ກຳເນີດແລະປະຖົມມະໄວຂອງພຣະເຢຊູເຈົ້າ

ລຳດັບເຊື້ອວົງຂອງພຣະເຢຊູເຈົ້າ

1.ລຳດັບເຊື້ອສາຍຂອງພຣະເຢຊູກຣິສໂຕ ບຸດຂອງດາວິດ ບຸດຂອງອາບຣາຮຳ: 2.ອາບຣາຮຳໃຫ້ກຳເນີດແກ່ອີຊາອັກ, ອີຊາອັກໃຫ້ກຳເນີດແກ່ຢາກັອບ, ຢາກັອບໃຫ້ກຳເນີດແກ່ຢູດາ ແລະພວກອ້າຍນ້ອງຂອງເຂົາ. 3.ຢູດາໃຫ້ກຳເນີດແກ່ຟາແຣດແລະຊາຣາຈາກນາງທາມາ, ຟາແຣດໃຫ້ກຳເນີດແກ່ແອດສະຣອນ, ແອດສະຣອນໃຫ້ກຳເນີດແກ່ອາຣາມ. 4.ອາຣາມໃຫ້ກຳເນີດແກ່ອາມີນາດັບ, ອາມີນາດັບໃຫ້ກຳເນີດແກ່ນາຊອນ, ນາຊອນໃຫ້ກຳເນີດແກ່ຊັນ ມອນ. 5.ຊັນມອນໃຫ້ກຳເນີດແກ່ໂບໂອດຈາກນາງຣາຮັບ. ໂບໂອດໃຫ້ກຳເນີດແກ່ໂອແບັດ ຈາກນາງຣຸດ. ໂອແບັດໃຫ້ກຳເນີດແກ່ແຢດເຊ. 6.ແຢດເຊໃຫ້ກຳເນີດແກ່ກະສັດດາວິດ, ດາວິດໃຫ້ກຳເນີດແກ່ຊາໂລມອນຈາກນາງຜູ້ເປັນພັນລະຍາຂອງອູຣີ. 7.ຊາໂລມອນໃຫ້ກຳເນີດແກ່ໂຣໂບອຳ, ໂຣໂບອຳໃຫ້ກຳເນີດແກ່ອາບິີອາ, ອາບິີອາໃຫ້ກຳເນີດແກ່ອາຊາ. 8.ອາຊາໃຫ້ກຳເນີດແກ່ໂຢຊາຟັດ, ໂຢຊາຟັດໃຫ້ກຳເນີດແກ່ໂຢຣາມ, ໂຢຣາມໃຫ້ກຳເນີດແກ່ໂອຊີອາດ. 9.ໂອຊີອາດໃຫ້ກຳເນີດແກ່ໂຢອາທັນ, ໂຢອາທັນໃຫ້ກຳເນີດແກ່ອາຄາດ, ອາຄາດ ໃຫ້ກຳເນີດແກ່ເອເຊຄີອາດ. 10.ເອເຊຄີອາດໃຫ້ກຳເນີດແກ່ມານັດເຊ, ມານັດເຊໃຫ້ກຳເນີດແກ່ອາມອນ, ອາມອນໃຫ້ກຳເນີດແກ່ໂຢຊີອາດ. 11.ໂຢຊີອາດໃຫ້ກຳເນີດແກ່ເຢໂກນີອາດແລະໝູ່ນ້ອງຊາຍ ໃນຄາວຖືກເນລະເທດທີ່ບາບີລອນ.

12.ກັບຈາກການຖືກເນລະເທດທີ່ບາບີລອນແລ້ວ ເຢໂກນີອາດໃຫ້ກຳເນີດແກ່ຊາລາທີແອນ, ຊາລາທີແອນໃຫ້ກຳເນີດແກ່ໂຊໂຣບາແບນ. 13.ໂຊໂຣບາແບນໃຫ້ກຳເນີດແກ່ອາບີອຸດ, ອາບີອຸດໃຫ້ກຳເນີດແກ່ອາລີອາກິມ, ອາລີອາກິມໃຫ້ກຳເນີດແກ່ອາຊໍ. 14.ອາຊໍໃຫ້ກຳເນີດແກ່ຊາດົກ ຊາດົກໃຫ້ກຳເນີດແກ່ອາກິມ, ອາກິມໃຫ້ກຳເນີດແກ່ເອລີອຸດ. 15.ເອລີອຸດໃຫ້ກຳເນີດແກ່ເອເລອາຊາ, ເອເລອາຊາໃຫ້ກຳເນີດແກ່ນາທານ, ນາທານໃຫ້ກຳເນີດແກ່ຢາກັອບ, 16.ຢາກັອບໃຫ້ກຳເນີດແກ່ຢໍແຊ, ສາມີຂອງພຣະນາງມາຣີອາ, ຜູ້ບັງເກີດພຣະເຢຊູເຈົ້າ, ຊຶ່ງຊາວເຮົາຮຽກວ່າພຣະກຣິສໂຕເຈົ້າ.

17.ສະຫລຸບຄວາມແລ້ວ ນັບແຕ່ອາບຣາຮຳເຖິງດາວິດ ມີສິບສີ່ເຊັ່ນຄົນ ແຕ່ດາວິດເຖິງຄາວຖືກເນລະເທດໄປບາບີລອນ ມີສິບສີ່ເຊັ່ນຄົນ ແລະແຕ່ຄາວຖືກເນລະເທດໄປບາບີລອນເຖິງພຣະກຣິສໂຕເຈົ້າ ກໍມີສິບສີ່ເຊັ່ນຄົນ.

ການປະຕິສົນຂອງພຣະເຢຊູເຈົ້າ

18.ພຣະເຢຊູເຈົ້າໄດ້ຊົງບັງເກີດດັ່ງນີ້: ພຣະນາງມາຣີອາມານດາຂອງພຣະອົງເປັນຄູ່ໝັ້ນຂອງຢໍແຊ, ກ່ອນທີ່ທ່ານທັງສອງໄດ້ຢູ່ຮ່ວມກັນ, ນາງກໍໄດ້ຊົງຄັນດ້ວຍລິດພຣະຈິດ. 19.ຢໍແຊຜູ້ສາມີເປັນຄົນຊອບທຳ ແລະບໍ່ຢາກໃຫ້ນາງເສຍໜ້າຕໍ່ປະຊາຊົນ ຈຶ່ງຕົກລົງໃນໃຈວ່າ ຈະສົ່ງນາງທາງລັບ. 20.ໃນເວລາທ່ານກຳລັງຄິດໃນໃຈດັ່ງນີ້ ເທວະດາອົງໜຶ່ງຂອງພຣະອົງເຈົ້າກໍປະຈັກມາຫາທ່ານທາງຄວາມຝັນ ແລະກ່າວກັບທ່ານວ່າ: “ຢໍແຊບຸດຂອງດາວິດເອີຍ! ຢ່າວິຕົກເລີຍໃນການຮັບເອົານາງມາຣີອາພັນລະຍາຂອງເຈົ້າໄວ້ຮ່ວມເຮືອນ ດ້ວຍເຫດວ່າ ການປະຕິສົນໃນນາງນັ້ນເປັນກິດຈະການຂອງພຣະຈິດເຈົ້າ. 21.ນາງຈະບັງເກີດບຸດຊາຍຄົນໜຶ່ງ ແລະເຈົ້າຈະຕັ້ງຊື່ວ່າເຢຊູ ດ້ວຍເຫດວ່າ ແມ່ນບຸດຜູ້ນີ້ແລ້ວທີ່ຈະຊ່ວຍປະຊາກອນຂອງພຣະອົງໃຫ້ຫວິດພ້ອຍຈາກບາບຂອງເຂົາ. 22.ແລະສິ່ງເຫລົ່ານີ້ໄດ້ເປັນມາກໍເພື່ອໃຫ້ສຳເລັດຕາມພຣະວາຈາຂອງພຣະອົງເຈົ້າໂດຍທາງປະພາສົກວ່າ: 23.ນາງພົມມະຈາລີຈະຊົງຄັນ ແລະຈະບັງເກີດບຸດຊາຍຄົນໜຶ່ງ ທີ່ຈະໄດ້ຮັບນາມວ່າ: ແອມມານູແອນ ເປັນຊື່ທີ່ມີຄວາມໝາຍວ່າ: ພຣະເປັນເຈົ້າສະຖິດຢູ່ກັບພວກເຮົາ.” 

24. ເມື່ອຕື່ນນອນແລ້ວ, ຢໍແຊກໍກະທຳຕາມທີ່ເທວະດາຂອງພຣະອົງເຈົ້າໄດ້ບອກສັ່ງຄື ທ່ານໄດ້ຮັບເອົາພັນລະຍາຂອງທ່ານໄວ້ຢູ່ຮ່ວມເຮືອນ, 25.ແລະບໍ່ໄດ້ລ່ວງລະເມີດຕໍ່ສິນພົມມະຈັນຂອງພຣະນາງເລີຍ; ພຣະນາງກໍໄດ້ບັງເກີດບຸດຊາຍຄົນໜຶ່ງ ແລະທ່ານໄດ້ຕັ້ງຊື່ວ່າ ເຢຊູ.