ຟັງພຣະວໍຣະສານ ບົດຮ່ຳເພິງ ແລະບົດພາວະນາ

ພີ່ນ້ອງທີ່ຮັກ, ຂໍໃຫ້ຄົນທົ່ວໄປຖືພວກເຮົາວ່າ ເປັນຜູ້ຮັບໃຊ້ຂອງພຣະກຣິສໂຕເຈົ້າ ແລະເປັນຜູ້ຮັກສາ ຂໍ້ເລິກລັບຂອງພຣະເຈົ້າ. ສິ່ງທີ່ເຂົາຮ້ອງຂໍນຳຜູ້ຮັກສານັ້ນຄື ຂໍໃຫ້ເພິ່ນເປັນຜູ້ສັດຊື່. ສຳລັບຂ້າພະເຈົ້າ, ຈະຖືກພວກພີ່ນ້ອງ ຫລືສານຕັດສິນກໍບໍ່ສຳຄັນຫຍັງ; ຂ້າພະເຈົ້າເອງ ກໍບໍ່ໄດ້ຕັດສິນຕົວເອງຊ້ຳ. ຕາມຈິງແລ້ວ, ມະໂນທຳຂອງຂ້າພະເຈົ້າ ບໍ່ຕິຕຽນຂ້າພະເຈົ້າຫຍັງ ແຕ່ບໍ່ໄດ້ໝາຍຄວາມວ່າ ຂ້າພະເຈົ້າເປັນຜູ້ຊອບທຳແລ້ວດອກ, ຜູ້ຕັດສິນພິພາກສາຂ້າພະເຈົ້າ ແມ່ນພຣະອົງເຈົ້າ. ດັ່ງນີ້ ພວກພີ່ນ້ອງຢ່າຟ້າວພິພາກສາ ຕັດສິນກ່ອນເວລາ, ຈົ່ງຄອຍຖ້າພຣະອົງເຈົ້າສະເດັດມາເສຍກ່ອນ, ພຣະອົງເອງ ຈະນຳເອົາສິ່ງທີ່ລີ້ລັບ ຢູ່ໃນຄວາມມືດ ອອກມາໃຫ້ເຫັນແຈ້ງ ແລະພຣະອົງຈະໄຂສຳແດງ ຄວາມຄິດເລິກລັບໃນໃຈ ໃຫ້ປາກົດແຈ້ງອອກມາ. ແລ້ວເວລານັ້ນ ພຣະເຈົ້າຈະຍ້ອງຍໍທຸກຄົນ ຕາມທີ່ເຂົາສົມຄວນຈະໄດ້ຮັບ.

ຮັບ: ຄວາມຮອດຂອງຄົນຊອບທຳມາຈາກ ພຣະອົງເຈົ້າ.

- ຈົ່ງເຊື່ອໝັ້ນໃນພຣະອົງເຈົ້າ ແລະສ້າງແຕ່ຄວາມດີ. ຈົ່ງອາໄສຢູ່ໃນດິນແດນຂອງຕົນ ຢ່າງ ສັດຊື່ທ່ຽງທຳ. ຈົ່ງຊອກຫາຄວາມຍິນດີໃນພຣະອົງເຈົ້າ ພຣະອົງຈະປະທານໃຫ້ເຈົ້າໄດ້ ສົມໃຈມັກ. (ເຊີນຮັບ)

- ຈົ່ງມອບຊາຕາກຳຂອງເຈົ້າ ໄວ້ກັບພຣະອົງເຈົ້າ ເຊື່ອໝັ້ນໃນພຣະອົງ ແລະພຣະອົງຈະຊ່ວຍເຫລືອເຈົ້າ. ພຣະອົງຈະທຳໃຫ້ຄວາມດີຂອງເຈົ້າແຈ້ງຂຶ້ນ ຄືຍາມກາງເວັນ ແລະຄວາມຊອບທຳຂອງເຈົ້າເຈີດຈ້າ ດັ່ງຕາເວັນຍາມທ່ຽງ. (ເຊີນຮັບ)

- ຈົ່ງຫລີກເວັ້ນຄວາມຊົ່ວ ແລະສ້າງຄວາມດີ, ແລ້ວເຈົ້າຈະມີບ່ອນອາໄສຢູ່ຕະຫລອດນິຣັນດອນ. ດ້ວຍວ່າ ພຣະອົງເຈົ້າມັກຊອບຄວາມຊື່ກົງ ແລະບໍ່ປະຖິ້ມພວກທີ່ຈົ່ງຮັກພັກດີຕໍ່ ພຣະອົງ. (ເຊີນຮັບ)

- ພຣະອົງເຈົ້າເປັນຄວາມຮອດຂອງພວກຄົນຊອບທຳ, ເປັນບ່ອນລີ້ຊ່ອນໃຫ້ພວກເຂົາ ໃນ ຍາມຕ້ອງລຳບາກ. ພຣະອົງເຈົ້າຊ່ວຍເຫລືອພວກເຂົາ ແລະຊ່ວຍເອົາຊີວິດພວກເຂົາໄວ້. ພຣະອົງຊ່ວຍພວກເຂົາ ໃຫ້ພົ້ນຈາກຄົນອະທຳ, ຍ້ອນພວກເຂົາເອົາພຣະອົງ ເປັນບ່ອນເພິ່ງລີ້. (ເຊີນຮັບ)

ອັນເລລູຢາ! ອັນເລລູຢາ! ເຮົາເປັນຄວາມສະຫວ່າງຂອງໂລກ ຜູ້ໃດເດີນຕາມຫລັງເຮົາມາ ຜູ້ນັ້ນຈະໄດ້ແສງສະຫວ່າງບັນດານຊິວິດ. ອັນເລລູຢາ!

ໃນເວລານັ້ນ, ພວກຟາຣີເຊວ ແລະພວກອາຈານພຣະຄຳພີທູນພຣະເຢຊູເຈົ້າວ່າ: “ລູກສິດຂອງຢວງຖືສິນອົດອາຫານ ແລະສວດພາວະນາເລື້ອຍໆ ລູກສິດຂອງພວກຟາຣີເຊວ ກໍຖືຄືກັນ ແຕ່ລູກສິດຂອງທ່ານຍູທ່າງກິນແລະດື່ມ!” ພຣະເຢຊູເຈົ້າກ່າວຕອບວ່າ: “ພວກເຈົ້າຈະໃຫ້ມິດສະຫາຍຂອງເຈົ້າບ່າວອົດອາຫານ ເວລາເຈົ້າບ່າວຍັງຢູ່ນຳບໍ? ຈະມີມື້ໜຶ່ງ ເມື່ອເຈົ້າບ່າວຖືກຍົກໄປແລ້ວ ເວລານັ້ນແຫລະ ພວກເຂົາຈຶ່ງຈະອົດອາຫານ.”

ພຣະອົງກ່າວຄຳປຽບທຽບໃຫ້ພວກເຂົາຟັງວ່າ: “ບໍ່ມີໃຜຈີກເອົາແພ ຈາກເສື້ອໃໝ່ ໄປຕາບເສື້ອເກົ່າ. ດ້ວຍວ່າ ເສື້ອໃໝ່ຈະຂາດ ແລະແພໃໝ່ກໍຈະບໍ່ເຂົ້າກັບແພເກົ່າ. ແລ້ວກໍບໍ່ມີໃຜເອົາເຫລົ້າອະງຸ່ນໃໝ່ໃສ່ໃນຖົງໜັງເກົ່າ ດ້ວຍວ່າ ເຫລົ້າໃໝ່ຈະເຮັດໃຫ້ຖົງເກົ່າແຕກ ເຫລົ້າຈະເຮ່ຍ ຮວາຍໄປ ແລະຖົງກໍຈະເສຍດ້ວຍ ແຕ່ໃຫ້ໃສ່ເຫລົ້າໃໝ່ໃນຖົງໃໝ່. ບໍ່ມີໃຜກິນເຫລົ້າເກົ່າແລ້ວມາຢາກເຫລົ້າໃໝ່ ຍ້ອນເຂົາເວົ້າວ່າ: ເຫລົ້າເກົ່າແຊບກວ່າ.”

ບັນຫາທີ່ພວກຟາຣີເຊວແລະອາຈານພຣະຄໍາພີຖາມພຣະເຢຊູເຈົ້າວັນນີ້ຄືເລື່ອງການອົດອາຫານ. ຖ້າພວກເຮົາອ່ານຢ້ອນຄືນຫລັງວາຈາພຣະເຈົ້າໂດຍນັກບຸນລູກາກໍຈະເຫັນວ່າ ຫລັງຈາກທີ່ພຣະເຢຊູເຈົ້າໄດ້ຮຽກເອີ້ນເລວີ (ຫລືມັດເທວ) ຄົນເກັບພາສີໃຫ້ຕິດຕາມພຣະອົງໄປ. ກ່ອນທີ່ມັດເທວຈະມາເປັນສິດຕິດຕາມພຣະເຢຊູເຈົ້າ ທ່ານກໍໄດ້ກັບເມືອເຮືອນເພື່ອຈັດງານລ້ຽງສະຫລອງອໍາລາໝູ່ເພື່ອນ. ໃນງານລ້ຽງສະຫລອງນີ້ກໍມີໝູ່ເພື່ອນຂອງມັດເທວ ຜູ້ຊຶ່ງສັງຄົມໃນສະໄໝນັ້ນຖືວ່າເປັນຄົນບາບ. ແລະກໍມີພວກລູກສິດແລະພຣະເຢຊູເຈົ້າຮ່ວມນໍາ. ງານສະຫລອງນີ້ບໍ່ພຽງແຕ່ເພື່ອອໍາລາໝູ່ເພື່ອນຂອງມັດເທວເທົ່ານັ້ນ, ແຕ່ຍັງສະແດງອອກເຖິງຄວາມຍິນດີທີ່ມັດເທວເອງຜູ້ເປັນຄົນບາບໄດ້ຖືກຮຽກເອີ້ນຈາກພຣະເຢຊູເຈົ້າໃຫ້ມາເປັນສິດຕິດຕາມພຣະອົງໄປ.

ວັນນີ້, ພວກຟາຣີເຊວພັດຖາມພຣະເຢຊູເຈົ້າວ່າ ເປັນຫຍັງພວກລູກສິດຂອງພຣະອົງບໍ່ອົດອາຫານຄືກັບພວກລູກສິດຂອງທ່ານຢວງແລະພວກລູກສິດຂອງພວກຟາຣີເຊວ? ໃນພຣະທໍາເກົ່າ, ການອົດອາຫານເປັນເຄື່ອງໝາຍແຫ່ງຄວາມໂສກເສົ້າ, ການເປັນທຸກກັບໃຈ, ການລໍຖ້າພຣະເມດຊີອາ. ດັ່ງນັ້ນ, ຄໍາຖາມເລື່ອງການອົດອາຫານທີ່ພວກຟາຣີເຊວຖາມພຣະເຢຊູເຈົ້າວັນນີ້ບໍ່ພຽງແຕ່ແມ່ນເລື່ອງການຈັບຜິດກ່ຽວກັບການປະຕິບັດພຣະທໍາບັນຢັດເທົ່ານັ້ນ, ແຕ່ຍັງໝາຍວ່າພວກຟາຣີເຊວບໍ່ເຊື່ອໃນຕົວຂອງພຣະເຢຊູເຈົ້າວ່າພຣະອົງແມ່ນພຣະເມດຊີອາຊຶ່ງບັນດາປະພາສົກໄດ້ທໍານາຍໄວ້.

ໂອພຣະເຢຊູເຈົ້າ, ຫລາຍຄັ້ງລູກກໍເປັນຄືພວກຟາຣີເຊວແລະອາຈານພຣະຄໍາພີ ເພາະລູກບໍ່ເຊື່ອວ່າພຣະອົງແມ່ນພຣະເມດຊີອາ ຜູ້ທີ່ພຣະບິດາເຈົ້າໄດ້ສົ່ງມາເພື່ອຊ່ວຍລູກໃຫ້ຮອດ. ຫລາຍຄັ້ງລູກກໍອົດອາຫານຄືກັບພວກຟາຣີເຊວເພື່ອລໍຖ້າຜູ້ໃດຜູ້ໜຶ່ງທີ່ຈະມານອກຈາກພຣະອົງ. ລູກໄດ້ມອງຂ້າມການປະທັບຢູ່ຂອງພຣະອົງຢູ່ໃນລູກແລະທ່າມກາງໂລກນີ້. ໂຜດຊ່ວຍລູກໃຫ້ພົບກັບພຣະອົງຜູ້ເປັນອົງແຫ່ງຄວາມຍິນດີ, ຄວາມຮັກແລະຄວາມຮອດຂອງລູກດ້ວຍເທີ້ນ. ອາແມນ.