ຄູຫາເປົ່າວ່າງ

1.ຫລັງມື້ວັນເສົາ ພໍດີໃນວັນຕົ້ນອາທິດເວລາໃກ້ແຈ້ງ, ນາງມາຣີອາມັກດາເລນາພ້ອມກັບນາງມາຣີອາຜູ້ໜຶ່ງອີກໄດ້ພາກັນໄປຢ້ຽມຄູຫາ. 2.ທັນໃດນັ້ນ ໄດ້ເກີດແຜ່ນດິນໄຫວຢ່າງແຮງ, ຍ້ອນວ່າເທວະດາຂອງພຣະເຈົ້າອົງໜຶ່ງລົງມາຈາກສະຫວັນ ໄດ້ກື່ງກ້ອນຫິນນັ້ນອອກແລະນັ່ງຢູ່ເທິງກ້ອນຫີນ. 3.ໜ້າຕາຂອງເທວະດານັ້ນຮຸ່ງແຈ້ງຄືແສງຟ້າເຫລື້ອມ ເຄື່ອງນຸ່ງຂາວຄືຫິມະ. 4.ພວກທະຫານຍາມຕື່ນຕົກໃຈຈົນໝົດສະຕິໄປຄືຄົນຕາຍ, 5.ເທວະດາເລີຍບອກພວກນັ້ນວ່າ: “ພວກນາງຢ່າຢ້ານກົວເລີຍ ເຮົາຮູ້ວ່າພວກນາງຊອກຫາພຣະເຢຊູຜູ້ຖືກຄຶງໃສ່ກາງເຂນ. 6.ພຣະອົງບໍ່ຢູ່ບ່ອນນີ້ດອກ ພຣະອົງໄດ້ກັບເປັນຄືນມາຄືໄດ້ກ່າວໄວ້ແຕ່ກ່ອນແລ້ວ. ເຊີນໄປເບິ່ງຄູຫາບ່ອນເຂົາຝັງພຣະອົງໄວ້. 7.ພວກນາງຈົ່ງຮີບໄປບອກພວກລູກສິດຂອງພຣະອົງວ່າ ພຣະອົງໄດ້ກັບເປັນຄືນມາແລ້ວ. ເວລານີ້ພຣະອົງພວມຄອຍຖ້າພວກທ່ານຢູ່ແຂວງກາລີເລ. ພວກທ່ານຈະໄດ້ເຫັນພຣະອົງຢູ່ທີ່ນັ້ນ. ນີ້ແລ້ວ ຂ່າວທີ່ເຮົານຳເອົາມາແຈ້ງໃຫ້ພວກນາງຊາບ”. 8.ພວກຜູ້ຍິງນັ້ນກໍຮີບໜີຈາກຄູຫາໄປດ້ວຍຄວາມຮູ້ສຶກຢ້ານແກມຍິນດີເປັນຢ່າງຍິ່ງ. ພວກນາງແລ່ນນຳຂ່າວໄປແຈ້ງແກ່ພວກສາວົກ.

ຊົງປະຈັກແກ່ພວກຜູ້ຍິງໃຈສັດທາ

9.ເວລານັ້ນ ພຣະເຢຊູເຈົ້າປະຈັກມາຫາພວກເຂົາກ່າວວ່າ: “ສະບາຍດີນາງທັງຫລາຍ”. ພວກນາງຫຍັບເຂົ້າມາໃກ້ ຂາບລົງກອດພະບາດນະມັດສະການພຣະອົງ. 10.ພຣະເຢຊູເຈົ້າຈຶ່ງກ່າວກັບພວກນາງວ່າ: “ຢ່າຢ້ານເລີຍ, ຈົ່ງໄປບອກພີ່ນ້ອງຂອງເຮົາໃຫ້ຄືນເມືອແຂວງຄາລີເລ, ຢູ່ບ່ອນນັ້ນແລ້ວ ພວກເຂົາຈະໄດ້ເຫັນເຮົາ”.

ກົນອຸບາຍຂອງເຈົ້ານາຍຢິວ

11.ເມື່ອພວກຜູ້ຍິງໄປແລ້ວ, ທະຫານຍາມສອງຄົນໄດ້ເຂົ້າໄປໃນເມືອງ ເລົ່າເຫດການທີ່ເປັນມາໃຫ້ພວກຫົວໜ້າສົງຟັງ. 12.ພວກຫົວໜ້າສົງຈຶ່ງເຂົ້າປະຊຸມກັນກັບພວກເຖົ້າແກ່ ແລະເມື່ອປຶກສາຫາລືກັນແລ້ວ, ພວກເຂົາໄດ້ຕົກລົງເອົາເງິນເປັນຈຳນວນມາກໃຫ້ພວກທະຫານ, 13.ໂດຍສັ່ງວ່າ: “ໃຫ້ພວກເຈົ້າເວົ້າດັ່ງນີ້: ໃນເວລາກາງຄືນ, ເມື່ອພວກເຮົາກຳລັງນອນຫລັບຢູ່, ພວກລູກສິດຂອງເຂົາໄດ້ມາລັກເອົາສົບໄປ. 14.ແລະຖ້າເລື່ອງນີ້ຫາກຊອດ ໄປເຖິງຫູຜູ້ວ່າລາດຊະການພາກ, ພວກເຮົາຈະພິຈາລະນາແກ້ໄຂກັບທ່ານເອງ ແລະຊ່ວຍບໍ່ໃຫ້ພວກເຈົ້າຕ້ອງຫຍຸ້ງຍາກ”. 15.ເມື່ອໄດ້ຮັບເງິນແລ້ວ ພວກທະຫານໄດ້ປະຕິບັດຕາມຄຳສັ່ງ ແລະເລື່ອງນິຍາຍນີ້ຈຶ່ງຊ່າລືໄປໃນຊາວຊົນຢິວຈົນເຖິງທຸກວັນນີ້.

ຊົງປະຈັກທີ່ແຂວງຄາລີເລ

16.ສ່ວນພວກອັກຄະສາວົກທັງສິບເອັດອົງພາກັນຂຶ້ນເທິງພູໜ່ວຍໜຶ່ງ ຢູ່ແຂວງຄາລີເລຕາມພຣະອົງໄດ້ສັ່ງບອກ. 17.ເມື່ອພົບເຫັນພຣະອົງແລ້ວ ພວກເຂົາກໍພາກັນຂາບໄຫວ້ນະມັດສະການພຣະອົງ ແຕ່ລາງຄົນຍັງມີຄວາມສົງໄສຢູ່. 18.ພຣະເຢຊູເຈົ້າຊົງຫຍັບເຂົ້າໄປຫາພວກເຂົາແລະກ່າວວ່າ: “ເຮົາໄດ້ຮັບສິດອຳນາດທຸກປະການ ໃນສະຫວັນແລະໃນແຜ່ນດິນ, 19.ດັ່ງນັ້ນ ພວກເຈົ້າຈົ່ງພາກັນໄປທົ່ວໂລກ ເພື່ອທຳໃຫ້ທຸກຊາດທຸກພາສາ ໄດ້ກັບເປັນລູກສິດຂອງເຮົາ, ຈົ່ງລ້າງບາບໃຫ້ພວກເຂົາ ເດຊະພຣະນາມພຣະບິດາ ແລະພຣະບຸດ ແລະພຣະຈິດ. 20.ແລະສອນໃຫ້ເຂົາຖືຕາມພຣະບັນຢັດທັງມວນຂອງເຮົາ, ສ່ວນເຮົາ ເຮົາກໍຢູ່ນຳພວກເຈົ້າທຸກໆວັນ ຈົນເຖິງວັນສິ້ນພິພົບ.”