດີນລຽບຝັ່ງທະເລຄາລີເລ ພຣະອົງຊົງຫລຽວເຫັນສອງຄົນອ້າຍນ້ອງຄື ຊີມອນ ຜູ້ຊຶ່ງມີອີກຊື່ໜຶ່ງວ່າເປໂຕແລະອັນເດຣຜູ້ນ້ອງຊາຍ ກຳລັງຕຶກແຫໃນທະເລ ຍ້ອນວ່າພວກເຂົາເປັນຊາວປະມົງ. 19.ພຣະອົງຊົງກ່າວແກ່ພວກເຂົາວ່າ: “ຈົ່ງຕິດຕາມເຮົາມາ ເຮົາຈະເຮັດໃຫ້ພວກເຈົ້າເປັນຊາວປະມົງຈັບຄົນ.” 20.ທັນທີເຂົາທັງສອງກໍປະແຫ ແລະຕິດຕາມພຣະອົງໄປ. 21.ເມື່ອສະເດັດໄປໄກໜ້ອຍໜຶ່ງ ພຣະອົງຊົງພົບອ້າຍນ້ອງອີກສອງຄົນຄື ຢາໂກເບ ບຸດຂອງເຊເບເດ ແລະຢວງ ຜູ້ນ້ອງຊາຍ ກຳລັງຝູງມອງຢູ່ໃນເຮືອ ພ້ອມກັບເຊເບເດຜູ້ເປັນບິດາ ພຣະອົງຊົງຮຽກເອົາພວກເຂົາ. 22.ທັນທີ ພວກເຂົາກໍປະເຮືອພ້ອມທັງບິດາ ແລະຕິດຕາມພຣະອົງໄປ.

ພຣະເຢຊູເຈົ້າຊົງເທດສອນແລະປົວພະຍາດ

23.ພຣະເຢຊູເຈົ້າຊົງເດີນໄປທົ່ວແຂວງຄາລີເລ, ພ້ອມເທດສອນຕາມໂຮງທຳຕ່າງໆ, ປະກາດຂ່າວປະເສີດແຫ່ງອານາຈັກ, ແລະປິ່ນປົວປະຊາຊົນໃຫ້ດີພະຍາດ ແລະການລ່ອຍເປ້ຍທຸກຊະໜິດ. 24.ຊື່ສຽງຂອງພຣະອົງລືຊ່າໄປທົ່ວປະເທດຊີຣີ, ແລະເຂົາໄດ້ພາບັນດາຄົນທີ່ຖືກທໍຣະມານດ້ວຍໂລກໄພໄຂ້ເຈັບຕ່າງໆມາຫາພຣະອົງ. ມີທັງຜູ້ຖືກຜີສິງ, ຜູ້ເສຍຈິດ, ຜູ້ເປັນລ່ອຍ, ແລະພຣະອົງກໍຊົງທຳໃຫ້ພວກເຂົາຫາຍຈາກພະຍາດ. 25.ຝູງຊົນເປັນອັນມາກຈຶ່ງພາກັນຕິດຕາມພຣະອົງ, ມາຈາກແຂວງຄາລີເລ, ແຂວງເດກາໂປນ, ຈາກນະຄອນເຢຣູຊາແລມ, ຈາກແຂວງຢູເດ, ແລະຈາກແມ່ນ້ຳຢໍແດນຟາກນັ້ນ.