II. ການປະກາດເລື່ອງອານາຈັກສະຫວັນ ຄຳເທດສະໜາຂອງຢວງບັບຕິສຕາ

1.ໃນສະໄໝນັ້ນ, ທ່ານຢວງບັບຕິສຕາປາກົດຕົວແລະເທດສອນໃນທີ່ປ່ຽວແຫ່ງແຂວງຢູເດວ່າ: 2.“ຈົ່ງເປັນທຸກກັບໃຈເຖີດ, ດ້ວຍວ່າພຣະຣາໄຊສະຫວັນໃກ້ຈະມາເຖິງແລ້ວ”. 3.ແມ່ນທ່ານນີ້ເອງທີ່ຄຳທຳນາຍຂອງທ່ານປະພາສົກອີຊາຢາໄດ້ຊີ້ບອກໄວ້ວ່າ: “ມີສຽງໜຶ່ງຮ້ອງໃນທີ່ປ່ຽວວ່າ: ຈົ່ງຈັດຕຽມຖະໜົນຫົນທາງຂອງພຣະອົງເຈົ້າໃຫ້ຮາບພຽງ”. 4.ທ່ານຢວງນີ້ນຸ່ງເສື້ອຜ້າເຮັດດ້ວຍຂົນອູດ ແລະຮັດສາຍແອວດ້ວຍໜັງດິບ; ອາຫານຂອງເພິ່ນແມ່ນຕັກແຕນ ແລະນ້ຳເຜິ້ງປ່າ. 5.ຊາວນະຄອນເຢຣູຊາແລມແລະຢູເດທັງແຂວງ ແລະໝົດບໍລິເວນແມ່ນ້ຳຢໍແດນ ຕ່າງກໍພາກັນໄປຫາທ່ານ. 6.ສາຣະພາບບາບຂອງຕົນ ແລະຂໍຮັບພິທີລ້າງຈາກທ່ານໃນແມ່ນ້ຳຢໍແດນ. 7.ເມື່ອເຫັນພວກຟາຣີເຊວແລະພວກຊາດູເຊວຫລາຍຄົນມາຮັບພິທີລ້າງ ທ່ານຈຶ່ງກ່າວກັບພວກເຂົາວ່າ: “ສັນຊາດງູພິດເອີຍ, ໃຜບອກພວກເຈົ້າໃຫ້ໜີພະພິໂລດທີ່ຈະມາເຖິງ? 8.ຈົ່ງທຳການໃຊ້ໂທດບາບອັນເໝາະສົມ, 9.ແລະຢ່າຄິດວ່າ: ພວກເຮົາມີອາບຣາຮຳເປັນບິດາ; ເຮົາບອກພວກເຈົ້າວ່າ: ພຣະເປັນເຈົ້າຊົງສາມາດທຳໃຫ້ກ້ອນຫິນເຫລົ່ານີ້ກາຍເປັນລູກຂອງອາບຣາຮຳກໍໄດ້. 10.ເວລານີ້ ຄົມຂວານກໍຈໍ້ໃສ່ເຫງົ້າໄມ້ແລ້ວ; ໄມ້ກົກໃດບໍ່ເກີດໝາກຜົນທີ່ດີກໍຈະຖືກປ້ຳລົງແລະຖິ້ມໃສ່ໄຟ. 11.ສ່ວນເຮົານີ້, ເຮົາລ້າງພວກເຈົ້າດ້ວຍນ້ຳເພື່ອການເປັນທຸກກັບໃຈ; ແຕ່ວ່າຜູ້ທີ່ຈະມາພາຍຫລັງເຣົາ ພຣະອົງຊົງອຳນາດຍິ່ງໃຫຍ່ ກວ່າ, ແລະເຮົາບໍ່ສົມຈະແກ້ສາຍຮັດເກີບຂອງພຣະອົງຊ້ຳ; ພຣະອົງຈະລ້າງພວກເຈົ້າດ້ວຍພຣະຈິດເຈົ້າແລະດ້ວຍໄຟ. 12.ພຣະອົງກຳລັງຖືກະດົ້ງຢູ່ໃນມື ເພື່ອຈະຟັດເອົາເຂົ້າໃນລານໃຫ້ສະອາດ; ພຣະອົງຈະເກັບເອົາເຂົ້າໃສ່ໄວ້ໃນເລົ້າ ສ່ວນເຟືອງນັ້ນຈະເອົາໄປຈູດໄຟອັນບໍ່ຮູ້ມອດ”.

ພຣະເຢຊູເຈົ້າຊົງຮັບພິທີລ້າງ

13.ຄັ້ງນັ້ນ, ພຣະເຢຊູເຈົ້າສະເດັດຈາກແຂວງຄາລີເລມາຫາທ່ານຢວງຢູ່ແຄມແມ່ນ້ຳຢໍແດນ ເພື່ອຮັບພິທີລ້າງຈາກທ່ານ. 14.ສ່ວນທ່ານຢວງບໍ່ຢາກຍອມ, ທູນທັດທານພຣະອົງວ່າ: “ແມ່ນຂ້ານ້ອຍເອງທີ່ຕ້ອງຮັບພິທີລ້າງຈາກພຣະອົງ, ແຕ່ແນວໃດເດ ພຣະອົງຈຶ່ງມາຫາຂ້າ ນ້ອຍ!” 15.ແຕ່ພຣະເຢຊູເຈົ້າຊົງກ່າວຕອບວ່າ: “ຕາມເຖີດ, ຈົ່ງເຮັດໄປ, ພວກເຮົາຄວນປະຕິບັດດັ່ງນີ້ເພື່ອໃຫ້ຄວາມຊອບທຳສຳເລັດໄປ, ຢ່າງຄົບຖ້ວນ”. ແລະທ່ານຢວງກໍເລີຍຍອມປະຕິບັດຕາມ.

16.ພໍຮັບພິທີລ້າງແລ້ວ, ພຣະເຢຊູເຈົ້າກໍສະເດັດຂຶ້ນບົກທັນທີ, ຂະນະນັ້ນ ທ້ອງຟ້າເປີດອອກ ແລະພຣະອົງຊົງເຫັນພຣະຈິດຂອງພຣະເຈົ້າສະເດັດລົງມາເໜືອພຣະອົງເປັນຮູບນົກກາງແກ 17.ແລະມີສຽງຈາກຟ້າກ່າວວ່າ: “ຜູ້ນີ້ຄືບຸດສຸດທີ່ຮັກຂອງເຮົາ, ເຮົາພໍພຣະໄທນຳທ່ານເປັນຢ່າງຍິ່ງ”.